Hanpaku 1 - Vaajtswv Txujlug - lug Moob Ntsuab - txhais tshab xyoo 2004

Hanpaku ywg tej kws ua tsw ncaaj

¹ Nuav yog Vaajtswv tej lug kws Hanpaku kws yog xwbfwb cev lug pum.

² Au Yawmsaub, kuv yuav quaj thov kev paab ntev le caag, los koj tsw nov, lossws kuv yuav quaj thov koj has tas, “Muaj kev limham ndais ntuj,” los koj tsw cawm?

³ Ua caag koj yuav ca kuv pum tej kws ua tsw ncaaj hab saib ntsoov tej kev ceblaaj? Txujkev puam tsuaj hab kev ua limham ndais ntuj nyob ntawm kuv xubndag, txujkev sws tshe hab kev sws caam kuj tshwm tuaj.

⁴ Vem le nuav txuj kevcai txhad tsw nruj hab tsw muaj kev tu plaub ncaaj hlo le. Cov tuabneeg limham vej cov tuabneeg ncaaj nceeg ca, txhad tu plaub tsw ncaaj.

Yawmsaub tej lug teb

⁵ “Ca le tsaa muag saib pum ib tsoom tebchaws, ca le phemfwj hab xaav tsw thoob, tsua qhov lub swjhawm kws mej nyob kuv saamswm ua tej kws yog kuv has ua ntej los mej yuav tsw ntseeg.

⁶ Kuv saamswm tshoov cov Kheentia kws yog haiv tuabneeg nyaum hab sab kub heev, kws moog thoob lub nplajteb txeeb hlo tej vaaj tse kws tsw yog puab le.

⁷ Puab yog cov kws txaus ntshai sab puag quas tsug, puab txujcai hab puab lub koob meej puab rhawv puab xwb.

⁸ Puab tej neeg nrawm dua tsuv pom txwv, hab nyaum dua tej maa kws tawm mo ntuj. Puab cov tub rog caij neeg dha fuas ntej moog khaav quas ntxhas. Puab cov tub rog caij neeg tuaj deb deb tuaj, puab yaa moog yaam nkaus le tug daav qwv tis nkaus lug tum.

⁹ Puab suavdawg tuaj ua limham ndais ntuj, luas ntshai quas rwg puab rua ntawm puab hauv ntej, puab nteg tau tuabneeg coob cuag le xuab zeb.

¹⁰ Puab thuaj luag tej vaajntxwv hab luag cov thawj kaav. Puab thuaj luag txhua lub chaw ruaj khov, puab tsub aav nce txeeb tau tej chaw hov.

¹¹ Puab hlaa dhau plawg moog yaam le cua ntsawj, puab yog tuabneeg muaj txem, puab tug fwjchim yog puab tug timtswv.”

Hanpaku ywg zag ob

¹² Au kuv tug Vaajtswv Yawmsaub, yog kuv tug Tswv kws Dawb Huv, koj tsw tau nyob ib txwm lug lov? Peb yuav tsw tuag. Au Yawmsaub, koj tsaa puab ua cov txav txem. Au txhwb zeb, koj tsaa puab ua cov kws nplawm qhuab qha.

¹³ Koj lub qhov muag dawb huv dhau kws yuav saib qhov phem, hab koj tsw xaav saib tej kws ua tsw ncaaj. Ua caag koj yuav tsaa muag saib cov kws faav xeeb, hab nyob tuabywv rua thaus cov tuabneeg limham nqog tug kws ncaaj nceeg dua le puab?

¹⁴ Koj muab tuabneeg ua zoo le tej ntseg huv havtxwv, zoo yaam le tej tsaj nkaag huv aav kws tsw muaj tug thawj.

¹⁵ Tug yeeb ncuab xuas nqai lauj nqai puab txhua tug lug, nwg xuas tswg hai puab lug, nwg xuas vaag ntaus puab lug, nwg txhad xyiv faab hab zoo sab kawg.

¹⁶ Vem le nuav nwg txhad xyeem hov txhua chaw rua nwg phob tswg, hab hlawv moov xyaab rua nwg lub vaag. Vem nwg swv tej nuav nwg txhad muaj nplua quas mag hab noj tej zaub mov kws zoo heev.

¹⁷ Nwg tseed yuav nchus cov ntseg huv lub vaag moog le, hab tua ib tsoom tebchaws tsw khuvleej hlo le lov?