Joel 1 - New Testament with Old Testament portions

Manchi aina kaunak ashi árak ainan amuktatui tusa Yuus timau

¹ Amina pataim israelita aina chicham ujakarta tusa Yuus timau asa, Petuelan uchiri Joel ajakua nu nina patai israelita ainan chicharuk:

^2-4 Apu ainatiram, tura ashi shuar ainatirmesha antuktarma, cuatrowa imania manchi aina nisha iimtin shir nukap kakekar árak ainan amukarai. Nekas yaunchuk atumin uuntri matsamajakarua nuisha jumamtin wantinunka pegkesha wainujakcharu ainawai. Ju pachisrum atumin uchiri aina ujaktarma, tura atumin uchiri nina uchiri artata nuna, tura nina tiragke atak artata nunasha ujakartin arti.

⁵ Umutai vino atsuttawai. Tumatin asamtai vino umarum nampen ainatiram shintaarum útkurum matsamsatarma.

⁶ Suntar aina maaniattsa shimumaina numamtuk manchi aina shir nukap ina nugken kaunkarai. Nuna nai ainaka shir atsakamu tura naisha leónka naiya numamtuk ainawai.

⁷ Imanu asar ajanam vid aina irunun higo aina irununcha ashi tsupirarai, tura kanawe ainancha ashi pakarar seaptinchau amajsarai.

⁸ Turawaru asarmatai, nuwa natsa ni aishrinatin chichasmau jakamtai, wake mesemar nekapeaku nugkutain jaanchin nugkur útuk pujuwa numamtuk enentai ichichtumainchau útainawai.

⁹ Numamtuk sacerdote ainasha, Yuusnau atii tusa akankamu aina, vino, trigo, cebada, nu aina atsakai shuar aina Yuus ememattasa iruuntai jeanam ejeainachu asamtai útu matsatainawai.

¹⁰ Ajanam árak irunuka kakaru, tuma asamtai trigo, vino, aceitesha pegkesha atsusuiti. Tuma asa aja ainaka aya nugkak jasaruiti.

¹¹ Atum ajanam takau ainatiram, atumi arakri trigo aina tura cebada aina jina ashi kakaru asarmatai wake mesemar nekapeakrum úttarma.

¹² Vid aina, higo aina, munchi aina, kampanak aina, manzana aina, tura chikich numi ainasha ashi kakarai. Tumawaru asamtai shuar ainaka útainawai. Tumainak shuar ainaka shir aneasa pujamunka inaiyainak wake mesemar nekapenawai.

¹³ Vino aina, trigo aina tura cebada aina nuka atsuinawai. Tuma asamtai Yuusnau atii tusa ejétuinatsui. Tuma asamtai Yuus ememattasa iruuntai jeanmagka iruuntra Yuus emematmauka pegkesha atsawai. Nu enentaimsarum, atum sacerdote tagku aina maa patasa epetainam Yuus takarin ainatiram wake mesemar pujakur nugkutai jaanch nugkurum káshi uu úteakrum tsawagtarma.

¹⁴ Apu aina, tura ashi shuar aina untsukrum, ina Yuusri ememattasa iruuntai jeanam iruuntrarum yurumak yutsuk pujusrum Yuus aujsatarma, tusa tinaiti.

¹⁵ ¡Yuus tatnuka tsawanka ashi jeaktak jasai! tunau takat inaitsuk pujakrinka Yuus ashi senchirtina nu waittan suramsattaji.

¹⁶ Ii waintrinig manchi aina kaunkar árak ainan nuken amutak ashi ijinayi. Tuma asamtai Yuus ememattasa iruuntai jeanam iruuntrar shir aneasar takatai aya nuka atsawai.

¹⁷ Yumi yutatsui, tuma asamtai trigo arakmau ainaka ashi kakaar jinawaiti. Tuma asamtai trigo juka egketai ainasha mamukaruiti.

¹⁸ Yumaintri atsurmau asa vaca aina, oveja ainasha tsukai waitainak útainawai, tagku ainaka chirichiri atsurmau asar tsukai jinuinawai.

¹⁹ Nupa ainan tura númi ainancha ji keak aesa ijinayi. Yuusa wait aneasam yainkratkata.

²⁰ Entsa aina kuyukar muku jasarai, tura ji keak nupa ainan ashi ijinayi, Tuma asamtai kuntin ainasha amina yainkati tusa seatmainawai, tusa tinaiti.