Rut 1 - Hanunuu

Dinamayan ni Rut si Nuymi

^1-2 Kaybi pag udas balaw waya manga hari ti manugpanguna sa Israil, nagkaimaw lun-us inda pag daga. Nakan si Ilimilik taga Bitlihim sakup Huda nag-atag sa Muab kaibahan kay asawa hanggan kay duwa niya ka anak lalaki hampay ati pag mangulian. Kay ngaran niya asawa si Nuymi ag kay duwa ka anak sida ni Mahalun ni Kilyun. Sida ginan sa lahi ni Iprata. Habang ati sida sa Muab,

³ namatay si Ilimilik, nakan si Nuymi ag kay duwa ka anak ti natayak.

⁴ Nangasawa Muabita kay duwa ka anak si Mahalun ag si Kilyun. Kay ngaran kay usa si Urpa kay usa waydi si Rut. Pagkalawuy manga sampulu ka timpu,

⁵ namatay sida ni Mahalun ni Kilyun, nakan si Nuymi wadi ti natayak.

⁶ Pagka nabaritaan ni Nuymi kuntay pinapaladan Panginuun kay nasakupan sa panab-anan pagpakaun sa kanda mayad pag-ani, nag-alistu siya hanggan kay manga umagad niya hampay bumalik sa Huda.

⁷ Habang maglakaw yi sida pabalik sa Huda,

⁸ magkun si Nuymi sa kay duwa ka umagad, “Pagbalik yi lang kamu sa kanyu ina. Papaladan mana kamu Panginuun sa kanyu mayad pag nag-asikasu sa namatay niyu asawa ag sa kangku.

⁹ Ag papaladan mana kamu Panginuun makaasawa maan kamu hampay magkaimaw mahusay pag kahamtangan sa kanyu bag-u ulian.” Bag-u inarkan sida ni Nuymi. Nanlumi sida matnug

¹⁰ ag magkun sa kanya, “Manguyug kami sa pagbalik nimu sa kanmu banwa.”

^11-12 Dapat magkun si Nuymi, “Pag-uli yi kamu manga anak. Hayga manguyug waya kamu sa kangku? Kanyu aw isip makaasawa waya aku ag manganak lalaki hampay maasawa niyu? Unman yi mahimu dahil aku gurangun yi. Dapat nangus makaasawa aku taynguna pag yabi ag manganak waya,

¹³ alagdun aw waya niyu dumaka? Unman aw kamu mangasawa dahil sa kanda? Balaw mahimu manga anak. Kay tutuu, maruku gid kang nalakawan balaw di ga kanyu, dahil pinakurianan aku Panginuun.”

¹⁴ Nanlumi maan sida matnug. Bag-u inarkan ni Urpa kay manugang ag nuli, dapat si Rut napatayak di kaibahan ni Nuymi.

¹⁵ Magkun si Nuymi, “Binmalik yi kanmu bilas sa kay manga kasimanwa ag sa kay diyus, nakan pagkuyug yi waydi kawu sa kanya.”

¹⁶ Dapat sinmagut si Rut, “Danga aku niyu pagpilita tayakan kawu, dahil nu naan tabug kawu, atag diman aku, ag nu naan kawu pag muli, ati diman aku pag muli. Ti manga kasimanwa nimu bumaliw diman kasimanwa niku, ti Diyus nimu bumaliw diman Diyus niku.

¹⁷ Nu naan kawu pag mamatay, ati diman aku pag mamatay ag ilubung. Parusahan mana aku Panginuun mabuyat nu pablag aku sa kanmu, purya lang nu ti kamatayan yi ti bumulag sa kanta duwa.”

¹⁸ Pagka nakitan ni Nuymi magkaibug gid si Rut kumuyug sa kanya, udyi lang nag-ingay siya.

¹⁹ Nakan nagparargu yi lang sida duwa sa kanda lakaw tugka sa naka aput sida sa Bitlihim. Ti tanan tawu nadulaw sa kanda pagras-ug. Magkun ti manga babayi, “Si Nuymi aw inda?”

²⁰ Magkun si Nuymi sa kanda. “Danga yi aku pagtawaga Nuymi, nu unman Mara, dahil pinapait Makamaskihan Diyus kang buhi.

²¹ Pag-ighit niku sitay ginan atay yi sa kangku ti tanan, dapat ibinalik aku Panginuun unman gid may imaw. Nakan danga yi niyu aku pagtawaga Nuymi, dahil pinakurianan aku Panginuun Makamaskihan.”

²² Mag-umpisa di waya ti aranihan sibada kay rinmas-ug ni Nuymi sa Bitlihim kaibahan kay umagad si Rut taga Muab.