كولوسي 1 - Hijazi New Arabic Version

¹ من ُبولس وهو رسول للمسيح يسوع بإرادة الله، ومِنَ الأخْ تِيمُوثَاوُسَ،

² للاخوان القديسين والأُمنا في المسيح، العايشين في مدينة كُولُوسِّي. ادعي لكُم بالنِعمة والسَّلام مِنَ الله أبونا والرب يسوع المسيح

شكر وصلاة

³ إحنا دايما بِنشكر الله، ابو ربنا يسوع المسيح لما بنصلي عشانكم۔

⁴ لأنو وصلنا خبر ايمانكم بالمسيح يسوع والمحبة اللي عِندَكُم لِكُلَّ القديسين،

⁵ بسبب الرجا المحفوظ لَكُم في السماوات، الرجا اللي سمعتو فيه مِن قَبِل في كِلمَة الحق اللي في الإنجيل

⁶ واللي وصلت ليكم زي ما بتنتشرفي العالم كلو دحين، وتنتج الثمر وتكبر، زي ما بيصير بينكم من وقت ما سمعتو بنعمة الله وامتحنتوها بالحق،

⁷ على حسب اللي تعلمتو من أَبَفْرَاس شريكنا العبدَ الحبيب، والخادم الأمين للمسيح عِندَكم

⁸ وهوا نفسو قللنا عن محبتكم في الروح

⁹ علشان إحنا كمان، من اليوم اللي سمعنا فيه بأخباركم، لسانا بنصلِّي وبنِخشع علشانكم، علشان يكتمل عندكم معرِفَة مشيئة الله في كُل حِكمَة وإدراك روحي،

¹⁰ علشان تِمشو بطَريق كويس مع الرب ومقبول في كل شي، مثمرين في كل عمل صالح وناميين في معرفة الله الين التمام،

¹¹ متمسكين بكُل قوة موافقة لقدرتو ومجدو، علشان تقدرو تتحمَّلو وبالكم يكون طويل،

¹² شاكرين بكل رضا وسعادة للأب اللي خلَّاكُم أهل علشان تشتركو في ميراث القديسين في النور،

¹³ هوا اللي ساعدنا إننا نخرج من سلطة الظلام ونقلنا لمَلَكُوت ابن محبتو

¹⁴ اللي فيه لينا التضحية، يعني غفران الزنوب۔

ميلاد المسيح

¹⁵ هوا صورة الله اللي ما ينشاف، البكر على كل اللي اتخلق،

¹⁶ لِأنو فيه كُلَّ الحاجات اتخلقت: اللي في السماوات واللي في الارض، اللي بيتشاف واللي وما بيتشاف، لو كانت مناصب، أو زعامات او رِئاسات او سُلُطات۔ كلَّ اللي في الكون اتخَلَق به وعلشانو

¹⁷ هوا موجود قبْلِ كُلِّ شي، وفيه بيدوم كل شي۔

¹⁸ وهوا راسَ الجَسَد، يعني الكنيسة؛ هوا البداية وأول القايمين من بين الاموات، علشان يكون ليه المقامَ الأوَل في كل حاجة۔

¹⁹ وفي أتبسَطَ الله انه يحل فيه بكماله كلُّو،

²⁰ وانو يصالح فيه كل حاجة مع نفسه، ونشرالسلام بدمُّو على الصليب، وفيه بيصالح كل حاجة، لو كانت على الارض او في السماوات۔

²¹ وانتو، يا اللي كنتو من قَبِلْ غرباء وأعداء في التفكير، بأعمالكم الشريرة،

²² صالحكم دحين في جسد بَشَرِيَّة (ابنو) بالموت۔ ودا عشان يجيبكم وتوقفوا قدامو وانتو قديسين بدون زنب ولا لوم۔

²³ وعليكم تصمدوا بجد في الايمان متأسسين وصامدين ومو متغيِّرين عن رجا الانجيل اللي سمِعتوه، اللي اتبَشَّر بيه للخلايق كلَّهم تحت السما، وله صرت أنا بُولُسَ خادم۔

جهاد بولس عشان الكنيسة

²⁴ ودحين أنا افرح في الأوجاع اللي أعاني منها علشانكم، و أكمِّل في جِسمي اللي نقص من ضِيقاتَ المَسيح علشان جسدو اللي هوا الكنيسة،

²⁵ وليها انا صرت خادم حسب تدبير الله اللي مديه ليَّا علشانَكُم، وهوا إني أكمِّل كِلمَة الله، بإعلان

²⁶ السر اللي كان مخبى كل العصور والأجيال، بس دحين صار باين لقديسيه،

²⁷ اللي همه بغى الله انو يقول لهم عن غنى مجد دا السر بين الأمم: انو المسيح فيكم، وهوا رجا المجد؛

²⁸ دا السر بِنِعلِنو إحنا، بِنوَعي كُل إنسان، وبِنعلِّم كُل انسان، في كل حكمة، علشان نجيب كل انسان كامل في المسيح۔

²⁹ وعلشان كدا أنا بَتعَب وِ بَجَاهِد، بسبب قُدرَتواللي تتحرك فياَّ بقوة۔