Pilipus 1 - Hanunuu

¹ Inda ti may surat kami ni Pablu ni Timutiyu, kay manga panawuhun ni Kiristu Hisus, tabug sa tanan manga banal, sa manga magpakiusa sa kan Kiristu Hisus mag-uli asan sa banwa Pilipus hanggan sa manga manug-asiwa iglisya hanggan kanda manga kaawat.

² Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Kay Darangin ni Pablu sa Iglisya sa Taga Pilipus

³ Magpasalamat aku sa kang Diyus sa kada magkaisipan niku kamu.

⁴ Sa kada aku magdarangin, pirmi masulung aku magdarangin tungkul sa kanyu tanan.

⁵ Dahil inawatan niyu aku sa kang magpadakit Mayad pag Barita ginan waya sa kabag-u kanyu nagsarig sa kan Kiristu hanggan taynguna tugka.

⁶ Alam niku pihu gid tapusun Diyus hanggan sa udwaya kaudasan pagbalik ni Kiristu Hisus ti mayad pag tarabahu kay inumpisahan sa kanyu.

⁷ Magbaya aku sa kanyu, pirmi diman kang pag-isipun sa kang tagipusuun. Nakan balaw salan kang pag-isipun katida sa kanyu tanan, kabay kamu tanan minsan sa kangku may kabahagi sa inda pag marinu pag katungkulan kay ipinakaun Diyus sa kangku una taynguna kang sa pirisuhan hanggan sa kang magtultul sa Mayad pag Barita sa atubangan husgadu.

⁸ Alam di Diyus tutuu kang pagsabihun nu kabitay kang maghanap sa kanyu tanan parihu ga kan Kiristu Hisus diman magmahal sa kanyu.

⁹ Inda ngani kang darangin sa kanyu hampay kanyu pagmahal lalu waya dumaka, hampay mabut-anin kamu ag dumunung sa katutuuhanan Diyus.

¹⁰ Nu katida madunung kamu magpili sa pinakamayad. Bag-u kamu manga malumpiyu yi ag unman may ikasabi sa kaudasan aban nu rumas-ug si Kiristu.

¹¹ Nu katunda kamu, mag-akitan sa kanyu buhi ti lunsay marinu gid pag ugali dahil sa kay mayad buwat ni Hisu-Kiristu sa kanyu, sa lubus ikadayaw sa Diyus.

Si Kiristu gid Kanta Tutuu pag Buhi

¹² Gustu niku mana pagmaalaman niyu, manga patar-ari, kuntay ginan sa manga nangyari sa kangku balaw naampara ti Mayad pag Barita. Bagkus ngap lalu nilantag.

¹³ Dahil naalaman manga guwardiya sa balay ni Pangulu Hari hanggan manga iba sitay kuntay aku napirisu dahil sa kang magsunud sa kan Kiristu.

¹⁴ Ti mayamu pag manga patar-ari lalu matutum kanda naisipan sa Panginuun dahil sa kang sa pirisuhan. Lalu waya ngap udyi sida magkadala magtudlu Bagaw Diyus.

¹⁵ Tutuu may manga tawu pag-ibarita nida si Kiristu dahil sa kanda maghirak hanggan mag-away. Dapat ti iba ginan ngap sa mayad pag naisipan kanda pag-ibarita si Kiristu.

¹⁶ May pagmahal sida sa kangku, nakan pag-ibarita nida si Kiristu, dahil magkaalaman nida aku pinatukahan Diyus katungkulan sa pagtudlu sa Mayad pag Barita.

¹⁷ Una ti manga maghirak magtudlu diman waydi tungkul sa kan Kiristu, dapat unman buu kanda naisipan sa Panginuun. Kanda turunu sa ikaayad lang nida sadili kahamtangan ag gustu ngap nida pakurian waya aku sitay sa pirisuhan.

¹⁸ Hayga lugud? Magbaya diman aku basta pag-itudlu si Kiristu sa una hintay pag paraan, una sa tutuu una abi sa pabalhinguun. Pirmi magbaya aku,

¹⁹ dahil alam niku pihu di gid aku palpasan aban ginan sa pirisuhan, dahil aku kanyu pag-idarangin ag dahil sa kang-ud pag awat ginan sa Ispiritu ni Hisu-Kiristu.

²⁰ Daka gid kang kagustuhan ag may pag-asa aku dayu gid aku umalinlangan. Bagkus pirmi matutum kang naisipan lalu waya ngap inmamat taynguna agud sa mamatay sa mabuhi man hampay nu makitan aku manga iba, lalu waya dayawun nida si Kiristu.

²¹ Dahil nu para sa kangku si Kiristu kang tutuu pag buhi ag may pakinabang ngap nu aku mamatay.

²² Dapat abi nu udwaya waydi mamatay aku, mamakibudlay waya aku sa mayad pag buruwatun. Udwaya niku magkaalaman nu hintay kang magustuhan.

²³ Aku napil-it yi sa duwa ka bagay. Kang gustu aku mamatay hampay kaibahan yi ni Kiristu, dahil pihu gid imaw ti pinakamayad.

²⁴ Dapat ay nu aku dugay waya kang buhi sitay sa babaw daga, tunda sa ikaayad waya niyu.

²⁵ Alam yi niku pihu madugay waya aku sitay kaibahan niyu tanan hampay kamu kang awatan sa lalu kamu rumig-un ag makabaya sa kanyu pagsarig sa kan Kiristu.

²⁶ Nu katunda nu aku bumalik maan sa kanyu, lalu waya pahalagaan niyu aku angay sa kanyu pakiusa sa kan Kiristu Hisus.

²⁷ Nakan ngani kailangan gid kamu pag-ugali angay sa Mayad pag Barita tungkul sa kan Kiristu. Nu katunda una aku makaasan ag makitan niku kamu, una unman, maalaman diman niku mirinsan di kanyu turunu ag mag-arawatan kamu hampay maingatan ti kanta pagsarigan Mayad pag Barita una may manga kalaban.

²⁸ Danga kamu madiklahan sa manga mag-unuunu sa kanyu. Pirmi pagmatutum kanyu naisipan. Kanyu matutum pag naisipan imaw ti malinaw pag puruyba kuntay sida pihu aban talu. Kamu bay kay iribri Diyus.

²⁹ Pinili diman kamu ag pinakan-an karampatan hampay magsirbi sa kan Kiristu, kay ibug sabihun balaw lang tugka sa magsarig sa kan Kiristu nu unman hanggan sa mag-agwanta para sa kanya.

³⁰ Kamu hanggan aku minsan diman kita sa inda pag labanan kanyu nakitan kaybi sa kangku ag kanyu naalaman kang nalakawan taynguna.