Mathai 4 - Vaajtswv Txujlug 2000

Dlaab Ntxwgnyoog Sim Yexus Sab

¹ Tom qaab ntawd Vaaj Ntsujplig coj Yexus moog rua tom roob mojsaab qhua kuas Dlaab Ntxwgnyoog tau sim Yexus sab.

² Yexus nyob tod tau plaub caug nub plaub caug mo, nwg tsi tau noj ib yaam dlaabtsi le. Thaus dlhau lub sijhawm ntawd lawm nwg tshaib plaab heev.

³ Dlaab Ntxwgnyoog lug has rua Yexus has tas, “Yog koj yog Vaajtswv tug Tub tag, koj ca le has kuas lub pobzeb nuav txa ua mov.”

⁴ Tabsis Yexus teb has tas, “Vaajtswv txujlug sau tseg has tas, ‘Tsi yog mov xwb txhaj cawm tau tuabneeg txujsa, tabsis yog Vaajtswv tej lug txhua lu txhaj cawm tau.’ ”

⁵ Tom qaab ntawd, dlaab Ntxwgnyoog txawm coj Yexus moog rua huv lub nroog Yeluxalees kws yog lub Nroog Dlawbhuv. Nwg coj Yexus moog rua sau lub Tuamtsev qhov chaw kws sab tshaaj plawg.

⁶ Nwg has rua Yexus has tas, “Yog koj yog Vaajtswv tug Tub tag, koj ca le dlha rua huv aav, rua qhov tub muaj lug sau tseg rua huv Vaajtswv txujlug has tas: ‘Vaajtswv yuav kuas nwg cov timtswv tsomkwm koj; puab ob txhais teg yuav fwj koj, hab yuav tsi pub koj ob txhais kutaw tsoo pobzeb le.’ ”

⁷ Yexus teb dlaab Ntxwgnyoog has tas, “Vaajtswv txujlug has tas, ‘Koj tsi xob sim tug Tswv kws yog koj tug Vaajtswv sab.’ ”

⁸ Tom qaab ntawd dlaab Ntxwgnyoog txawm coj Yexus moog rua sau ib lub roob sab sab hab ua rua Yexus pum taagnrho tej tebchaws huv qaab ntuj nuav hab pum tej kev vaammeej huv tej tebchaws ntawd.

⁹ Dlaab Ntxwgnyoog has rua Yexus has tas, “Yog koj txhus caug pe kuv, kuv yuav muab txhua yaam nuav rua koj.”

¹⁰ Yexus has rua dlaab Ntxwgnyoog has tas, “Ntxwgnyoog, koj ca le tsiv moog! Vaajtswv txujlug has tas, ‘Mej yuavtsum pehawm tug Tswv kws yog mej tug Vaajtswv tuab leeg hab ua nwg teg num xwb!’ ”

¹¹ Ces dlaab Ntxwgnyoog txawm ncaim Yexus lawm. Tom qaab ntawd muaj ib cov timtswv ceebtsheej lug tu Yexus.

Yexus Pib Ua Num huv Kalilais

¹² Thaus Yexus nov has tas, luas nteg Yauhaas coj moog kaw rua huv tsev lojcuj lawm, ces Yexus txawm moog rua peg Kalilais.

¹³ Yexus tsi moog nyob huv lub nroog Naxales, tabsis nwg moog nyob huv lub nroog Kapena-us, ntawm ntug dlej havtxwv Kalilais kws yog xeem Xenpuloos hab xeem Nathalis cheebtsaam aav.

¹⁴ Tej nuav muaj kuas tav lawv le Yaxayas kws yog tug cev Vaajtswv lug tau qha tseg has tas,

¹⁵ “Xeem Xenpuloos cheebtsaam aav hab xeem Nathalis cheebtsaam aav kws nyob saab ntug dlej Yauladees tim u, ntawm txujkev kws moog rua havtxwv huv lub xeev Kalilais kws lwm Tsaav Tuabneeg nyob!

¹⁶ Cov tuabneeg kws nyob qhov tsaus ntuj yuav pum kev kaaj nrig. Hab txujkev kaaj ntawd yuav ci rua cov tuabneeg kws nyob huv qhov tsaus ntuj kws yog txujkev tuag.”

¹⁷ Txij thaus ntawd lug Yexus txawm pib qha rua suavdlawg has tas: “Mej ca le tso mej tej kev txhum tseg, rua qhov Ntuj Ceebtsheej tub lug ze lawm!”

Yexus Hu Plaub Leeg Lug Ua Thwjtim

¹⁸ Thaus Yexus taabtom taug ntug dlej Havtxwv Kalilais, nwg pum ob kwvtij kws yog, Ximoos (kws hu ua Petus) hab nwg tug kwv Aadales, obtug taabtom muab vaag ntaus ntseg huv havtxwv.

¹⁹ Yexus has rua obtug tas, “Meb ca le nrug kuv moog, kuv yuav qha kuas meb paub moog nrhav tuabneeg.”.

²⁰ Taamsim ntawd obtug txawm tso plhuav obtug ob lub vaag tseg hab nrug Yexus moog.

²¹ Yexus moog tom ntej mivntsiv, Yexus pum dlua ob kwvtij kws yog Yakaunpaus hab Yauhaas, obtug yog Xenpedais tub. Obtug taabtom nrug obtug txiv Xenpedais ntxiv vaag huv nkoj, Yexus txawm hu obtug nrug Yexus moog.

²² Taamsim ntawd obtug txawm tso lub nkoj hab obtug txiv tseg, hab obtug nrug Yexus moog.

Yexus Qhuab Qha hab Khu Mob

²³ Yexus moog thoob plawg huv lub xeev Kalilais, nwg qhuab qha huv tej tsev saablaaj, hab qha Txujmoo Zoo kws has txug Vaajtswv lub Tebchaws. Hab Yexus khu cov tuabneeg muaj mob tsi has cov tuabneeg mob yaam mob twg los nwg khu zoo huv tuabsi.

²⁴ Yexus lub moo rov nchaa moog thoob plawg tebchaws Xilias, ces suavdlawg txawm coj tej tuabneeg muaj mob, tsi has tug mob yaam mob twg los tuaj cuag Yexus, tej tuabneeg raug dlaab, tej tuabneeg qaug dlaabpeg, hab tej tuabneeg tuag teg tuag taw los Yexus khu txhua tug zoo huv tuabsi.

²⁵ Muaj tuabneeg coob coob huv xeev Kalilais, huv lub nroog Dekapaulis, huv lub nroog Yeluxalees, huv cov Yudais lub tebchaws hab huv lub tebchaws kws nyob saab ntug dlej Yauladees tim u tuaj nrug Yexus moog.