Luv 1 - Vaajtswv Txujlug 2000

Elimelej hab Nwg Tsev Tuabneeg Tsiv Moog Nyob Tebchaws Mau-am

^1-2 Ntau xyoo ua ntej kws cov Yixalayees tseem tsi tau muaj vaajntxwv, txawm muaj kev tshaib nqhes nyob huv tebchaws Yixalayees. Muaj ib tug txivneej hu ua Elimelej, nwg yog Efalas cuab kwvtij hab nyob huv lub nroog Npelehees huv tebchaws Yudas, nwg txhaj coj Na-aumis kws yog nwg tug quaspuj hab nwg obtug tub, Maloos hab Khili-oos tsiv moog nyob tau ib ntus nraag tebchaws Mau-am. Thaus puab tseem nyob nraag,

³ Elimelej txawm tuag lawm tseg Na-aumis nrug nwg ob tug tub nyob.

⁴ Obtug txhaj moog yuav tau cov tuabneeg Mau-am ob tug ntxhais kws yog Aulepas hab Luv lug ua quaspuj. Hab puab nyob huv lub tebchaws ntawd kwvlaam le kaum xyoo tom qaab,

⁵ Maloos hab Khili-oos obtug txawm tuag huv tuabsi lawm tseg Na-aumis nyob tuab leeg tsi muaj quasyawg hab tsi muaj tub le.

Na-aumis hab Luv Rov Lug rua Npelehees

⁶ Tau tsi ntev lug tom qaab nuav, Na-aumis nov has tas, tug TSWV tau foom koob moov rua nwg tsaav tuabneeg, puab rov ua tau qoobloo; yog le ntawd nwg txhaj coj nwg ob tug nyaab sawv kev tawm huv tebchaws Mau-am rov qaab lug.

⁷ Puab pib sawv kev ua ke rov qaab lug rua peg tebchaws Yudas, tabsis thaus puab lug txug ib tog kev,

⁸ Na-aumis has rua nwg ob tug nyaab has tas, “Meb ca le rov moog nrug meb nam nyob. Thov tug TSWV ua zoo rua meb ib yaam le meb tau ua rua kuv hab kuv ob tug tub kws tuag lawm.

⁹ Hab thov tug TSWV pub kuas meb rov tau quasyawg yuav hab nyob muaj vaaj muaj tsev dlua ntxiv.” Yog le ntawd, Na-aumis txhaj nwj nwg ob tug nyaab hab yuav ncaim moog. Tabsis obtug txawm tsaa suab hlo quaj,

¹⁰ hab has rua nwg tas, “Wb tsi moog! Wb yuav nrug koj moog rua peg koj cov kwvtij!”

¹¹ Na-aumis teb has tas, “Kuv ob tug nyaab, meb yuavtsum rov qaab moog tsev xwb. Vim le caag meb txhaj xaav nrug kuv moog? Meb xaav has tas kuv tseem yuav muaj dlua tub lug yuav meb hab nua los?

¹² Meb ca le rov qaab moog tsev, rua qhov kuv tub laug hab yuav tsi taug quasyawg ntxiv lawm. Txawm yog kuv tseem muaj kev ca sab hab moog yuav quasyawg mo nuav hab muaj kag ob tug tub los

¹³ meb puas yuav tog taug txug thaus obtug hlub? Saib qhov nuav puas ua rua meb nyob taug tsi moog yuav lwm tug? Kuv ob tug nyaab, meb tsi xob ua le ntawd, meb yeej paub has tas yuav ua tsi tau le ntawd ib zag le. Tug TSWV tau tso kuv tseg lawm, hab kuv hlub meb heev, kuv tsi xaav has tas, meb lub neej yuav zoo le nuav.”

¹⁴ Obtug rov quaj dlua ib zag ntxiv. Ces Aulepas txawm nwj nwg nam puj hab ncaim rov qaab moog tsev lawm, tabsis Luv tseem tuav rawv nwg nam puj tsi tso le.

¹⁵ Yog le ntawd, Na-aumis txhaj has rua Luv has tas, “Luv, Aulepas tub rov qaab moog nrug nwg tsaav tuabneeg hab nwg tug vaajtswv nyob lawm, koj ca le nrug nwg rov qaab moog hab.”

¹⁶ Tabsis Luv teb has tas, “Tsi xob txwv kuv! Ca kuv nrug koj moog. Koj moog qhov twg, kuv yeej yuav nrug koj moog qhov ntawd; koj nyob qhov twg, kuv yuav nrug koj nyob qhov ntawd. Koj tsaav tuabneeg yuav yog kuv tsaav tuabneeg hab koj tug Vaajtswv yuav yog kuv tug Vaajtswv.

¹⁷ Koj tuag rua qhov twg kuv yuav tuag qhov ntawd, hab ca luas muab kuv log nrug koj rua qhov ntawd. Tsuas yog txujkev tuag txhaj yuav ua rua kuv ncaim ntawm koj xwb, yog kuv ca ib yaam dlaabtsi ua rua kuv ncaim koj moog, thov kuas tug TSWV rau txim rua kuv!”

¹⁸ Thaus Na-aumis pum has tas, Luv muaj pluaj sab nrug nwg moog tag, nwg txawm tsi has dlaabtsi ntxiv le lawm.

¹⁹ Obtug txawm ua ke lug txug rua huv lub nroog Npelehees. Thaus obtug lug txug huv lub nroog, tej tuabneeg zoo sab kawg hab tej quaspuj sis nug zum zawg has tas, “Tug nuav puas yog Na-aumis?”

²⁰ Nwg teb has tas, “Mej tsi xob hu kuv ua Na-aumis lawm, mej hu kuv ua Malas xwb, rua qhov Vaajtswv tug kws muaj Fwjchim Luj kawg nkaus tau ua rua kuv lub neej raug kev txomnyem lwj sab kawg le.

²¹ Thaus kuv tawm huv nuav moog, kuv muaj txhua yaam nplua mag, tabsis tug TSWV coj kuv rov lug teg dlawb teg nplag, vim le caag mej tseem hu kuv ua Na-aumis, thaus tug TSWV kws muaj Fwjchim Luj kawg nkaus rau txim hab tso kev txomnyem lug rua kuv?”

²² Zaaj nuav yog has txug Na-aumis hab Luv kws yog nwg tug nyaab kws yog tuabneeg Mau-am, rov nraag tebchaws Mau-am lug. Thaus obtug lug txug huv lub nroog Neplehees taabtom yog lub caij kws pib hlais nplej.