JEMIS 1 - Havai Niu Testamen

¹ Ineu Jemis a tangaloi tabanagi noi God ko a Huqe Jisas Kraes. Nan hora na noku leoi tabetabe lawera duvigi hangavulu domwagi gairue ram toga lategi doluegi na ureure.

A ladohogo ko a mataisao

² Retueku, igimiu nen havuhevu, hate huri tare ve a nomiu rongesi lo gineu esi u sao.

³ A vevenagi igimiu neu ilo huri ve nein labe siaga huri ba i God vin vei lehi na nomiu ladohogo.

⁴ I gimiu nein vei leo ve nein labe siaga lo gineu doluegi, hi a domimiu.

⁵ Tare ve ihine tea dein gimiu a hora mata he tatarise tea igimiu nein nevu dein God, ko i ingeie vin bete lawe gimiu doluegi.

⁶ A tangaloi mo lado gairue mo mwere na navo lolo tahi. A langi mo here mo tulie lategi.

^7-8 Tare ve iniko a tangaloi mwerehi, a domimu he toga tea, a tangaloi hi vin he lando rarai tea ve i God vin bete na gineu lawea vohogi.

A mahogiana ko a mwerai hako gineu

⁹ Tare vea tangaloi tabanagi noi God tea ram mahogi, ingere rain sagera huri i God mo lado tatabegi hageliu hurire.

¹⁰ Tare ve irahine hi rau mwerai homu rain salasala mwerena vire talolo labute.

¹¹ A mwamwavi aho mo vaire ram matanunu ko a nora gareana mo salasala. A mwerai homu nora tabanagi rain salasala lo matahalagi mwerehi.

A vailehi ko a kali lehi

¹² Tare ve a nomiu ladohogo mo wiriwiri nein labe siaga huri God vin vei gareagi gimiu. Ingeie vin tawe gimiu gina mwasoana roroa, mwerehi u tawe rahine doluegi hi rau tabea.

¹³ Lune a kalikeli mo kali lehi gimiu nein mese tau na bugugi lui God. A gineu esi vin he kali lei God tea, ko ingeie hate vui esi lune god vin he kali na tangaloi wegineu tea.

¹⁴ Siu a noda taratarani esi siboda mo kali lehe gide ngehi mo revei gide tavano ko mo tau gide lolo garo kaukeu.

¹⁵ Lune a taratarani esi mo tavuigi lolo Loloda mo mauri, siu a galegaleasi mo vora denie. Lune a galegaleasi mo lawua mo matue mo lai gide sulo mateana.

¹⁶ Retueku, igimiu ne mese rera.

¹⁷ A hogohogo garea ko u mwasara mo himei den Mama hi u teu na leleo doluegi lo mahava. A aho mo dori, nge i God he dori lai tea. Ingeie vin he dori lai tea lo matahalagi mwerehi a malumelu biti hi mo dori.

¹⁸ Siu i God mo tarani gide ve dain voragi nona muei sinobu ko ingeie mobei lei na mwasoana garaqa lawe gide gina nona leohogo.

Rongo ko tabanagi

¹⁹ Retueku, vei gimiu nen siseri huri ve nein rorongtagi ko nein mese laqalaqa siseri sige nem mese lolo meromero siseri.

²⁰ Tare ve i gimiu nem meromero, nein he vailei na gineu garea tea ngerehi i God mo tarani ve nein vei.

²¹ Siu igimiu nein siregi nein mese vai na gineu ngehi a tanoi maemae lune a gineu esi ingere hi ram eno tau mosigei, nge igimiu nen lado wuweu ko nen lai vurugegi na leo ngehi i God u teu hivo lolo lolomiu huri vin vagamwasoi gimiu.

²² Neu vei na gineu ingere hi a leoi God mo veve lawe gimiu, ne mese rorongtaginie hogosie. Lune nem vai mwerehi nem vagalengagi gimiu sibomiu hogosie.

^23-24 Lune nem rongo na leo garea nehe tabera tea, ngehi neu mwerena tangaloi hi ram lehire sibora lolo gagasi siseri, lune ram vano rau geluvegi ve rau mwere hilogo.

²⁵ Nge igimiu nen mese galuvegi na tamwata garea hi u riqe gimiu dena garovau. God vin vei gareagi gimiu lo gineu doluegi hi nem vaire tare ve nem rorongtagi ko nem tabe, nge nen mese rongo ko nem galuvegi.

²⁶ Nge a tangaloi ngerehi rau leo vurugegi na leoi tamwata mo veve, ko rahe rorongtagi na leoi tamwata tea hogosie, i God vin veigareaginire.

²⁷ Siu nge ngaha a matahalai ladohogo ngehi u mwasara ko u renige lo nagoi God a mama, nein leohuri na maresu madue ko a vavine madue. Lune ingere ram tarani garagaragi na gineu.