Malakau 1 - Vaajtswv Txujlug - lug Moob Ntsuab - txhais tshab xyoo 2004

Yauhaa kws coj ua kevcai raus dej

¹ Yexu Kheto kws yog Vaajtswv tug Tub txuj xuv zoo yog chiv le nuav moog.

² Yog lawv le Yaxaya kws yog xwbfwb cev Vaajtswv lug sau ca has tas, “Saib maj, kuv tso kuv tug tubkhai moog ua koj ntej, tug hov yuav npaaj koj txujkev ca.

³ Muaj ib lub suab qw huv tebchaws moj saab qhua has tas, ‘Ca le npaaj tug Tswv txujkev, ca le ua nwg txuj kev kuas ncaaj.’ ”

⁴ Yauhaa kws coj ua kevcai raus dej kuj tshwm lug rua huv tebchaws moj saab qhua. Nwg tshaaj tawm kuas ua kevcai raus dej qha tas ntxeev dua sab tshab txhad tau txais kev zaam txem.

⁵ Thoob plawg Yutia tebchaws hab cov tuabneeg huv Yeluxalee kuj tawm moog cuag nwg. Puab nyag leeg nyag lub txem txhum mas Yauhaa muab puab ua kevcai raus dej huv tug dej Yalatee.

⁶ Yauhaa naav tej rwg tsho kws muab plaub ntxhuav ua hab sa txuj hlaa tawv ntawm duav, nwg noj kooj ntaas hab zwb ntaab.

⁷ Nwg tshaaj tawm has tas, “Muaj ib tug yuav ua kuv qaab lug muaj fwjchim luj dua kuv, kuv tub tsw tswm nyog khoov moog daws nwg txuj hlua khau.

⁸ Kuv muab mej ua kevcai raus huv dej tassws nwg yuav muab mej ua kevcai raus huv Vaaj Ntsuj Plig kws dawb huv.”

Yexu ua kevcai raus dej hab raug daab swm

⁹ Lub swjhawm ntawd Yexu txawm tawm huv lub moos Naxale kws nyob huv lub xeev Kalilai tuaj, mas Yauhaa muab nwg ua kevcai raus dej huv tug dej Yalatee.

¹⁰ Thaus Yexu tawm huv dej lug taamswm nwg txawm pum rooj ntug qheb hlo hab Vaaj Ntsuj Plig zoo le ib tug nquab nqeg lug rua sau nwg.

¹¹ hab muaj suab has sau ntuj tuaj has tas, “Koj yog kuv tug Tub kws kuv hlub, kuv txaus sab rua koj heev.”

¹² Taamswm ntawd Vaaj Ntsuj Plig txawm txhwb Yexu moog rua huv tebchaws moj saab qhua.

¹³ Mas Yexu nyob huv tebchaws moj saab qhua raug Xataa swm tau plaub caug nub. Yexu nrug tsaj qus nyob hab cov tubkhai ntuj lug ua koom rua nwg.

Yexu hu plaub leeg ua thwjtim

¹⁴ Thaus Yauhaa raug nteg lawm, Yexu txawm moog rua Kalilai hab tshaaj tawm Vaajtswv txuj xuv zoo,

¹⁵ has tas, “Puv lub swjhawm lawm, hab Vaajtswv lub tebchaws lug ze lawm, ca le ntxeev dua sab tshab hab ntseeg txuj xuv zoo.”

¹⁶ Thaus Yexu moog lawv ntug Havtxwv Kalilai nwg pum Ximoo hab Ximoo tug kwv Anru, saamswm ntaus vaag huv havtxwv. Ob tug yog tuabneeg muab ntseg.

¹⁷ Yexu has rua ob tug tas, “Ca le lug, lawv kuv qaab, mas kuv yuav tsaa meb ua cov kws npu tuabneeg ib yaam le npu ntseg.”

¹⁸ Taamswm ntawd ob tug txawm tso ob tug tej vaag tseg hab lawv Yexu qaab moog.

¹⁹ Yexu moog rua tom ntej mivntswv kuj pum Xenpenti ob tug tub yog Yakaunpau hab nwg tug kwv Yauhaa saamswm ntxwv vaag huv lub nkoj.

²⁰ Taamswm ntawd Yexu txawm hu ob tug tes ob tug txawm tso leej txwv Xenpenti hab cov tub zug tseg rua huv lub nkoj mas lawv Yexu qaab moog.

Tug yawm kws raug daab

²¹ Puab moog rua huv lub moos Khapena‑u, tes txug nub Xanpatau Yexu txawm moog qhuab qha huv lub tsev sablaaj.

²² Puab kuj xaav tsw thoob rua tej lug kws nwg qha, tsua qhov nwg muaj fwjchim qhuab qha puab, tsw thooj le puab cov xwbfwb.

²³ Taamswm ntawd muaj ib tug yawm raug daab qas nyob huv tsev sablaaj qw nrov,

²⁴ has tas, “Yexu kws yog tuabneeg Naxale, koj tuaj thaab peb ua daabtsw? Koj tuaj ua kuas peb puam tsuaj lov? Kuv paub koj yog leejtwg, koj yog tug dawb huv ntawm Vaajtswv.”

²⁵ Yexu txawm txwv daab has tas, “Ca le nyob tuabywv, hab ca le tawm plawg huv nwg moog.”

²⁶ Tug daab qas ua rua tug hov fuam ib tshaaj, hab qw nrov nrov tawm huv nwg lawm.

²⁷ Suavdawg phemfwj heev sws thaam tas, “Tej nuav yog daabtsw? Yog tej lug qhuab qha tshab kws muaj fwjchim heev. Nwg has rua daab mas daab kuj noog nwg lug.”

²⁸ Taamswm ntawd Yexu lub moo txawm nrov nchaa moog thoob plawg lub xeev Kalilai.

Yexu khu Petu nam tais

²⁹ Taamswm ntawd Yexu txawm tawm huv tsev sablaaj moog mas Yakaunpau hab Yauhaa nrug nwg moog rua huv Petu hab Anru tsev.

³⁰ Ximoo nam tais pw saamswm ua npaws, puab txawm has rua Yexu paub.

³¹ Yexu txawm moog tuav nkaus nwg teg tsaa sawv tes nwg tug npaws txawm zoo hlo, nwg txawm ua koom rua puab.

³² Nub hov thaus nub poob qho lawm puab coj txhua tug muaj mob hab raug daab tuaj cuag Yexu.

³³ Taag nrho cov tuabneeg huv lub moos hov sau zog ua ke tuaj rua ntawm qhov rooj.

³⁴ Yexu khu cov kws muaj ntau yaam mob zoo coob coob huvsw hab ntab daab tawm coob heev. Nwg txwv tsw kheev cov daab hov has lug vem cov daab hov paub nwg.

Yexu qhuab qha txhua qhov

³⁵ Thaus sawv ntxuv tsw tau kaaj ntug Yexu sawv tseeg moog rua ib qho chaw kws tsw muaj tuabneeg nyob hab thov Vaajtswv hov ntawd.

³⁶ Ximoo hab cov kws nrug nwg ua ke kuj moog nrhav Yexu.

³⁷ Thaus puab ntswb nwg puab has rua nwg tas, “Suavdawg puavleej nrhav koj.”

³⁸ Yexu has rua puab tas, “Ca peb moog dua rua lwm lub zog kws nyob ib ncig nuav sub kuv txhad tshaaj tawm rua hov ntawd, tsua qhov kuv yeej lug ua teg num nuav.”

³⁹ Yexu txawm moog tshaaj tawm huv puab tej tsev sablaaj hab ntab daab tawm thoob plawg Kalilai tebchaws.

Yexu khu tug mob lis mob ruas

⁴⁰ Muaj ib tug mob lis mob ruas tuaj cuag nwg txhus caug ndua thov Yexu has tas, “Yog koj xaav khu, koj yeej khu tau kuv zoo kuas huv.”

⁴¹ Yexu taab ncuab nwg heev txawm cev hlo teg moog npuab nwg hab has rua nwg tas, “Kuv xaav los maj, ca le zoo hlo huv lauj.”

⁴² Taamswm ntawd nwg tej mob lis mob ruas txawm tawm huv nwg lub cev hab nwg zoo huv lawm.

⁴³ Yexu txwv tug hov tawv tawv, le tso nwg moog

⁴⁴ hab has rua nwg tas, “Tsw xob pav ib lus rua leejtwg noog hlo le, ca le moog qha koj lub cev rua tug pov thawj saib hab xyeem tej kws ua kevcai ntxuav kuas koj huv lawv le Mauxe qha tseg lawd ua timkhawv rua suavdawg.”

⁴⁵ Tassws tug hov tawm moog tes txawm chiv pav hab tshaaj tawm zaaj hov nchaa quas lug ua rua Yexu moog tsw tau taab meeg rua huv lub moos, nwg yuav tsum nyob saab nrau kws tsw muaj tuabneeg nyob. Mas muaj tuabneeg tuaj txhua qhov tuaj cuag Yexu.