Lukas 1 - Vaajtswv Txujlug - lug Moob Ntsuab - txhais tshab xyoo 2004

Tej lug kws sau rua The‑aufila

¹ Tub muaj coob leej yooj xeeb sau tej xwm txheej kws muaj tshwm lug tav taag rua huv peb lawm,

² lawv le cov tuabneeg kws qhov muag pum txwj thaus chiv lub keeb lug hab yog cov kws qha txuj xuv zoo tau muab cob rua peb lawm.

³ Kuv tub ua tuab zoo tshawb nrhav txhua yaam nuav txwj thaus chiv lub keeb lug lawm, kuv txhad pum zoo muab sau ua ib qeb zuj zug qha rua koj The‑aufila kws saib hlub,

⁴ sub koj txhad paub qhov tseeb txug zaaj nuav kws tub txeev muaj tuabneeg qha rua koj paub lawd.

Qha txug yuav yug Yauhaa

⁵ Thaus Helauj ua vaajntxwv kaav Yutia, muaj ib tug pov thawj hu ua Xekhaliya, kws nyob huv Apiya paab. Nwg tug quaspuj yog Aloo caaj ceg npe hu ua Elixanpe.

⁶ Vaajtswv pum tas ob tug yog tuabneeg ncaaj nceeg hab ua lub neej lawv nraim tug Tswv tej lug nkaw hab tej kaab ke huvsw, tsw muaj chaw thuaj le.

⁷ Tassws ob tug tsw muaj mivnyuas tsua qhov Elixanpe ib txwm yeej tsw xeeb mivnyuas, hab ob tug laug heev lawm.

⁸ Muaj ib nub yog txug Xekhaliya puab paab le caij ua pov thawj teg num ua koom rua Vaajtswv,

⁹ mas puab rhu ntawv lawv le cov pov thawj txuj kevcai mas rhu tau nwg moog hlawv moov tshuaj tsw qaab rua huv tug Tswv lub tuam tsev.

¹⁰ Lub swjhawm hlawv moov tshuaj tsw qaab hov ib tsoom pejxeem nyob saab nrau thov Vaajtswv.

¹¹ Tug Tswvib tug tubkhai ntuj txawm lug tshwm rua Xekhaliya pum sawv ntsug ntawm lub thaaj hlawv moov tshuaj tsw qaab saab xws.

¹² Thaus Xekhaliya pum dheev, nwg poob sab hab ntshai heev.

¹³ Tug tubkhai ntuj hov has rua nwg tas, “Xekhaliya, tsw xob ntshai, vem Vaajtswv tub noog koj tej lug thov lawm. Koj tug quaspuj Elixanpe yuav yug ib tug tub, mas koj yuav tsum tis tug tub hov lub npe hu ua Yauhaa.

¹⁴ Koj yuav muaj kev zoo sab xyiv faab, hab tuabneeg coob coob yuav xyiv faab qhov kws yug tug tub hov lug.

¹⁵ Tsua qhov tug Tswv pum tas tug tub hov tseem ceeb, hab nwg yuav tsw haus cawv txwv maab hab cawv ntxws hlo le hab nwg yuav muaj Vaaj Ntsuj Plig kws dawb huv puv npo txwj thaus nruab thab lug.

¹⁶ Nwg yuav coj Yixayee caaj ceg coob coob tig lug cuag tug Tswv kws yog puab tug Vaajtswv.

¹⁷ Nwg yuav muaj Eliya tug ntsuj plig hab tug fwjchim moog ua tug Tswv ntej ua rua leej txwv lub sab tig moog xwb rua cov mivnyuas hab ua kuas cov kws tawv ncauj tig lug noog cov kws ncaaj nceeg tug tswvyim, sub txhad ua tau ib haiv tuabneeg kws npaaj txhwj rua tug Tswv.”

¹⁸ Xekhaliya txawm has rua tug tubkhai ntuj has tas, “Kuv yuav paub tej nuav le caag? Tsua qhov kuv laug lawm hab kuv tug quaspuj kuj noob nyoog nchaav lawm.”

¹⁹ Tug tubkhai ntuj teb nwg tas, “Kuv yog Kali‑ee kws sawv ntawm Vaajtswv lub xubndag. Vaajtswv khaiv kuv lug has rua koj hab qha txuj xuv zoo nuav rua koj

²⁰ Saib maj, vem koj tsw ntseeg kuv tej lug kws yeej yuav tav lawv le lub swjhawm, koj yuav ruag has tsw tau lug moog txug nub kws tej xwm txheej nuav muaj tshwm lug.”

²¹ Cov tuabneeg kws tseed tog Xekhaliya kuj xaav tsw thoob ua caag nwg nyob ntev heev rua huv lub tuam tsev.

²² Thaus nwg tawm lug nwg has tsw tau lug rua puab lawm, mas puab txhad paub tas nwg tub pum ib zaaj yug quas toog huv lub tuam tsev. Nwg ua ruag pav rua puab hab has tsw tau lug moog le.

²³ Thaus taag lub swjhawm kws nwg ua nwg teg num nwg txawm rov moog tsev.

²⁴ Dhau ntawd nwg tug quaspuj Elixanpe txawm xeeb mivnyuas mas nyob tuabywv nraim cev tau tswb lub hlis. Nwg has tas,

²⁵ “Tug Tswv ua le nuav rua kuv, rua nub nua kws nwg tsaa qhov muag saib kuv txhad rhu tau qhov kws tuabneeg saib tsw taug kuv moog.”

Qha txug yuav yug Yexu

²⁶ Thaus Elixanpe xeeb mivnyuas tau rau lub hlis, Vaajtswv khaiv tug tubkhai ntuj Kali‑ee moog rua huv ib lub moos kws hu ua Naxale huv lub xeev Kalilai,

²⁷ moog cuag ib tug ntxhais dawb huv kws Yauxej kws yog Tavi caaj ceg tub qhab lawm. Tug ntxhais dawb huv hov npe hu ua Maivlag.

²⁸ Tug tubkhai ntuj lug has rua Maivlag tas, “Tug kws tau txais kev hlub 'e, koj ca le noj qaab nyob zoo. Tug Tswv nrug nraim koj.”

²⁹ Maivlag kuj ntxhuv sab vem tej lug ntawd, hab tshuaj saib tej lug ntawd yog le caag.

³⁰ Tug tubkhai ntuj has rua nwg tas, “Maivlag, tsw xob ntshai, koj yog tug kws Vaajtswv hlub.

³¹ Saib maj, koj yuav xeeb mivnyuas hab yuav yug tau ib tug tub, mas koj yuav tis nwg lub npe hu ua Yexu.

³² Nwg yuav ua tug luj hab yuav hu tas Vaajtswv kws luj dua ndais tug Tub. Tug Tswv kws yog Vaajtswv yuav pub nwg yawm koob Tavi lub zwm txwv rua nwg,

³³ mas nwg yuav ua vaajntxwv kaav Yakhauj caaj ceg moog ib txhws le, hab nwg lub tebchaws yuav tsw txawj kawg.”

³⁴ Maivlag has rua tug tubkhai ntuj hov tas, “Yuav ua le caag muaj tau le ntawd, tsua qhov kuv tsw tau nrug quasyawg pw hlo le.”

³⁵ Tug tubkhai ntuj has rua nwg tas, “Vaaj Ntsuj Plig kws dawb huv yuav lug rua sau koj, hab Vaajtswv kws luj dua ndais tug fwjchim yuav roog koj. Vem le nuav tug tub kws yuav yug lug hov txhad yuav hu tas dawb huv hab hu tas Vaajtswv tug Tub.

³⁶ Saib maj, Elixanpe kws txheeb koj tub laug heev los tau xeeb tub lawm. Nwgnuav tug kws luas has tas mooj los tub xeeb tub tau rau lub hlis lawm.

³⁷ Tsua qhov tsw muaj ib yaam daabtsw kws Vaajtswv yuav ua tsw tau.”

³⁸ Maivlag txhad has tas, “Kuv yog tug Tswv tug nkauj qhev. Ca le muaj rua kuv lawv le koj tej lug.” Tes tug tubkhai ntuj txawm moog lawm.

Maivlag moog tshaam Elixanpe

³⁹ Lub swjhawm ntawd Maivlag sawv kev tseeg maaj nroog moog peg roob yuav moog rua Yuta ib lub moos,

⁴⁰ hab nkaag moog rua huv Xekhaliya lub tsev hab moog fem Elixanpe.

⁴¹ Thaus Elixanpe nov Maivlag tej lug hov tug mivnyuas huv Elixanpe lub plaab txawm nti, hab Elixanpe tau Vaaj Ntsuj Plig kws dawb huv puv nkaus,

⁴² nwg txawm qw nrov tas, “Huv ib tsoom quaspuj koj tau moov zoo hab tug mivnyuas huv koj lub plaab kuj tau moov zoo.

⁴³ Ua caag kuv yuav tau tej nuav, yog qhov kws kuv tug Tswv leej nam tuaj cuag kuv?

⁴⁴ Saib maj, thaus kuv lub qhov ntsej nov koj lub suab hu kuv, tug mivnyuas huv kuv lub plaab txawm nti xyiv faab.

⁴⁵ Tug quaspuj kws ntseeg tas tej kws tug Tswv tau has rua nwg yuav tav mas tau nyob kaaj sab lug.”

Maivlag zaaj nkauj qhuas

⁴⁶ Maivlag txawm has tas, “Kuv lub sab qhuas tug Tswv,

⁴⁷ hab kuv tug ntsuj plig xyiv faab rua Vaajtswv kws yog kuv tug Cawmseej.

⁴⁸ Tsua qhov nwg saib rua nwg tug nkauj qhev kws nyob rua lub chaw qeg. Saib maj, txwj nuav moog txhua tam tuabneeg yuav hu kuv tas tug kws nyob kaaj sab lug,

⁴⁹ vem yog tug kws muaj fwjchim luj kawg nkaus ua teg num luj kawg rua kuv, nwg lub npe dawb huv.

⁵⁰ Nwg txujkev khuvleej muaj rua cov kws fwm hab paub ntshai nwg, ib tam dhau ib tam.

⁵¹ Nwg txhais npaab ua nwg tug fwjchim tshwm lug, nwg ua rua cov kws lub sab khaav theeb tawg ua saab ua sua moog.

⁵² Nwg txu cov thawj nqeg ntawm puab lub zwm txwv, hab tsaa cov kws poob qeg tau nyob lub chaw sab.

⁵³ Nwg pub yaam kws zoo rua cov kws tshaib tau noj tsau npo, hab nwg tso cov nplua nuj moog teg dawb teg do.

⁵⁴ Nwg paab nwg tug tub qhe Yixayee, hab ncu txug nwg txujkev khuvleej,

⁵⁵ lawv le nwg tau has rua peb tej laug kws yog Aplahaa hab Aplahaa caaj ceg moog ib txhws.”

⁵⁶ Maivlag nrug Elixanpe nyob kwvlaam tau peb lub hlis le rov moog tsev.

Yug Yauhaa kws coj ua kevcai raus dej

⁵⁷ Thaus txug caij kws Elixanpe yug mivnyuas nwg yug tau ib tug tub.

⁵⁸ Thaus nwg tej txheeb ze hab kwvtij zej zog nov tas tug Tswv ua txujkev khuvleej tshwm lug rua nwg ntau kawg, puab nrug nwg zoo sab xyiv faab.

⁵⁹ Thaus puv yim nub puab tuaj muab tug mivnyuas hov ua kevcai txav hab yuav muab nwg tis npe hu ua Xekhaliya lawv le leej txwv.

⁶⁰ Tassws leej nam has tas, “Tsw yog. Yuav tsum tis hu ua Yauhaa.”

⁶¹ Puab has rua nwg tas, “Koj cov kwvtij tsw muaj ib tug hu le ntawd.”

⁶² Puab txawm ua ruag pav rua leej txwv nug saib nwg yuav hu tug mivnyuas npe le caag.

⁶³ Xekhaliya txawm thov ib daim txag sau ntawv mas sau has tas, “Nwg lub npe hu ua Yauhaa.” Puab suavdawg kuj xaav tsw thoob le.

⁶⁴ Taamswm hov Xekhaliya lub qhov ncauj hab tug nplaig txawm zoo hlo hab nwg has lug qhuas Vaajtswv.

⁶⁵ Tej kwvtij zej zog suavdawg kuj ntshai kawg. Luas sws thaam txug tej xwm txheej nuav huvsw thoob plawg peg Yutia tej roob huvsw.

⁶⁶ Suavdawg kws tau nov kuj muab cim ca rua nruab sab hab has tas, “Tug mivnyuas nuav yuav zoo le caag rua tom hauv ntej?” Tsua qhov tug Tswv txhais teg nrug nraim nwg.

Xekhaliya has txug tom hauv ntej

⁶⁷ Xekhaliya kws yog leej txwv puv npo Vaaj Ntsuj Plig kws dawb huv hab has cev Vaajtswv lug has tas,

⁶⁸ “Qhuas tug Tswv kws yog cov Yixayee tug Vaajtswv, tsua qhov nwg lug saib hab txhwv nwg haiv tuabneeg,

⁶⁹ hab tsaa muaj ib tug kub huv nwg tug qhev Tavi caaj ceg lug paab peb dim,

⁷⁰ lawv le nwg kuas cov xwbfwb dawb huv thau u lub qhov ncauj has ca lawd,

⁷¹ yog cawm peb dim huv peb cov yeeb ncuab hab txhua tug kws ntxub peb txhais teg.

⁷² Nwg ua nwg txujkev khuvleej tshwm rua peb tej laug, hab ncu ntsoov nwg tej lug cog tseg kws dawb huv,

⁷³ yog tej lug kws nwg cog twv tseg rua peb yawm koob Aplahaa tas,

⁷⁴ thaus peb dim huv peb cov yeeb ncuab txhais teg lawm, nwg yuav pub kuas peb ua koom tau rua nwg tsw ntshai daabtsw hlo le,

⁷⁵ hab ua tuabneeg dawb huv hab ncaaj nceeg rua ntawm nwg lub xubndag moog taag peb swm neej.

⁷⁶ Mivtub 'e, puab yuav hu koj tas tug xwbfwb kws cev Vaajtswv kws luj dua ndais tej lug, tsua qhov koj yuav ua tug Tswv ntej npaaj kev rua nwg,

⁷⁷ hab yuav qha txujkev cawm dim rua nwg haiv tuabneeg paub, yog qhov kws zaam puab lub txem.

⁷⁸ Vem peb tug Vaajtswv lub sab taab ncuab peb, tug duab kaaj sau ntuj txhad lug txug peb,

⁷⁹ hab yuav ci moog rua cov tuabneeg kws nyob huv txujkev tsaus ntuj hab nyob huv txujkev tuag tug duab ntxoo, sub txhad coj peb txhais kwtaw taug txujkev kaaj sab lug.”

⁸⁰ Tug mivnyuas ntawd kuj hlub zoo hab nwg tug ntsuj plig muaj zug tuaj, hab nwg nyob huv tebchaws moj saab qhua moog txug nub kws nwg lug tshwm rua cov Yixayee pum.