Nahus 1 - Vaajtswv Txujlug 2000

¹ Ntawm nuav yog cov lug kws has txug lub nroog Nineves, hab yog ib zaaj ywgtoog kws Nahus tau pum, Nahus nyob huv lub nroog Elekauses.

Tug TSWV Chim rua Lub Nroog Nineves

² Tug TSWV kws yog Vaajtswv khib hab tsi zaam txim rua leejtwg le; nwg rau txim rua cov tuabneeg kws tawmtsaam nwg. nwg ua pauj rua nwg cov yeebncuab vim nwg txujkev chim.

³ Tug TSWV yeej tsi chim sai, tabsis nwg muaj fwjchim heev, hab nwg tsi ca tug tuabneeg txhum dlim dlawb tsi raug txav txim. Tug TSWV moog txug qhov twg muaj naag xub naag cua txug qhov ntawd; muaj fuab laum nkaus ib yaam le tej paa aav ntawm tug TSWV txhais kutaw!

⁴ Nwg saamfwm rua havtxwv, havtxwv ca le qhuav lawm! Nwg ua rua tej dlej nqhuab qhuav taag huv tuabsi; tej taj nraag huv tebchaws Npasaas qhuav nkig nkuav, lub Roob Kalemees qhuav ua aav lab ploog hab tej paaj ntoos kws nyob peg Lenpanoos ntsws taag.

⁵ Tej hauv roob sab yuav qeeg ntawm tug TSWV lub xubndlag; tej ncov roob yuav yaaj taag ntawm nwg hauv ntej. Thaus tug TSWV tshwm lug, lub nplajteb ua zug koog. Lub nplajteb hab tej tuabneeg tshee laim txag.

⁶ Thaus twg tug TSWV chim lawm leejtwg txhaj yuav muaj sa nyob? Leejtwg txhaj yuav dlim tau ntawm nwg txujkev npautawg kws txaus ntshai heev? Nwg txujkev chim kws kub ib yaam le suavtawg phwj tuaj, tej pobzeb los yuav tawg ua moov taag taabmeeg nwg.

⁷ Tug TSWV yog tug kws zoo; nwg tsomkwm nwg tsaav tuabneeg thaus muaj kev kub ntxhuv; nwg cawm cov tuabneeg kws tig rov qaab lug cuag nwg.

⁸ Nwg rhuav tej yeebncuab kuas puamtsuaj taag ib yaam le dlej fuam lug tshoob tej moov aav; nwg muab cov tuabneeg kws tawmtsaam nwg xaa moog rua txujkev tuag.

⁹ Ua le caag mej txhaj ntxeev sab tawmtsaam tug TSWV? nwg yuav rhuav kuas mej puamtsuaj taag; Tsi muaj leejtwg tawmtsaam yeej nwg ib zag le.

¹⁰ Mej zoo ib yaam le tej xuavpaug kws sis qhab, hab tej quavnyaab qhuav kws yuav raug suavtawg kub.

¹¹ Tug tuabneeg kws tuav tswvyim ua phem ua qas, hab ntxeev sab tawmtsaam tug TSWV, tub yog tawm huv lub nroog Nineves tuaj ntaag los sas!

¹² Tug TSWV has rua nwg tsaav tuabneeg Yixalayees has tas, “Txawm yog cov Axilias muaj zug hab coob heev los puab yuav raug puamtsuaj hab pluj taag moog. Kuv tsaav tuabneeg, kuv ua kuas mej raug kev txomnyem ntaag, tabsis kuv yuav tsi ua ib zag ntxiv lawm.

¹³ Nwgnuav kuv yuav txu cov Axilias lub fwjchim kws quab yuam mej kuas xaus moog, hab muab puab tej saw hlau kws khi mej txav kuas tu taag.”

¹⁴ Tej nuav yog tej lug kws tug TSWV has txug cov Axilias has tas, “Puab yuav tsi muaj xeebntxwv lug ris puab lub npe moog ntxiv lawm. Kuv yuav muab tej mlom huv puab tej vaajtswv tej tsev rhuav kuas puamtsuaj taag. Kuv taabtom npaaj ib lub qhov ntxaa rua cov Axilias; puab tsi tsimnyog ua tuabneeg nyob lawm.”

¹⁵ Saib maj, muaj ib tug xaa xuv taabtom taug kev sau roob coj xuv zoo tuaj lawm! Nwg tuaj tshaajtawm txujkev muaj yeej! Cov Yudas, mej ca le npaaj ua kevcai noj haus zoo sab hab muab tej khoom kws mej tau coglug tseg lawm fij rua Vaajtswv. Cov tuabneeg sab phem yuav tsi tuaj tua mej lub tebchaws ntxiv le lawm. Puab tub raug puamtsuaj taag lawm!