2 TIMOTI 1 - Havai Niu Testamen

¹ Den Bol, a gai hora noi Jisas Kraes gina taraniana noi God. I God u horau ve nain veve huri na mwasoana ngehi mo eno lui Jisas Kraes.

I Bol mo vagamwamwavigi na domi timoti

² Lawego Timoti, iniko a maresu garea mwere huri ve iniko i netuku siboku. A hogogi, a hahagavi ko a tamwata lawego dein God a mama ko i Jisas Kraes a noda Huqe.

³ Nam veve gareagi God mwerehi lune gesegi nam lado haqe na henamu lolo noku tataro, nau tabana lawea, nau vei na havagineu hi nau ilo ve u garea mwerehi i retubuku tuei rau vei.

⁴ Nam lado bibie hi gom ngara hurieu, nam tarani garagaragi ve nan lehigo siu huri neu nan horo gina havuhevu.

⁵ Nam lado bibi na nom lado hogo siaga hi a hogo. A lado hogo siaga hi tomuegi u toga mei tubumiu hi Lois ko mei retahimu Junes, ko nam ilo ve iniko siserigi ngaha gom toga mena lado hogo hi u tatarise.

⁶ Giniehi, nam vevea lawego ve gon vai na gineu gina nom tabeana hi God u betea lawego lune hi nam tau na limeku lo qatumu.

⁷ I God he bete na Vui tea lawe gide huri ve vin vei gide dain matagu nge u betei na Vui ngehi a huireana lawe gide ko a dom tabetabe ngehi mo gide dam tatarise ve dain labe goro lai na noda taraniana siboda.

⁸ Siu igimiu nein mese maemae ve nein veve lawe na sinobu huri na noda Huqe Jisas Kraes, ko nein mese maemaegieu huri nam toga vau huri na Huqe. Nge nein rongo gagarasi meieu huri na Roro Garea. I God u betei na huireana lawe gide ve dain veie hi.

⁹ I God u vagamwasoi gide ko mo vai gide dam voragi nona sinobu Gogona. A vevenagi hatie huri na gineu vei gide dau vei siboda nge a vevenagi a nona hogogi ko a nona domiana sibona. A hogogi ngehi u betea lawe gide lo henai Jisas Kraes siu a tarogi mobei tevuigi.

¹⁰ Nge siserigi ngaha u haharaginie lawe gide lo vonaiana noi noda vagamwasoi Jisas Kraes. Ingeie u vei vohogi na mateana, ko gina Roro Garea ingeie u haharagi na turegi ngehi dain haqe na mwasoana ngehi a tangaloi vin he vai vohoginie lai tea.

¹¹ I God u leo waheau ve nain waregi sere na Roro Garea ko nain voragi nona gaihora ko a huhui.

¹² Ineu nam rong-gagarasi siserigi ngaha a vevenagi nau waregi sere na Roro Garea, nge ineu nahe maemae tea, a vevenagi nam ilo Jisas Kraes, siserigi ngaha ingeie gatagale hogosie hi nau lado hogoginie. Ko ineu nam ilo huri ve ingeie vin leo huri vurugegi na havagineu hi nge u teue vonai lo limeku vin dadari lo rani hi ingeie vin vevegi na tangaloi lune.

¹³ Nein huri na halai huhui ngehi a hogo hi neu rongoe denieu lo nomiu lado hogo siaga ko a nomiu dom tabetabe ngehi mo eno lui Jisas Kraes.

¹⁴ Igimiu nein kokogoro na hogo ngehi u betea lawe gimiu, nein kokogoroe gina Vui Gogona mo toga lolo loloda.

¹⁵ Gu ilo huri ve ingere doluegi talo vanue lawua hi Esia rau siregi eu beno, a tangaloi gairue hi i Vukelas ko i Hemokenes, ingere vage ru siregieu.

¹⁶ Ineu nam tataro huri ve a Huqe na haharagi na nona hahagavi lawe na duvi Onesivoras huri ingeie u buluieu ko he maemae tea huri nam toga vau lo valei veuveu.

¹⁷ Lune u vonai mo dadari Rom, tauvuigi mo hikesieu vavano mo haqeau.

¹⁸ Nam tataro huri ve a Huqe na sireginie na haqe na hahagavi ngehi mo vonai dena Huqe lo rani ngehi ingeie vin vevegi na tangaloi. Gu ilo na turegi gai vihe hi u tino mo buluieu lo togagi venue lawua Evesas.