Henplais 1 - Vaajtswv Txujlug - lug Moob Ntsuab - txhais tshab xyoo 2004

Vaajtswv swv nwg tug Tub has

¹ Yaav thau u Vaajtswv swv cov xwbfwb cev lug has rua peb tej laug ntau zag hab swv ntau yaam txujci,

² tassws tam kawg nuav nwg has ntawm nwg tug Tub rua peb, yog tug kws nwg tsaa lug saws ib puas tsaav yaam ua qub txeeg qub teg, hab yog tug kws nwg swv tswm lub ntuj lub teb huvsw.

³ Leej Tub xyeem kuas pum Vaajtswv tug duab ci ntsaa ab, nwg tug yaam ntxwv zoo thooj le Vaajtswv txhua yaam huvsw, nwg swv nwg tej lug kws muaj fwjchim luj tuav rawv ib puas tsaav yaam huvsw ca. Thaus nwg ntxuav tej kev txhum tseg huvsw lawm nwg nyob tsawg ntawm Vaajtswv kws luj dua ndais saab teg xws sau ntuj ceeb tsheej,

⁴ txhad zoo dhau cov tubkhai ntuj ib yaam le kws nwg tau lub npe kws tswm txaj dua cov tubkhai ntuj tej npe.

Leej Tub luj dhau cov tubkhai ntuj

⁵ Tsua qhov muaj ib tug tubkhai twg kws Vaajtswv has rua nwg tas, “Koj yog kuv tug Tub, nub nua kuv yug tau koj lawm”? Lossws has tas, “Kuv yuav ua nwg leej txwv hab nwg yuav ua kuv tug tub.”?

⁶ Hab muaj dua ib zag thaus Vaajtswv coj nwg tug Tub hlub lug rua huv lub nplajteb nwg has tas, “Ca Vaajtswv cov tubkhai ntuj suavdawg pe hawm tug Tub.”

⁷ Has txug cov tubkhai ntuj nwg has tas, “Nwg tswm nwg cov tubkhai ntuj zoo ib yaam le cua, hab tswm nwg cov tub qhe zoo ib yaam le nplaim tawg.”

⁸ Tassws has txug nwg leej Tub nwg has tas, “Au Vaajtswv, koj lub zwm txwv muaj nyob moog ib txhws tsw kawg. Tug cwj kws ua vaajntxwv kaav yog tug cwj ncaaj nceeg.

⁹ Koj nyam txujkev ncaaj nceeg, koj ntxub txujkev limham. Vem le nuav Vaajtswv, koj tug Vaajtswv, tau muab cov roj kws ua kuas zoo sab xyiv faab laub tsaa koj ua luj dua koj cov kwvluag.”

¹⁰ Hab has tas, “Au tug Tswv, thau u koj tag taw rua lub nplajteb, hab lub ntuj yog koj txhais teg ua.

¹¹ Tej hov yuav puam tsuaj taag, tassws koj yuav nyob moog le, tej hov yuav txawj qub yaam le tej tsoog tsho.

¹² Koj yuav muab tej hov dov ib yaam le dov thooj ntaub hab raug muab hloov ib yaam tej tsoog tsho. Tassws koj tseed zoo le qub, hab koj lub naj lub xyoo tsw txawj kawg.”

¹³ Muaj tug tubkhai ntuj twg kws Vaajtswv has rua nwg tas, “Ca le nyob tsawg ntawm kuv saab xws, moog txug thaus kuv muab koj cov yeeb ncuab ua koj lub rooj tag taw.”?

¹⁴ Tej tubkhai ntuj yog tej ntsuj plig kws ua Vaajtswv teg num kws raug khaiv moog ua koom rua cov kws yuav tau txujkev dim los tsw yog?