Yelemi 1 - Vaajtswv Txujlug 2000

¹ Phoo ntawv nuav yog Hilekiyas tug tub Yelemis tej lug. Yelemis yog ib tug ntawm cov povthawj kws nyob huv lub nroog Anathaus huv Npeenyamees cheebtsaam aav.

² Thaus Amoos tug tub Yauxiyas ua vaajntxwv kaav tebchaws Yudas tau kaum peb xyoos, tug TSWV txawm lug has rua Yelemis,

³ hab thaus Yehauyakees kws yog Yauxiyas tug tub ua vaajntxwv kaav tebchaws, tug TSWV rov has rua Yelemis ib zag ntxiv. Tom qaab ntawd, tug TSWV rov has ntau zag rua Yelemis moog txug thaus kws Yauxiyas tug tub Xedekiyas ua vaajntxwv kaav tebchaws tau kaum ib xyoos. Ces xyoo kaum ib lub tsib hlis ntuj, luas txawm tuaj nteg cov tuabneeg kws nyob huv lub nroog Yeluxalees coj moog lawm.

Vaajtswv Hu Yelemis

⁴ Tug TSWV has rua kuv tas,

⁵ “Thaus koj tseem tsi tau xeeb rua huv koj nam plaab, kuv tub xaiv koj, hab thaus tsi tau yug koj, kuv tub tsaa koj ua tug cev Vaajtswv lug rua txhua tsaav tuabneeg lawm.”

⁶ Kuv teb has tas, “Tug TSWV kws kaav ib puas tsaav yaam, kuv tsi paub yuav qha le caag, rua qhov kuv tseem hluas.”

⁷ Tug TSWV has rua kuv tas, “Koj tsi xob has tas koj tseem hluas, tabsis koj ca le moog rua huv cov tuabneeg kws kuv khaiv koj moog hab qha txhua yaam kws kuv kuas koj qha rua puab.

⁸ Koj tsi xob ntshai cov tuabneeg ntawd, rua qhov kuv yuav nrug nraim koj hab tsomkwm koj. Kuv yog tug TSWV kws has le ntawd.”

⁹ Tug TSWV txawm cev teg kov kuv qhovncauj hab has rua kuv tas, “Koj noog kuv has, kuv muab kuv tej lug tso rua huv koj qhovncauj.

¹⁰ Nub nua kuv tsaa koj ua tug muaj fwjchim kaav txhua tsaav tuabneeg hab txhua lub tebchaws. Koj muaj peevxwm muab rhu tawm hab muab rhuav, ua kuas puamtsuaj hab muab povtseg, tsim tsaa hab muab cog.”

Ob Zaaj Ywgtoog

¹¹ Tug TSWV nug kuv has tas, “Yelemis, koj pum dlaabtsi?” Kuv teb has tas, “Kuv pum ib tug ceg txiv dluaj.”

¹² Tug TSWV has rua kuv tas, “Yog lawm! Kuv taabtom saib ntsoov kuas muaj lawv le kuv tej lug.”

¹³ Tug TSWV rov has rua kuv tas, “Koj pum dlaabtsi hab?” Kuv teb has tas, “Kuv pum luas rhaub ib laujkaub dlej npau dlug dlaam nyob saab qaumteb hab lub ncauj qaij rua saab nraag nuav.”

¹⁴ Tug TSWV has rua kuv tas, “Yuav muaj kev puamtsuaj saab qaumteb tuaj raug cov tuabneeg kws nyob huv lub tebchaws nuav,

¹⁵ rua qhov kuv taabtom hu kuas txhua tsaav tuabneeg kws nyob saab qaumteb tuaj. Puab cov vaajntxwv yuav teeb puab tej zwmtxwv rua ntawm lub nroog Yeluxalees tej roojvaag, puagncig tug ntsaa yeej hab puagncig cov Yudas tej nroog.

¹⁶ Kuv yuav rau txim rua kuv tsaav tuabneeg, rua qhov puab ua txhum hab tso kuv tseg. Puab moog hlawv khoom fij rua luas tej vaajtswv hab puab mlom rua puab pe.

¹⁷ Yelemis, koj ca le moog qha txhua yaam kws kuv kuas koj qha rua puab. Koj tsi xob ntshai puab. Yog nwgnuav koj ntshai thaus koj moog nrug puab nyob, koj yimfuab yuav ntshai heev dlua.

^18-19 Yelemis, koj ca le noog kuv has, tej tuabneeg kws nyob huv lub tebchaws nuav, tsi has cov Yudas cov vaajntxwv, cov numtswv, cov povthawj hab cov pejxeem suavdlawg yuav tawmtsaam koj. Tabsis nub nua kuv yuav paab kuas koj muaj zug kovyeej puab; koj yuav zoo ib yaam le lub nroog kws muaj ntsaa yeej thaiv khov kho, tawv ib yaam le tug ncej hlau hab tug ntsaa yeej tooj. Kuv yuav nrug nraim koj hab tsomkwm koj, puab yuav tsi yeej koj. Kuv yog tug TSWV kws has le ntawd.”