Amaus 1 - Vaajtswv Txujlug 2000

¹ Tej nuav yog tug cevlug Amaus tej lug, nwg yog ib tug tub yug yaaj kws nyob huv lub zog Tekau-as. Thaus Uxiyas ua vaajntxwv kaav tebchaws Yudas, hab Yehau-as tug tub Yelaunpau-aas ua vaajntxwv kaav tebchaws Yixalayees; Vaajtswv tau qha txhua yaam txug cov Yixalayees rua Amaus ob xyoos ua ntej kws aav qeeg.

² Amaus has tas, “Tug TSWV lub suab nrov nroo ntwg sau lub Roob Xi-oos tuaj; Nwg lub suab nrov ntxhe ntwg huv lub nroog Yeluxalees. Tej tshaav zaub qhuav taag huv tuabsi hab tej nroj tsuag sau roob Kalemees los dlaaj taag.”

Vaajtswv Rau Txim rua Cov Tebchaws Kws Nyob Puagncig Yixalayees Cov Xilias

³ Tug TSWV has tas, “Cov tuabneeg kws nyob huv lub nroog Damaxes ua txhum taag los rov ua txhum dlua hab, tub yog vim le nuav kuv yuav rau txim rua puab. Puab tau ua nruj ua tsiv rua cov tuabneeg Nkile-as.

⁴ Yog le ntawd kuv txhaj yuav tso suavtawg lug hlawv lub tsev kws Vaajntxwv Haxayees ua hab kuv yuav hlawv Vaajntxwv Npeehadas tej yeej tubrog kuas kub nyab taag.

⁵ Kuv yuav tsoo lub nroog Damaxes tej roojvaag hab muab cov tuabneeg kws nyob huv lub Haav Avees hab tug thawj kws kaav lub nroog Npethedees ntab tawm moog. Cov tuabneeg Xilias yuav raug nteg coj moog kaw rua huv tebchaws Kis.”

Cov Filitees

⁶ Tug TSWV has tas, “Cov tuabneeg Nkaxas ua txhum taag los rov ua txhum dlua hab, tub yog le nuav kuv yuav rau txim rua puab. Puab coj txhua tsaav tuabneeg lug hab muab muag moog ua qhev rua tebchaws Edoos.

⁷ Yog le ntawd kuv yuav tso suavtawg lug hlawv lub nroog Damaxes tej ntsaa yeej hab hlawv puab tej yeej tubrog kuas kub nyab taag.

⁸ Kuv yuav muab cov thawjcoj kws kaav lub nroog Asedaus hab lub nroog Asekeloos ntab tawm moog. Kuv yuav rau txim rua lub nroog Ekiloos hab cov tuabneeg Filitees kws seem yuav tuag taag huv tuabsi.”

Cov Tiles

⁹ Tug TSWV has tas, “Cov tuabneeg Tiles ua txhum taag los rov ua txhum dlua hab, tub yog vim le nuav kuv yuav rau txim rua puab. Puab coj txhua tsaav tuabneeg lug hab muab muag moog ua qhev rua tebchaws Edoos, hab tsi ua lawv le tej lug kws puab cog tseg has tas, yuav ua phoojywg ntawd le.

¹⁰ Yog le ntawd kuv yuav tso suavtawg lug hlawv lub nroog Tiles tug ntsaa yeej hab hlawv puab tej yeej tubrog kuas kub nyab taag.”

Cov Edoos

¹¹ Tug TSWV has tas, “Cov tuabneeg Edoos ua txhum taag los rov ua txhum dlua hab, tub yog vim le nuav kuv yuav rau txim rua puab. Puab caum puab cov kwvtij kws yog cov Yixalayees tua hab tsi taabncuab puab le. Puab tsi tso puab tej kev nruj kev tsiv tseg le.

¹² Yog le ntawd kuv yuav tso suavtawg lug hlawv lub nroog Temas hab lub nroog Npauxelas tej yeej tubrog kuas kub nyab taag.”

Cov Amoos

¹³ Tug TSWV has tas, “Cov Amoos ua txhum taag los rov ua txhum dlua hab, tub yog vim le nuav kuv yuav rau txim rua puab. Puab moog txeeb lwm tsaav tuabneeg lub tebchaws lug ua puab tug, hab puab muab cov quaspuj kws nyob huv cheebtsaam Nkile-as kws tseem taabtom suab mivnyuas phais plaab.

¹⁴ Yog le ntawd, kuv yuav tso suavtawg lug hlawv lub nroog Lanpas tej ntsaa yeej hab tej yeej tubrog kuas kub nyab taag. Nub kws ua rog yuav muaj suab qw nrov ntshu nrooj hab yuav muaj kev sis ntaus sis tua ib yaam le cua dlaaj cua dlub ntsawj.

¹⁵ Puab tug vaajntxwv hab nwg cov numtswv yuav raug nteg moog ua luas qhev.”