Numeri 1 - Ombeipera

Omavarero omatenga wOvaisrael

¹ Meyuva etenga komueze outjavari, mombura oitjavari Ovaisrael tji va za nokupita mOengipte, Muhona wa hungira ku Moses mokuti onguza kwa Sinai, mOndanda yOmahakaeneno, na tja:

² “Ove na Aron vareye otjiwaṋa atjihe tja Israel otja kozonganda na komaṱunḓu wawo; wina vareye ovarumendu avehe, omundu koumweumwe. Tjangeye omana wawo,

³ okuza kowozombura omirongo vivari nokomurungu, mbu mave yenene okuyenda kovita.

⁴ Toororeye omurumendu umwe momuhoko auhe, ngu ri otjiuru tjeṱunḓu re.”

⁵ Omana wovarumendu mbu mave sokumuvatera owo nga: Komuhoko wa Ruben: OElisur, omuzandu wa Sedeur;

⁶ komuhoko wa Simeon: OSelumiel omuzandu wa Surisadai;

⁷ komuhoko wa Juda: ONakson, omuzandu wa Aminadab;

⁸ komuhoko wa Isakar: ONetanel, omuzandu wa Suar;

⁹ komuhoko wa Sebulon: OEliab, omuzandu wa Helon;

¹⁰ kozondekurona za Josef: Komuhoko wa Efraim: OElisama, omuzandu wa Amihud; komuhoko wa Manasse: OGamliel, omuzandu wa Pedasur;

¹¹ komuhoko wa Benjamin: OAbidan, omuzandu wa Gidoni;

¹² komuhoko wa Dan: Ahieser, omuzandu wa Amisadai;

¹³ komuhoko wa Aser: OPagiel, omuzandu wa Okran;

¹⁴ komuhoko wa Gad: OEljasaf, omuzandu wa Reguel;

¹⁵ komuhoko wa Naftali: OAhira, omuzandu wa Enan.

¹⁶ Imbi ombi ri oviuru vyozonganda mbe ri ovanane vomihoko vyawo, mba toororwa mombongarero kotjiungura hi.

¹⁷ Moses na Aron otji va isana ovarumendu mba omurongo na vevari vomana ngo.

¹⁸ Nowo va woronganisa ombongarero aihe meyuva etenga komueze outjavari. Novandu mba avehe va tjangwa otja kozonganda na komaṱunḓu wawo; omana wovarumendu avehe okuza kowozombura omirongo vivari nokomurungu ya tjangwa naye varwa,

¹⁹ otja Muhona pa rakiza ku Moses. Moses we ve varera mokuti onguza Sinai.

²⁰ Ovarumendu avehe okuza kowozombura omirongo vivari nokomurungu, mba yenena okuyenda kovita va tjangwa otja komana wawo notja kozonganda na komaṱunḓu wawo, okuutira komuhoko wa Ruben, omuzandu everi ra Jakob. Ovivaro avihe kumwe vya ri nai:

²¹ Ovaruben va ri 46,500

^22-23 Ovasimeon va ri 59,300

^24-25 Ovagad va ri 45 650

^26-27 Ovajuda va ri 74 600

^28-29 Ovaisakar va ri 54 400

^30-31 Ovasebulon va ri 57 400

^32-33 Ovaefraim va ri 40 500

^34-35 Ovamanasse va ri 32 200

^36-37 Ovabenjamin va ri 35 400

^38-39 Ovadan va ri 62 700

^40-41 Ovaaser va ri 41 500

^42-43 Ovanaftali va ri 53 400.

⁴⁴ Imba omba ri ovarumendu mba varwa i Moses na Aron novanane vOvaisrael, ovarumendu omurongo na vevari, auhe aa kuramenepo onganda ya ihe.

⁴⁵ Nu Ovaisrael avehe kumwe, mba varwa otja komaṱunḓu wawo okuza kowozombura omirongo vivari nokomurungu, va yenena okuyenda kovita,

⁴⁶ va ri 603 550.

⁴⁷ Nungwari imba Ovalevi otja komaṱunḓu wooihe kave varerwe puna omihoko vyarwe,

⁴⁸ orondu Muhona wa hungira ku Moses na tja:

⁴⁹ “Tji mo vara ovarumendu mbu mave pu pokuyenda kovita, ovara omuhoko wa Levi auyerike.

⁵⁰ Nungwari zika imba Ovalevi ve tjevere Ondanda yOmahakaeneno noviungurise vyayo avihe. Owo ngave i tjinde noviungurise vyayo avihe, nu ngave karere mu yo, nu ngave tone ozondanda zawo okukondorokisa yo.

⁵¹ NOndanda yOmahakaeneno tji mai tjindi Ovalevi nga rire mbe i haṋa, nu tji ya tuwa pehi, owo nga rire mbe i ziki; nomundu ngamwa warwe tje ya popezu nOndanda ndji, nga ṱe.

⁵² Nomihoko vyOvaisrael ngavi tone ozondanda zavyo, omuhoko auhe poruveze rwawo oruni. Omuisrael auhe perapi romunda wawo otja kovimbumba vyawo vyovita.

⁵³ Nungwari Ovalevi ngave zike ozondanda zawo okukondorokisa indji Ondanda yOmahakaeneno kutja ve i tjevere, kokutja omazenge wa Ndjambi ayehe ya kotjiwaṋa tjOvaisrael.”

⁵⁴ Ovaisrael otji va tjita oviṋa avihe Muhona mbya rakiza ku Moses.