Mikhas 1 - Vajtswv Txojlus - lus Hmoob Dawb - txhais tshiab xyoo 2004

Quaj ntsuag Xamali thiab Yeluxalees

¹ No yog tej lus uas Yawmsaub hais tuaj rau Mikha uas yog neeg hauv lub moos Maulese rau thaum Yauthas, Aha thiab Hexekhiya ua vajntxwv kav Yuda tebchaws, yog tej lus uas Mikha pom txog Xamali thiab Yeluxalees.

² Ib tsoom neeg txhua tus 'e, cia li tig ntsej mloog, lub qab ntuj 'e thiab txhua yam uas nyob hauv cia li mloog. Cia Vajtswv Yawmsaub ua timkhawv kom nej, yog tus Tswv uas hais hauv nws lub tuam tsev dawb huv tuaj.

³ Saib nawj, Yawmsaub tawm hauv nws lub chaw los, nws yuav nqes los tsuj mus los saum tej chaw siab hauv lub ntiajteb.

⁴ Tej roob yuav yaj tag rau hauv nws qab thiab tej hav yuav tawg pes rhe, yam nkaus li ciab ntab yaj ntawm hluavtaws thiab yam li tej dej uas ntws ntawm tej toj ntxhab los.

⁵ Tej xwm txheej no huvsi yog tim Yakhauj tej kev fav xeeb thiab tim Yixayee caj ces tej kev txhaum txim. Yakhauj tej kev fav xeeb yog dabtsi? Tsis yog lub nroog Xamali lov? Yuda caj ces lub chaw siab teev dab yog dabtsi? Tsis yog lub nroog Yeluxalees lov?

⁶ “Vim li no kuv yuav ua rau Xamali pob ua tej niag pawg ciaj hav nroj, yuav ua chaw cog vaj txiv hmab. Kuv yuav muab tej pob zeb uas tsim lub nroog ntawd nchuav rau hauv tej khuab ha, mas yuav pom tej taw uas tiag lub nroog.

⁷ Tej dab mlom huvsi hauv lub nroog ntawd yuav raug muab tsoo ua tej dwb daim. Tej uas muab xyeem rau hauv tej tsev dab yuav raug muab hlawv pov tseg, thiab kuv yuav muab tej dab mlom ua kom piam tag huvsi. Tej dab mlom ntawd yog Xamali muab cov nqe ua poj muag cev sau zog yuav los, mas yuav rov mus ua nqe ntiav poj muag cev.”

⁸ Vim li no kuv yuav quaj ntsuag thiab quaj nyiav, kuv yuav mus mus los los liab qab tsuas tsis rau khau. Kuv yuav quaj ntsuag yam li hma nqov ntuj, thiab kuv yuav quaj lwj siab ntsuav yam li noog ntxhuav.

⁹ Xamali tej kiav txhab kho tsis tau li thiab kis tuaj txog Yuda lawm, twb los txog ntawm kuv haiv neeg lub rooj loog, uas yog Yeluxalees ntag.

¹⁰ Tsis txhob piav zaj no rau hauv lub moos Ka, tsis txhob quaj kiag li. Cia li da luj luam rau hauv tej hmoov av ntawm lub moos Npe Le‑ala.

¹¹ Cov neeg hauv lub moos Safi cia li taug nej txojkev liab qab tsuas thiab txaj muag. Cov neeg hauv lub moos Xana tsis tawm los. Lub moos Npe‑exee quaj nyiav, nej thiaj tsis tau chaw cawm siav rau qhov ntawd lawm.

¹² Cov neeg hauv lub moos Malau tos qhov zoo qhuav siab qhawv, vim yog Yawmsaub tso tej xwm txheej phem los txog ntawm rooj loog Yeluxalees lawm.

¹³ Cov neeg hauv lub moos Lakhi 'e, cia li muab nees nruab rau tej tsheb ua rog. Nej xub ua txhaum thiaj coj kev txhaum los rau hauv Xi‑oo tus ntxhais, rau qhov Yixayee tej kev fav xeeb muaj nyob hauv nej nruab nrab.

¹⁴ Vim li no nej yuav muab tshav ntuj xa lub moos Mauleseka mus, thiab lub moos Axij tej vaj tse yuav tsis ua chaw vam khom rau Yixayee tej vajntxwv.

¹⁵ Cov neeg hauv lub moos Malesa 'e, kuv yuav coj tus uas kov yeej los ntaus nej. Tus uas yog Yixayee lub koob meej yuav los rau hauv lub moos Adulas.

¹⁶ Cia li chais nej cov plaubhau kom do cuas quaj ntsuag nej tej menyuam uas nej nyiam kawg. Cia li ua rau nej do hau ib yam li dav noj twm, rau qhov lawv yuav ncaim nej mus poob tebchaws.