زَبور 133 - هُدائے پاکێن کتاب، بلۆچی زبانا

تِپاکی وشّ و دلکَشّ اِنت

دێم په اورشَلیما برزاد رئوگئے سئوتے. داوودئے زَبور.

¹ چۆن وشّ و دلکَشّ اِنت که هُدائے مردم په تپاکی هۆر بنندنت.

² پوره گرانبهاێن ٹێلے که سرا چَرپ کرتگ و ریشّان اێر رچان اِنت، هارونئے ریشّان و جهلاد تان کباهئے جیگا.

³ چۆ که هِرمۆنئے نۆدان که سَهیونئے کۆهانی سرا شَنزنت. چێا که اۆدا هُداوندا وتی برکتئے پرمان داتگ، زِند، تان اَبد.