Mikhas 1 - Vaajtswv Txujlug - lug Moob Ntsuab - txhais tshab xyoo 2004

Quaj ntsuag Xamali hab Yeluxalee

¹ Nuav yog tej lug kws Yawmsaub has tuaj rua Mikha kws yog tuabneeg huv lub moos Maulese rua thaus Yauthaa, Aha hab Hexekhiya ua vaajntxwv kaav Yuta tebchaws, yog tej lug kws Mikha pum txug Xamali hab Yeluxalee.

² Ib tsoom tuabneeg txhua tug 'e, ca le tig ntsej noog, lub qaab ntuj 'e hab txhua yaam kws nyob huv ca le noog. Ca Vaajtswv Yawmsaub ua timkhawv kom mej, yog tug Tswv kws has huv nwg lub tuam tsev dawb huv tuaj.

³ Saib nawj, Yawmsaub tawm huv nwg lub chaw lug, nwg yuav nqeg lug tsuj moog lug sau tej chaw sab huv lub nplajteb.

⁴ Tej roob yuav yaaj taag rua huv qaab nwg hab tej haav yuav tawg pis rhe, yaam nkaus le cab ntaab yaaj ntawm suavtawg hab yaam le tej dej kws ndwg ntawm tej toj ntxhaab lug.

⁵ Tej xwm txheej nuav huvsw yog tim Yakhauj tej kev faav xeeb hab tim Yixayee caaj ceg tej kev txhum txem. Yakhauj tej kev faav xeeb yog daabtsw? Tsw yog lub nroog Xamali lov? Yuta caaj ceg lub chaw sab teev daab yog daabtsw? Tsw yog lub nroog Yeluxalee lov?

⁶ “Vem le nuav kuv yuav ua rua Xamali pob ua tej nam pawg caj haav xub tsuag, yuav ua chaw cog vaaj txwv maab. Kuv yuav muab tej pob zeb kws tswm lub nroog hov nchuav rua huv tej khuab haa, mas yuav pum tej taw kws tag lub nroog.

⁷ Tej txoov daab huvsw huv lub nroog hov yuav raug muab tsoo ua tej dwb daim. Tej kws muab xyeem rua huv tej tsev daab yuav raug muab hlawv pov tseg, hab kuv yuav muab tej txoov daab ua kuas pam taag huvsw. Tej txoov daab hov yog Xamali muab cov nqe ua puj muag cev sau zog yuav lug, mas yuav rov moog ua nqe ndav puj muag cev.”

⁸ Vem le nuav kuv yuav quaj ntsuag hab quaj nyav, kuv yuav moog moog lug lug lab qaab cuas tsw rau khau. Kuv yuav quaj ntsuag yaam le maa nqov ntuj, hab kuv yuav quaj lwj sab ntsuav yaam le noog ntxhuav.

⁹ Xamali tej kav txhaab khu tsw tau le hab kis tuaj txug Yuta lawm, tub lug txug ntawm kuv haiv tuabneeg lub rooj loog, kws yog Yeluxalee ntaag.

¹⁰ Tsw xob pav zaaj nuav rua huv lub moos Ka, tsw xob quaj hlo le. Ca le daa luj luam rua huv tej moov aav ntawm lub moos Npe Le‑ala.

¹¹ Cov tuabneeg huv lub moos Safi ca le taug mej txujkev lab qaab cuas hab txaaj muag. Cov tuabneeg huv lub moos Xanaa tsw tawm lug. Lub moos Npe‑exee quaj nyav, mej txhad tsw tau chaw cawm sav rua hov ntawd lawm.

¹² Cov tuabneeg huv lub moos Malau tog qhov zoo qhuav sab qhawv, vem yog Yawmsaub tso tej xwm txheej phem lug txug ntawm rooj loog Yeluxalee lawm.

¹³ Cov tuabneeg huv lub moos Lakhi 'e, ca le muab neeg nruab rua tej tsheb ua rog. Mej xub ua txhum txhad coj kev txhum lug rua huv Xi‑oo tug ntxhais, tsua qhov Yixayee tej kev faav xeeb muaj nyob huv plawv mej.

¹⁴ Vem le nuav mej yuav muab tshaav ntuj xaa lub moos Mauleseka moog, hab lub moos Axij tej vaaj tse yuav tsw ua chaw vaam khom rua Yixayee tej vaajntxwv.

¹⁵ Cov tuabneeg huv lub moos Malesa 'e, kuv yuav coj tug kws kov yeej lug ntaus mej. Tug kws yog Yixayee lub koob meej yuav lug rua huv lub moos Antulaa.

¹⁶ Ca le chais mej cov plaubhau kuas do cuas quaj ntsuag mej tej mivnyuas kws mej nyam kawg. Ca le ua rua mej do hau ib yaam le daav noj twm, tsua qhov puab yuav ncaim mej moog poob tebchaws.