Mathai 2 - Vaajtswv Txujlug 2000

Cov Tuabneeg Kws Txawj Saib Nubqub Tuaj Hawm tug Mivtub

¹ Yexus yug huv lub nroog Npelehees kws nyob huv cov Yudais lub tebchaws. Lub sijhawm ntawd Helauj ua vaajntxwv kaav tebchaws. Tom qaab ntawd tsi ntev muaj cov tuabneeg kws txawj saib nubqub ob peb leeg tuaj saab nubtuaj tuaj txug huv lub nroog Yeluxalees.

² Puab nug has tas, “Tug mivtub kws yuav ua cov Yudais tug vaajntxwv nwg yug rua qhov twg? Peb pum nwg lub nubqub kws qha has tas, nwg yug lug lawm tawm tim saab nubtuaj tuaj, peb txhaj tuaj pehawm nwg.”

³ Thaus Vaajntxwv Helauj nov le ntawd, nwg hab tej tuabneeg kws nyob huv lub nroog Yeluxalees nyuaj sab heev.

⁴ Helauj txawm hu cov thawj ntawm cov povthawj, hab cov xwbfwb kws qha Vaajtswv txuj kevcai tuaj ua ke, Helauj nug puab has tas, “Tug Mexiyas yuav yug rua qhov twg?”

⁵ Puab teb has tas, “Nwg yuav yug huv lub nroog Npelehees kws nyob huv cov Yudais lub tebchaws. Tug kws cev Vaajtswv lug sau le nuav tseg has tas,

⁶ ‘Lub nroog Npelehees kws nyob huv xeev Yudas, Koj tsi yog lub nroog kws miv dlua tej nroog huv tebchaws Yudas; rua qhov yuav muaj ib tug thawjcoj lug yug huv koj. Nwg yuav coj kuv tsaav tuabneeg Yixalayees.’ ”

⁷ Ces Helauj txawm hu cov tuabneeg kws txawj saib nubqub lug cuag nwg tsi pub leejtwg paub. Helauj kuas puab qha nwg saib lub sijhawm twg puab pum lub nubqub ntawd tawm tuaj.

⁸ Tom qaab ntawd Helauj kuas puab moog nraag lub nroog Npelehees hab has rua puab tas, “Mej ca le moog nrhav tug mivtub ntawd; yog mej moog nrhav tau nwg lawm, mej rov qaab lug qha rua kuv, kuv yuav moog pehawm nwg hab.”

⁹ Thaus Helauj has le ntawd taag, ces puab txawm tawm moog lawm. Thaus puab taabtom taug kev moog puab pum lub nubqub kws puab xub pum tim saab nubtuaj. Lub nubqub ntawd coj puab kev moog hab lub nubqub ntawd moog nreg ncaaj ntawm qhov chaw kws tug mivtub ntawd nyob lawm sau.

¹⁰ Thaus Puab pum lub nubqub ntawd, puab zoo sab kawg le.

¹¹ Thaus puab moog rua huv tsev, puab pum tug mivtub hab Malis kws yog tug mivtub ntawd nam, puab txhus caug ndlua pehawm tug mivtub. Puab thau puab tej kub, tej tshuaj tsw qaab, hab tej roj tsw qaab huv puab cov naab lug pub rua tug mivtub.

¹² Mo ntawd puab ua npau suav pum Vaajtswv lug has rua puab tas, kuas puab moog lwm txujkev moog tsev, tsi xob rov moog qha rua Helauj.

Yauxej Coj tug Mivtub Moog nraag Tebchaws Iziv

¹³ Thaus cov tuabneeg txawj saib nubqub rov moog lawm, Yauxej ua npau suav pum tug Tswv ib tug timtswv lug has rua Yauxej has tas, “Koj ca le sawv hab coj tug mivtub hab nwg nam tsiv moog rua nraag tebchaws Iziv, hab nyob nraag moog txug thaus kws kuv kuas mej moog rua lwm qhov. Rua qhov Vaajntxwv Helauj taabtom nrhav tug mivtub nuav tua povtseg.”

¹⁴ Yauxej txawm sawv tseeg coj tug mivtub hab Malis maub tsiv moog rua nraag tebchaws Iziv.

¹⁵ Yauxej puab nyob nraag moog txug thaus Helauj tuag. Tej nuav muaj kuas tav lawv le tug cev Vaajtswv lug tau has tseg lawm has tas, “Kuv yuav hu kuv tug Tub tawm huv tebchaws Iziv lug.”

Tua Cov Mivnyuas Yau

¹⁶ Thaus Helauj paub has tas, cov tub txawg kws txawj saib nubqub dlaag nwg lawm, nwg chim heev. Nwg txawm khaiv tuabneeg moog rua huv lub nroog Npelehees hab tej zej zog kws nyob ibncig lub nroog ntawd, muab cov mivnyuas tub kws muaj noobnyoog ob xyoos rov huv tua povtseg huv tuabsi. Helauj ua le nuav kuas hum lub sijhawm kws cov tuabneeg txawj saib nubqub pum lub nubqub ntawd.

¹⁷ Tej nuav muaj kuas tav lawv le Yelemis kws yog tug cev Vaajtswv lug qha tseg has tas,

¹⁸ “Suavdlawg yuav nov suab quaj suab nyav huv lub nroog Lamas, yog lub suab quaj kws tu sab kawg le. Laxees yuav quaj ntsuag rua nwg tej mivnyuas; tsi muaj leejtwg yuav nplig tau nwg sab, rua qhov nwg cov mivnyuas tuag taag lawm.”

Yauxej hab Malis Rov nraag Tebchaws Iziv Lug

¹⁹ Tom qaab kws Helauj tuag lawm, Yauxej tseem nyob nraag tebchaws Iziv, Yauxej txawm ua npau suav pum tug Tswv ib tug timtswv lug has rua Yauxej has tas,

²⁰ “Koj ca le sawv tseeg coj tug mivtub hab nwg nam rov qaab moog rua peg tebchaws Yixalayees, rua qhov tug kws yuav tua tug mivtub nuav tub tuag lawm.”

²¹ Yauxej txawm sawv tseeg coj tug mivtub hab Malis rov qaab moog rua peg tebchaws Yixalayees.

²² Tabsis thaus Yauxej nov has tas, Akhilaus ua vaajntxwv kaav tebchaws Yudas hloov nwg txiv Helauj chaw lawm. Yauxej ntshai, Yauxej tsi kaam moog nyob qhov ntawd. Yauxej rov qaab ua npau suav pum Vaajtswv lug qha rua nwg, ces nwg txawm moog rua peg xeev Kalilais lawm.

²³ Nwg moog nyob huv ib lub nroog hu ua Naxales. Yauxej ua le nuav kuas muaj tav lawv le tej lug kws cov cev Vaajtswv lug tau qha tseg txug tug mivtub ntawd has tas, “Suavdlawg yuav hu nwg has tas nwg yog tuabneeg Naxales.”