Mathai 1 - Vaajtswv Txujlug - lug Moob Ntsuab - txhais tshab xyoo 2004

Yexu Kheto cov yawm koob

¹ Phoo ntawv nuav has txug Yexu Kheto le keeb kwm. Yexu yog Tavi xeeb ntxwv hab Tavi yog Aplahaa xeeb ntxwv.

² Aplahaa yog Yiha txwv, Yiha yog Yakhauj txwv, hab Yakhauj yog Yuta hab nwg cov kwvtij txwv,

³ Yuta yog Peles hab Xelag txwv, ob tug nam yog Thama, Peles yog Hexaloo txwv, Hexaloo yog Laa txwv,

⁴ Laa yog Aminanta txwv, Aminanta yog Nasoo txwv, Nasoo yog Xaamoo txwv,

⁵ Xaamoo yog Npau‑a txwv, Npau‑a nam yog Lahaj. Npau‑a yog Aunpe txwv, Aunpe nam yog Luv, Aunpe yog Yexi txwv,

⁶ hab Yexi yog vaajntxwv Tavi txwv. Tavi yog Xalaumoo txwv, Xalaumo nam yog Uliya tug quaspuj,

⁷ Xalaumoo yog Lehaunpau‑aa txwv, Lehaunpau‑aa yog Anpiya txwv, Anpiya yog Axa txwv,

⁸ Axa yog Yehausafa txwv, Yehausafa yog Yaulaa txwv, Yaulaa yog Uxiya txwv,

⁹ Uxiya yog Yauthaa txwv, Yauthaa yog Aha txwv, Aha yog Hexekhiya txwv,

¹⁰ Hexekhiya yog Manaxe txwv, Manaxe yog Amoo txwv, Amoo yog Yauxiya txwv,

¹¹ Yauxiya yog Yekhauniya hab nwg cov kwvtij txwv, yog nyob rua thaus puab raug kuav coj moog rua Npanpiloo.

¹² Lub swjhawm kws raug kuav moog rua Npanpiloo rov lug, Yekhauniya yog Se‑athi‑ee txwv, Se‑athi‑ee yog Xelunpanpee txwv,

¹³ Xelunpanpee yog Anpi‑u txwv, Anpi‑u yog Eliyakhi txwv, Eliyakhi yog Axo txwv,

¹⁴ Axo yog Xantau txwv, Xantau yog Akhi txwv, Akhi yog Eli‑u txwv,

¹⁵ Eli‑u yog Ele‑axa txwv, Ele‑axa yog Mathaa txwv, Mathaa yog Yakhauj txwv,

¹⁶ Yakhauj yug Yauxej kws yog Maivlag tug quasyawg, Maivlag yug Yexu kws hu ua Kheto.

¹⁷ Yog le nuav txwj thaus Aplahaa lug txug Tavi muaj kaum plaub tam, hab txwj thaus Tavi lug txug thaus raug kuav moog rua Npanpiloo muaj kaum plaub tam, hab txwj thaus raug kuav moog rua Npanpiloo lug txug tug Kheto muaj kaum plaub tam.

Yug Yexu

¹⁸ Qhov kws yug Yexu Kheto yog le nuav. Yauxej tub xub qhab Maivlag kws yog Yexu nam ua ntej lawm, tassws tsw tau lug ua txwj nkawm nyob ua ke mas pum tas Maivlag suab mivnyuas ntawm Vaaj Ntsuj Plig kws dawb huv lawm.

¹⁹ Mas Yauxej kws qhab nwg yog tuabneeg ncaaj, tsw xaav rhuav Maivlag ntsej muag, nwg txhad txav sab yuav tso Maivlag tuabywv tseg.

²⁰ Thaus nwg tseed xaav txug zaaj ntawd, nwg txawm ua npau suav pum ib tug tubkhai ntuj ntawm tug Tswv tuaj has rua nwg tas, “Yauxej, kws yog Tavi tug xeeb ntxwv, tsw xob ntshai qhov kws yuav coj Maivlag lug ua koj quaspuj, tsua qhov tug mivnyuas huv nwg lub cev yog xeeb ntawm Vaaj Ntsuj Plig kws dawb huv.

²¹ Nwg yuav yug ib tug tub mas koj yuav tsum tis lub npe hu ua Yexu, tsua qhov nwg yuav cawm nwg haiv tuabneeg kuas dim puab lub txem.”

²² Tej nuav huvsw tshwm lug sub txhad ua tav lawv le tug Tswv tej lug kws tug xwbfwb cev lug has tas,

²³ “Saib maj, ib tug ntxhais hluas dawb huv yuav xeeb mivnyuas hab yug tau ib tug tub, hab puab yuav tis lub npe hu ua Emanu‑ee.” (txhais has tas “Vaajtswv nrug nraim peb.”)

²⁴ Thaus Yauxej tswm dheev lug, nwg kuj ua lawv le tug Tswv tug tubkhai ntuj has rua nwg. Nwg coj Maivlag lug ua nwg quaspuj,

²⁵ tassws tsw nrug nwg pw ua ke moog txug thaus yug tug mivtub lawd. Mas Yauxej muab tis npe hu ua Yexu.