فيلبي 2 - Hijazi New Arabic Version

تتواضعوا زي تواضع المسيح

¹ لأنو لينا التشجيع في المسيح، والتعزية في المحبة، والشراكه في الروح، ولينا التراحم والحنان،

² فتكملو سعادتي بإنو يكون ليكم راي واحد ومحبة وحده ونفس وحده وفِكر واحد۔

³ ما يكون بيِنَكم شي من التحزب والافتخار البطَّال، وعلى كل واحد فيكم إنه يتواضع وانو يِعتَبِر غيرو احسن من نفسو،

⁴ ما يهتم بمصلحتو هوَّا بس كمان يهتم بمصالح الباقين۔

⁵ وخلي يكون عندكم ذا الفِكر اللي عند المسيح يسوع۔

⁶ هوَّا انو، وهوا كائن زي شكل الله، ما اعتبر مساواتو با الله استغلال، او مكسب يِتمسَّك فيه؛

⁷ لكن خلَّا نفسو، بصورة عبد، يشبه البشر؛

⁸ و إذا بان على شَكِلْ إنسان، ركَّز في التذَلُّل، وصار مطيع الين الموت، موتَ الصليب۔

⁹ عشان كذا كمانا رفعو الله عالي جداً، وأدّالو إسم اللي فوق كل إسم،

¹⁰ عشان تِنحني و تسجد لإسم يسوع كلِّ ركبة، سواءً كانت في السما او الارض او تحت الارض،

¹¹ و عشان يعترف كل لِسان بإنو يسوع المسيح هوا الرب، لِمجد الله الأب۔

سَووُّ كل حاجة بدون ما تِتأفأفو و تتذمرو

¹² طيب، حبايبي، زي ما كنتو بتطيعو دايما، مو لما انا موجود وبس، لكن الأحسن يكون اكثر وانا غايب، كمان اتعبو علشان تِكَمِّلو خلاصكم بخوف ورهبة،

¹³ لِأنو الله هوا اللي يحط فيكم الارادة والشُغُل عشان رِضاه۔

¹⁴ وسَووُّ كُل شي بدون ما تتزمروا او تِهْرِجو كثِير،

¹⁵ عشان تِكونو بدون اذيَّة و بُسَطا، اولاد ِلله بدون خطايا وسط جيل صايع و خربان، تنَوِّروا بيِنَهُم زيَّ النجوم في العالم،

¹⁶ شايلين كِلمَة الحياة، عشان تِكونو في يومَ مجيء المسيح مفْتَخرِين إني ما تِعبت بس هرج ولا تعبت على الفاضي۔

¹⁷ حتى لو دمي إتهدر فوق ذبيحة ايمانكُم وخدمتو، فأنا افرح وأتونس معاكم كُلَّكُم۔

¹⁸ انتو كمان افرحوا ، افرحوا معايا۔

تيموثاوس وأبفروديتس

¹⁹ وكمان أتمنى مِن الرب يسوع اني من قَريب راح أرسِلَّكُم تِيمُوثَاوُس، عشان ترتاح نفسي وانا عندي اخبارَكُم وظروفَكُم۔

²⁰ ماعندي احد غيرو يهتم زييِّ بحياتكم بإخلاص۔

²¹ لإنو الكُل يدورو ورا مصالحهم الي تخُصَّهُم، مو عشان المسيح يسوع۔

²² أماَّ تِيمُوثَاوُسُ، فا انتو عارفين انو مُمتَحن، وترا خدم معايا في التبشير بالانجيل كأنو ولد بيساعد ابوه.

²³ أتمنى إني أرسلو لما يبان معايا كيف تصير ظروفي.

²⁴ بس عندي ثِقة في الرب إني، أنا نفسي، جاي ليكم قريب.

²⁵ لكن شُفت إنو لازِم ارسِلَّكم أَبَفْرُودِيتُسَ، أخويا ومعاوني وصَاحْبِي في الكِفاح، والمُرسل من عندكم عشان يِسُد عازتي،

²⁶ ترا كنتو واحشينو كلَّكُم، وزعلان عشان سِمِعْتو بمرضو۔

²⁷ و مِرض إلين ما كان رح يموت، ولكن الله شفق عليه، و مو لوحدو، انا كمان معاه، عشان ما احزن زيادة فوق حزن.

²⁸ و عشان كذا استعجلت كثير إني أرسلو ليكم، عشان اذا شفتووه ثاني مره تفرحو انتو و أنا يقل حزني.

²⁹ و تقبلووه بالرب بكل سعاده، و عاملو اللي زيو كويس وبكرم.

³⁰ لانو بسبب عَمَلَ المسيح راح يموت، وخاطر بحياتو عشان يكمل نقص خدمتكم ليَّا.