Amaus 1 - Vajtswv Txojlus - lus Hmoob Dawb - txhais tshiab xyoo 2004

Rau txim rau tej tebchaws uas nyob ib ncig Yixayee

¹ No yog Amau uas yog ib tug yug yaj hauv lub moos Thekhau‑a tej lus uas nws tau pom ntsig txog cov Yixayee rau thaum Uxiya ua vajntxwv kav Yuda tebchaws thiab Yau‑as tus tub Yelaunpau‑as ua vajntxwv kav Yixayee tebchaws ua ntej uas ntuj qeeg ob xyoos.

² Nws hais tias, “Yawmsaub lub suab nyooj laws hauv Xi‑oo tuaj, thiab nws tsa lub suab nrov hauv Yeluxalees tuaj. Cov uas yug yaj tej tshav zaub qhuav tag, lub ncov roob Khamee tuag tshav.”

³ Yawmsaub hais li no tias, “Qhov uas Damaxaka ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau muab thob log hlau luam Kile‑a.

⁴ Vim li no kuv yuav tso hluavtaws los rau saum Haxa‑ee lub tsev, mas hluavtaws yuav kub Npeehada tej chaw ruaj khov.

⁵ Kuv yuav lov Damaxaka tej las rooj pov tseg, thiab rhuav tshem cov neeg tawm hauv lub hav Avee mus, thiab ntiab tus uas tuav rawv tus cwj kav hauv lub moos Npe‑edee tawm mus. Cov pejxeem hauv Alas tebchaws yuav raug poob tebchaws mus rau lub moos Khi.” Yawmsaub hais li no ntag.

⁶ Yawmsaub hais li no tias, “Qhov uas lub moos Kaxa ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoo.

⁷ Vim li no kuv yuav tso hluavtaws los rau saum Kaxa tej ntsa loog, mas hluavtaws yuav kub Kaxa tej chaw ruaj khov.

⁸ Kuv yuav rhuav tshem cov neeg tawm hauv lub moos Asadau mus thiab ntiab tus uas tuav rawv tus cwj kav hauv lub moos Akheloo tawm mus. Kuv yuav tig kiag kuv txhais tes tawm tsam lub moos Ekhoo, mas cov Filixatee uas tseem tshuav yuav puam tsuaj tag huvsi.” Vajtswv Yawmsaub hais li no ntag.

⁹ Yawmsaub hais li no tias, “Qhov uas lub nroog Thailab ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoo, lawv tsis nco txog tej lus cog tseg sib raug zoo.

¹⁰ Vim li no kuv yuav tso hluavtaws los rau saum Thailab tej ntsa loog, mas hluavtaws yuav kub Thailab tej chaw ruaj khov.”

¹¹ Yawmsaub hais li no tias, “Qhov uas cov Edoo ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau xuas riam xuas ntaj raws caum lawv tus kwv, thiab tso plhuav txojkev khuvleej pov tseg, lawv txojkev chim muaj tsis tu li, thiab lawv npau taws vog mus ib txhis.

¹² Vim li no kuv yuav tso hluavtaws los rau saum lub moos Themas, thiab hluavtaws yuav kub lub moos Npauxa tej chaw ruaj khov.”

¹³ Yawmsaub hais li no tias, “Qhov uas cov Asmoo ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau muab tej pojniam uas suab menyuam tej plab phua hauv Kile‑a, xwv lawv thiaj li nthuav lawv lub tebchaws dav tuaj.

¹⁴ Vim li no kuv yuav zes taws rau lub moos Lanpa tej ntsa loog, mas hluavtaws yuav kub lub moos ntawd tej chaw ruaj khov, thiab yuav muaj lub suab qw nrov rau hnub uas ua rog, thiab yuav muaj cua daj cuab dub ntsawj rau hnub uas muaj khaub zeeg cua.

¹⁵ Lawv tus vajntxwv thiab nws cov thawj yuav ua ke raug poob tebchaws.” Yawmsaub hais li no ntag.