Filemoo 1 - Vaajtswv Txujlug 2000

¹ Filemoos, kuv hab peb tug kwv Timautes sau tsaab ntawv nuav tuaj rua koj. Kuv raug kaw rua huv tsev lojcuj, rua qhov kuv qha Yexus zaaj. Koj yog tug kws nrug wb ua tuab teg num hab yog tug kws wb hlub.

² Hab wb sau rua cov ntseeg kws tuaj noog lug qhuab qha huv koj tsev, hab rua wb tug muam Afias, hab rua Akhipus tug kws ua Yexus Khetos ib tug tubrog ib yaam le wb.

³ Thov Vaajtswv tug kws yog peb leej Txiv hab peb tug Tswv Yexus Khetos foom koob moov rua mej, hab paab kuas mej tau nyob kaaj sab lug.

Filemoos Kev Hlub hab Kev Ntseeg

⁴ Filemoos, txhua zag kws kuv thov Vaajtswv, kuv thov Vaajtswv paab koj hab kuv ua Vaajtswv tsaug,

⁵ rua qhov kuv nov xuv has tas koj muab sab rau ntseeg peb tug Tswv Yexus, hab koj hlub cov ntseeg Vaajtswv heev.

⁶ Koj hab wb puavleej yog tug ntseeg hab nrug Yexus Khetos sis raug zoo. Yog le ntawd kuv thov Vaajtswv paab peb cov kws ntseeg Yexus Khetos, kuas peb paub tej kws Vaajtswv qha rua peb heev zuj zug ntxiv.

⁷ Tug kwv, qhov kws koj muaj lub sab hlub cov ntseeg Vaajtswv, hab koj tau txhawb puab txhua tug tug zug, qhov ntawd txhawb tau kuv tug zug hab ua rua kuv zoo sab kawg le.

Paulus Thov Kuas Filemoos Hlub Auneximus

⁸ Wb ob leeg puavleej yog tug kws ntseeg Yexus Khetos, yog le ntawd, kuv yeej muaj cuabkaav kuas koj ua lawv le kuv has.

⁹ Tabsis kuv hlub koj, kuv tsi xaav ua le ntawd. Txawm yog kuv yog Yexus Khetos tug tubkhai kws nwgnuav raug kaw rua huv tsev lojcuj, vim kuv yog tug kws qha Yexus Khetos zaaj los kuv yeej tsi yuam kuas koj ua lawv le kuv has.

¹⁰ Kuv thov koj noog, kuv yuav has Auneximus zaaj rua koj. Nwgnuav nwg yog kuv tug tub, rua qhov thaus kuv qha Txujmoo Zoo rua nwg, nwg tau lug ntseeg Yexus lawm.

¹¹ Filemoos, yaav taag lug koj pum has tas nwg yog tug tuabneeg kws tsi tsimtxaj, tabsis nwgnuav kuv pum has tas, nwg yog tug tuabneeg tsimtxaj lawm. Kuv xaav has tas, nyaj koj yuav pum ib yaam le kuv pum hab.

¹² Nwgnuav kuv kuas nwg rov qaab lug nrug koj nyob. Kuv ua le ntawd, ib yaam le kuv muab kuv ib nplooj sab faib rua koj lawm ntaag.

¹³ Kuv paub has tas koj yeej xaav paab kuv, tabsis koj tsi nyob ntawm nuav, lub sijhawm kws kuv raug kaw rua huv tsev lojcuj nuav, kuv xaav kuas Auneximus nrug kuv nyob paab kuv. Koj yuavtsum ncu ntsoov has tas, qhov kws kuv raug kaw rua huv tsev lojcuj, tub yog vim kuv qha Txujmoo Zoo.

¹⁴ Txawm yog le caag los xij, kuv tsi xaav yuam kuas koj paab kuv. Yog koj zoo sab paab, koj ca le paab. Txhua yaam kws koj tsi pum zoo kuv ua, kuv yeej tsi ua.

¹⁵ Qhov kws Auneximus ncaim koj moog ib ntus ntawd, tej zag yog Vaajtswv xaav coj nwg rov qaab lug nrug koj nyob moog le.

¹⁶ Koj tsi xob suav has tas nwg yog ib tug tubqhe xwb, nwgnuav nwg tsimtxaj dlua ib tug tubqhe, nwg lug ua koj ib tug kwv, rua qhov nwg ntseeg Yexus Khetos lawm. Kuv hlub nwg kawg le hab kuv paub has tas koj hajyam yuav hlub nwg heev dlua, rua qhov nwg yeej yog koj ib tug tubqhe hab nwg yog ib tug kws ntseeg tug Tswv.

¹⁷ Yog le ntawd, yog koj suav has tas kuv hab koj, wb ob leeg puavleej ua Vaajtswv teg num, koj yuavtsum hlub nwg ib yaam le koj hlub kuv.

¹⁸ Yog nwg tau ua txhum rua koj lossis nwg tshuav koj nqe, kuv yuav them rua koj.

¹⁹ Tub yog kuv txhais teg sau le nuav has tas, “Paulus yuav them rua koj.” (Nyaj koj yuav ncu ntsoov has tas, koj tshuav kuv nqe, rua qhov kuv qha Txujmoo Zoo rua koj, tabsis qhov ntawd kuv tsi has txug.)

²⁰ Yog le ntawd tug kwv, wb yog ob tug kws ntseeg Vaajtswv, yog koj xaav ua hum Vaajtswv sab tag, thov koj paab kuv zaaj nuav, kuv txhaj yuav kaaj sab mivntsiv.

²¹ Thaus kuv taabtom sau tsaab ntawv nuav tuaj rua koj, kuv ca sab has tas koj yuav ua lawv le kuv thov. Tsi yog le ntawd xwb, koj tseem yuav ua ntau dlua le kuv thov hab.

²² Kuv muaj ib lu lug has rua koj ntxiv. Thov koj npaaj txaaj chaw tog kuv, rua qhov kuv ca sab has tas Vaajtswv yeej yuav teb tej lug kws mej thov kuas Vaajtswv qheb kev rua kuv rov tuaj saib mej dlua.

Cov Lug Xaa Xuv thaus Kawg

²³ Epalas tug kws raug kaw nrug kuv huv tsev lojcuj vim wb qha Yexus Khetos zaaj. Nwg has noj qaab nyob zoo rua koj hab.

²⁴ Malakaus, Alitakhus, Demas, hab Lukas kws nrug kuv ua tuab teg num. Puab has tas kuas has noj qaab nyob zoo rua koj hab.

²⁵ Thov tug Tswv Yexus Khetos foom koob moov rua mej txhua tug.