دَرگوَز 11 - هُدائے پاکێن کتاب، بلۆچی زبانا

گُڈّی کَهر: ائوَلی چُکّانی مَرک

¹ هُداوندا گۆن موسّایا گوَشت: ”من پِرئون و مِسرئے سرا دگه یکّ کَهرے دئورَ دئیان. اِشیا رند آ شمارا چه اِدا رئوگا کِلّیت. رئوگئے هبرا بِلّ، شمارا سَرجمیا چه اِدا گَلّێنیت.

² مهلوکا بگوَش که هرکَس، هر مردێن و هر جنێن وتی همساهگئے کِرّا چه نُگره و تِلاها اَڈّ بوتگێن سامان بلۆٹیت.“

³ هُداوندا مِسریانی نِزَر په وتی مهلوکا نێک کرت. موسّائے جند هم مِسرئے مُلکا پِرئونئے هِزمتکار و مردمانی چمّان سکّێن مزنێن مردمے بوت.

⁴ موسّایا گوَشت: ”هُداوندَ گوَشیت: ’من شپئے نێما درَ کایان و سجّهێن مِسرا گَردان.

⁵ بادشاهی تَهتا نِشتگێن پِرئونئے ائولی چُکّا بگر تان جِنتِرئے سرا نِشتگێن مۆلدێئے ائولی چُکّا، مِسرا سجّهێن ائولی مَردێن‌چُکَّ مِرنت. سجّهێن مال و دَلوَتانی ائولی نَرێن چُکّ هم مِرنت.

⁶ سَرجمێن مِسرا اَنچێن مزنێن گرێوگ و زاریے چِستَ بیت که نه پێسرا بوتگ و نه دێمترا بیت،

⁷ بله بنی اِسراییلئے سرا کُچِکّے هم نئوَکّیت، نه مردمێئے سرا و نه دَلوَتێئے سَرا.‘ گڑا شما زانێت که هُداوند اِسراییل و مِسرئے نیاما پرک و پێرَ کنت.

⁸ تئیی اے سجّهێن هِزمتکار منِ موسّائے کرّا کاینت و کۆنڈانَ کپنت و گوَشنت: ’در آ، تئیی جند گۆن هما سجّهێن مردمان که تئیی رَندگیر اَنت.‘ گڑا من چه اے مُلکا درَ کایان و رئوان.“ نون موسّا زهرا زهر چه پِرئونئے کرّا در آتک و شت.

⁹ هُداوندا گۆن موسّایا گوَشت: ”پِرئون شمئے هبران گۆشَ نداریت. پمێشکا مِسرا منِ هُداوندئے مۆجزه گێشترَ بنت.“

¹⁰ موسّا و هارونا پِرئونئے دێما اے سجّهێن مۆجزه پێش داشتنت، بله هُداوندا پِرئونئے دل سِنگ کرت و پِرئونا اِسراییلی چه وتی مُلکا رئوگا نه‌اِشتنت.