Luv 2 - Vaajtswv Txujlug 2000

Luv Khaws Nplej huv Npau-am Thaaj Teb

¹ Na-aumis muaj ib tug kwvtij npe hu ua Npau-am kws yog ib tug tuabneeg npluanuj hab suavdlawg fwm, nwg yog Na-aumis tug quasyawg Elimelej tsev tuabneeg.

² Muaj ib nub Luv has rua Na-aumis has tas, “Thov koj ca kuv moog nraag luas tej teb hab moog khaws tej nplej kws cov tuabneeg hlais nplej ua poob. Kuv ca sab has tas kuv yuav moog ntsib tug kws kaam ca kuv khaws nwg tej nplej.” Na-aumis teb has tas, “Miv nyaab, koj moog los tau.”

³ Yog le ntawd, Luv txhaj moog nraag teb hab lawv cov tuabneeg hlais nplej qaab, khaws tej naab nplej kws cov tuabneeg hlais nplej ua poob. Nwg txawm moog ncaaj rua huv Npau-am kws yog Elimelej tug kwvtij thaaj teb.

⁴ Tom qaab ntawd Npau-am txawm tuaj huv Npelehees tuaj txug hab has rua cov tuabneeg hlais nplej tas, “Thov tug TSWV nrug nraim mej nyob.” Puab teb has tas, “Thov tug TSWV foom koob moov rua koj.”

⁵ Npau-am nug tug kws saib cov tuabneeg hlais nplej ntawd has tas, “Tug quaspuj hluas ntawd yog leejtwg?”

⁶ Tug txivneej ntawd teb has tas, “Tug quaspuj ntawd yog tuabneeg txawv tebchaws, nwg nrug Na-aumis lug nraag tebchaws Mau-am lug.

⁷ Nwg tuaj thov kuv ca nwg lawv cov tuabneeg hlais nplej qaab hab khaws tej naab nplej kws poob. Nwg tub tuaj ua num thaus taagkig nuav sawv ntxuv lug lawm, nwg nyavnyuas lug su ib plag huv tsev pheebsuab nuav xwb.”

⁸ Npau-am has rua Luv has tas, “Tug ntxhais, koj noog kuv has, koj tsi xob moog khaws nplej huv lwm tug thaaj teb, koj ca le khaws lawv kuv cov ntxhais qhev qaab nyob huv kuv thaaj teb nuav xwb;

⁹ Koj saib puab hlais nplej qhov twg koj ca le khaws qhov ntawd. Kuv tub has rua cov txivneej lawm kuas puab tsi xob lug zig koj. Hab thaus twg koj nqhes dlej, ca le moog haus huv tej hub kws puab tub ntim dlej puv nkaus rua lawm.”

¹⁰ Luv txhus caug ndlua nyo ua ntsejmuag ti nkaus huv aav hab has rua Npau-am has tas, “Vim le caag koj yuav mov tshua kuv ua luaj? Vim le caag koj yuav ua sab dlawb rua tug tuabneeg txawv tebchaws taag npaum le?”

¹¹ Npau-am teb has tas, “Kuv tau nov txhua yaam kws koj tau ua zoo rua koj nam puj txij thaus koj tug quasyawg tuag lug lawm. Kuv paub has tas koj tau tso koj nam koj txiv hab koj lub tebchaws tseg hab lug nrug cov tuabneeg kws koj ibtxwm tsi tau paub dlua le nyob.

¹² Thov kuas tug Tswv pauj txaj ntsig rua tej kws koj tau ua zoo taag lug lawm. Thov kuas koj tau txais koob moov nplua mag lug ntawm tug Tswv kws yog cov Yixalayees tug Vaajtswv kws koj lug vaamkhom.”

¹³ Luv teb has tas, “Koj ua sab dlawb kawg le rua kuv. Txawm yog kuv tub tsi muaj nqes npaum le koj ib tug ntxhais qhev los koj tseem ua rua kuv zoo sab heev, vim koj has tej lug mog lug muas rua kuv.”

¹⁴ Thaus lub sijhawm noj mov Npau-am has rua Luv has tas, “Koj ca le lug muab mov hab zaub noj.” Yog le ntawd, Luv txhaj nrug cov tuabneeg ua num noj mov ua ke hab Npau-am faib tej ncuav nplej rua Luv noj. Nwg noj tsau hab tseem tshuav tej zaub mov seem.

^15-16 Tom qaab kws noj mov taag hab yuav rov moog khaws nplej. Npau-am has rua cov ua num tas, “Ca nwg moog khaws tej naab nplej, txawm yog cov kws poob ntawm qhov chaw kws tso tej teg nplej los mej tsi xob txwv nwg le. Dlua le ntawd mej yuavtsum rhu tej naab nplej ntawm tej teg nplej kws mej hlais tso rua nwg tau khaws hab.”

¹⁷ Yog le ntawd, Luv txhaj khaws tej naab nplej huv thaaj teb ntawd moog txug thaus tsaus ntuj hab nwg coj lug ntaus tau ib kawg.

¹⁸ Nwg txhaj ris cov nplej ntawd lug rua huv nroog hab coj lug qha rua nwg nam puj has tas, “Nub nua kuv moog khaws tau nplej npaum le nuav.” Hab nwg muab tej zaub mov kws nwg noj sus tsi taag rua nwg nam puj noj.

¹⁹ Na-aumis nug Luv has tas, “Nub nua koj moog khaws tej nplej nuav qhov twg lug? Koj moog ua num huv leejtwg thaaj teb? Thov Vaajtswv foom koob moov rua tug txivneej kws ua sab dlawb rua koj!” Yog le ntawd, Luv txhaj qha rua Na-aumis paub qhov kws nwg moog khaws tej nplej ntawd huv ib tug txivneej kws hu ua Npau-am thaaj teb.

²⁰ Na-aumis txhaj has tas, “Thov tug TSWV foom koob moov rua Npau-am, tug TSWV yeej ua lawv le nwg tej lug cog tseg rua cov tuabneeg kws tseem ua neej nyob hab cov kws tuag lawm.” Hab nwg has ntxiv tas, “Tug txivneej ntawd yog ib tug kws txheeb ze wb heev, nwg yog ib tug kws muaj cuabkaav paab tau wb.”

²¹ Ces Luv has tas, “Zoo kawg le, nwg tseem has rua kuv kuas kuv rau sab ntso moog khaws tej naab nplej huv nwg thaaj teb moog txug thaus nwg cov tuabneeg sau nplej taag.”

²² Na-aumis has rua Luv tas, “Miv nyaab, yog koj moog khaws nplej nrug Npau-am cov ntxhais qhev huv nwg thaaj teb ntshai yuav zoo dlua. Yog koj moog khaws huv lwm tug thaaj teb, ntshai luas yuav saib tsi taug koj.”

²³ Yog le ntawd, Luv txhaj nrug puab moog khaws tej naab nplej moog txug thaus hlais nplej taag hab sau tej qoob taag lawm. Hab Luv tseem nrug nwg nam puj nyob.