پێدایش 16 - هُدائے پاکێن کتاب، بلۆچی زبانا

هاجِر و اِسماێل

¹ اِبرامئے لۆگی ساراییا چُکَّ نبوت. ساراییا مِسری مۆلدے هست‌اَت که نامی هاجِر اَت.

² ساراییا گۆن اِبراما گوَشت: ”هُداوندا منی دێم داشتگ و چُکّ آورتَ نکنان. تئو برئو و گۆن منی مۆلدا بوَپس که بلکێن منا چه آییئے نێمگا چُکّے ببیت.“ اِبراما ساراییئے گَپّ زُرت.

³ وهدے اِبراما دَه سال کَنهانا گوازێنتگ‌اَت، آییئے جَن ساراییا وتی مِسری مۆلد هاجِر زُرت و اِبرامارا په جَنی دات.

⁴ اِبراما گۆن هاجِرا وپت و واب کرت و هاجِرئے لاپ پُرّ بوت. وهدے هاجِرا زانت که منی لاپ پُرّ اِنت، وتی بانُکئے مان نئیارَگی بندات کرت.

⁵ گڑا ساراییا گۆن اِبراما گوَشت: ”اے اَزاب و شِدّت که منی سرا کپتگ، اِشیئے زِمّهوار تئو ائے. من وتی مۆلد تئیی بَگَلا دات و نون وهدے آ زانت که لاپی پُرّ اِنت، منا مانَ نئیاریت. هُداوند منی و تئیی نیاما دادرَس بات.“

⁶ بله اِبراما گۆن ساراییا گوَشت: ”تئیی مۆلد تئیی دستا اِنت، گۆن آییا هما پئیما بکن که تئیی دلا شَرتر اِنت.“ گڑا سارایی، هاجِرئے سرا ترُند بوت و هاجِر چه آییا تتک.

⁷ هُداوندئے پرێشتگا هاجِر گیابانا، چَمّگێئے کِرّا دیست. اے هما چَمّگ اِنت که شورئے راهئے سرا اِنت.

⁸ پرێشتگا گوَشت: ”او هاجِر، ساراییئے مۆلد! تئو چه کجا آتکگئے و کجا رئوگا ائے؟“ هاجِرا گوَشت: ”من چه وتی بانُک ساراییا تچگا آن.“

⁹ گڑا هُداوندئے پرێشتگا گوَشت: ”وتی بانُکئے کِرّا واترّ کن و وتا هماییئے دستا دئے.“

¹⁰ پرێشتگا چُش هم گوَشت: ”هُداوندَ گوَشیت که من تئیی نَسل و پَدرێچا اَنچۆ بازَ کنان که چه هسابا ڈَنَّ بنت.“

¹¹ هُداوندئے پرێشتگا پدا گوَشت: ”نون تئو لاپ‌پُرّ ائے و مردێن‌چُکّے کارئے. چُکّئے ناما اِسماێل بکن چێا که هُداوندا تئیی پِریات اِشکتگ.

¹² اے بچکّ وَکشیێن هَرے بیت اے سجّهێنانی دُژمنَ بیت و سجّهێن اِشیئے دُژمنیا کننت. اے وتی زندا گۆن وتی سجّهێن براتان په جنگ و جێڑهَ گوازێنیت.“

¹³ هُداوندا که گۆن هاجِرا هبر کرت، هاجِرا هُداوندارا اے نام بست: ”تئو هما هُدا ائے که منا گندئے.“ چێا که هاجِرا گوَشت: ”نون من هما دیست که منا مُدامَ گندیت.“

¹⁴ پمێشکا اے چات، بِهێر‌لَهایی‌رویی نام کپت. اے چات، کادِش و بێرِدئے نیاما اِنت.

¹⁵ گڑا هاجِرا په اِبراما مردێن‌چُکّے پێدا کرت و اِبراما هاجِرئے آورتگێن چُکّئے نام اِسماێل کرت.

¹⁶ وهدے هاجِر په اِسماێلا چِلّگ بوت، اِبرامئے اُمر هشتاد و شش سال اَت.