Luv 3 - Vaajtswv Txujlug 2000

Luv Ntsib Npau-am ntawm Tshaav Ntaus Nplej

¹ Tau tsi ntev tom qaab ntawd, Na-aumis has rua Luv has tas, “Tsimnyog kuv yuavtsum nrhav ib tug quasyawg rua koj, koj txhaj yuav nrug luas muaj cuab muaj yig.

² Koj ncu ntsoov tug txivneej kws hu ua Npau-am kws koj moog nrug nwg cov ntxhais qhev khaws nplej, nwg yog peb ib tug kwvtij txheeb. Koj noog kuv has, mo nuav nwg yuav moog ntaus nplej.

³ Yog le ntawd, koj ca le ntxuav cev, muab roj tsw qaab lug pleev hab muab cev khaub dluag kws zoo tshaaj plawg lug naav. Ces koj moog lawm nraag nwg qhov chaw ntaus nplej, tabsis tsi xob pub nwg paub has tas koj nyob nraag moog txug thaus nwg noj hab haus taag lawm.

⁴ Koj ua tuab zoo saib, saib nwg pw qhov twg, hab thaus kws nwg tsaug zug lawm, koj ca le moog cem nwg dlaim choj hab moog pw tuabywv ntawm nwg kutaw. Nwg yuav qha rua koj has tas, koj yuavtsum ua le caag.”

⁵ Luv teb has tas, “Kuv yuav ua txhua yaam lawv le koj has.”

⁶ Yog le ntawd, Luv txhaj moog rua nraag lub tshaav nplej hab ua lawv le nwg nam puj has rua nwg.

⁷ Thaus kws Npau-am noj hab haus taag lawm. Nwg zoo sab heev. Nwg txawm moog rua ntawm pawg nplej hab pw tsaug zug lawm. Luv maam maam nkaag moog muab Npau-am dlaim choj cem hab pw tuabywv ntawm nwg kutaw.

⁸ Thaus ib taag mo Npau-am tsim lug hab tig cev, nwg pum ib tug quaspuj pw ntawm nwg kutaw ua rua nwg ceeb luj heev.

⁹ Npau-am nug has tas, “Koj yog leejtwg?” Luv teb has tas, “Kuv yog Luv, rua qhov koj txhaj yog kuv tug kwvtij kws txheeb ze hab tsimnyog koj yuav paab tau kuv. Yog le ntawd, thov koj ca le yuav kuv ua koj tug quaspuj.”

¹⁰ Npau-am teb has tas, “Thov tug TSWV foom koob moov rua koj, tej kws nwgnuav koj ua nuav tseem zoo tshaaj tej kws koj tau ua rua koj nam puj yaav taag lug lawm. Tsimnyog koj moog nrhav tej tug tub hluas, tsi has tug muaj lossis tug pluag yuav lawm, tabsis koj tsi ua le ntawd.

¹¹ Luv, nwgnuav koj tsi xob nyuaj sab, kuv yuav ua txhua yaam kws koj thov kuas kuv ua; rua qhov txhua tug tuabneeg kws nyob huv lub nroog nuav yeej paub has tas, koj yog ib tug quaspuj kws tsimtxaj heev.

¹² Muaj tseeb tag, kuv yeej yog koj ib tug kwvtij kws txheeb ze hab yeej tsimnyog kuv ua tug sau koj, tabsis tseem muaj dlua ib tug txivneej kws txheeb ze koj tshaaj kuv lawm hab.

¹³ Mo nuav koj ca le pw ntawm nuav, pigkig kaaj ntug peb maam nug saib nwg puas kaam yuav koj los tsi kaam. Yog nwg kaam mas yuav zoo heev; yog nwg tsi kaam, kuv thov coglug rua Vaajtswv tug kws muaj sa nyob has tas kuv yuav yuav koj. Mo nuav koj ca le pw ntawm nuav kuas kaaj ntug tsaiv.”

¹⁴ Yog le ntawd, Luv txhaj pw ntawm Npau-am kutaw, tabsis Luv tub sawv moog tsev thaus tsi tau kaaj ntug kuas tsi xob muaj tuabneeg pum nwg, rua qhov Npau-am tsi xaav kuas muaj tuabneeg paub has tas Luv tuaj pw ntawd le.

¹⁵ Npau-am has rua Luv tas, “Muab koj lub tsho luj lug nthuav pua ntawm nuav.” Luv txawm ua le ntawd, hab Npau-am yawm tau yuav laug rau sab nplej rua Luv hab paab tsaws rua sau nwg xubpwg, ces Luv txawm ris cov nplej ntawd lug tsev lawm.

¹⁶ Thaus Luv lug txug tsev, nwg nam puj nug has tas, “Miv nyaab, koj moog puas tau lug le caag.” Luv txhaj qha txhua yaam kws Npau-am tau has taag lawm rua nwg nam puj noog.

¹⁷ Luv has ntxiv tas, “Nwg kuas kuv tsi xob rov teg dlawb teg nplag lug cuag koj. Yog le ntawd, nwg txhaj muab cov nplej nuav rua kuv ris lug.”

¹⁸ Na-aumis has tas, “Luv, koj ua sab ntev tog moog txug thaus koj paub zaaj nuav lawm tsaiv. Nub nua Npau-am yuav kub sab lug has zaaj nuav kuas tav.”