زَبور 24 - هُدائے پاکێن کتاب، بلۆچی زبانا

مَزن‌شانێن بادشاه

داوودئے زَبور.

¹ زمین و آییئے سجّهێن هستی هُداوندئیگ اَنت، جهان و سجّهێن مَهلوک.

² چیا که هُداوندا آییئے بنیات مان دریایا نادێنت و آپانی سرا اۆشتارێنت.

³ کئے چه هُداوندئے کۆها بُرزاد شتَ کنت؟ کئے آییئے پاکێن جاگها اۆشتاتَ کنت؟

⁴ هما که دلی ساپ و دستی پاک اِنت، هما که وتی اَرواها دێم په ناهودگیا نترّێنیت و درۆگێن سئوگندَ نئوارت.

⁵ آ چه هُداوندا برکتَ گیپت و چه وتی رَکّێنۆکێن هُدایا، اَدل و اِنساپ.

⁶ همے پئیما اَنت، آ مردم که آکوبئے هُدائے شۆهازا اَنت، هما که په آییئے دێما هُدۆناک اَنت. اۆشت...

⁷ او دروازگان! وتی سرا بُرز بدارێت. او کوَهنێن در و دپیگان! وتا په شاهگانی پَچ کنێت، تانکه مزنی و شانئے بادشاه بگوَزیت.

⁸ مزنی و شانئے اے بادشاه کئے اِنت؟ پُرواک و زۆراورێن هُداوند، هُداوند که جنْگا دلێر اِنت.

⁹ او دروازگان! وتی سرا بُرز بدارێت! او کوَهنێن در و دپیگان! وتا په شاهگانی پَچ کنێت، تانکه مزنی و شانئے بادشاه بگوَزیت.

¹⁰ مزنی و شانئے اے بادشاه کئے اِنت؟ لشکرانی هُداوند هما اِنت مزنی و شانئے بادشاه. اۆشت...