Amaus 1 - Vaajtswv Txujlug - lug Moob Ntsuab - txhais tshab xyoo 2004

Rau txem rua tej tebchaws kws nyob ib ncig Yixayee

¹ Nuav yog Amau kws yog ib tug yug yaaj huv lub moos Thekhau‑a tej lug kws nwg tau pum ntswg txug cov Yixayee rua thaus Uxiya ua vaajntxwv kaav Yuta tebchaws hab Yau‑as tug tub Yelaunpau‑aa ua vaajntxwv kaav Yixayee tebchaws ua ntej kws ntuj qeg ob xyoos.

² Nwg has tas, “Yawmsaub lub suab nyooj quas lawg huv Xi‑oo tuaj, hab nwg tsaa lub suab nrov huv Yeluxalee tuaj. Cov kws yug yaaj tej tshaav zaub qhuav taag, lub ncov roob Khamee tuag tshaav.”

³ Yawmsaub has le nuav tas, “Qhov kws Ntamaxaka ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab tau muab thob log hlau luam Kile‑a.

⁴ Vem le nuav kuv yuav tso suavtawg lug rua sau Haxa‑ee lub tsev, mas suavtawg yuav kub Npeehanta tej chaw ruaj khov.

⁵ Kuv yuav luv Ntamaxaka tej laag rooj pov tseg, hab rhuav tshem cov tuabneeg tawm huv lub haav Avee moog, hab ntab tug kws tuav rawv tug cwj kaav huv lub moos Npe‑entee tawm moog. Cov pejxeem huv Alaa tebchaws yuav raug poob tebchaws moog rua lub moos Khi.” Yawmsaub has le nuav ntaag.

⁶ Yawmsaub has le nuav tas, “Qhov kws lub moos Kaxa ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab kuav cov pejxeem huvsw tawm tebchaws coj moog cob rua cov Entoo.

⁷ Vem le nuav kuv yuav tso suavtawg lug rua sau Kaxa tej ntsaa loog, mas suavtawg yuav kub Kaxa tej chaw ruaj khov.

⁸ Kuv yuav rhuav tshem cov tuabneeg tawm huv lub moos Asantau moog hab ntab tug kws tuav rawv tug cwj kaav huv lub moos Akheloo tawm moog. Kuv yuav tig hlo kuv txhais teg tawm tsaam lub moos Ekhoo, mas cov Filixatee kws tseed tshuav yuav puam tsuaj taag huvsw.” Vaajtswv Yawmsaub has le nuav ntaag.

⁹ Yawmsaub has le nuav tas, “Qhov kws lub nroog Thailab ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab kuav cov pejxeem huvsw tawm tebchaws coj moog cob rua cov Entoo, puab tsw ncu txug tej lug cog tseg sws raug zoo.

¹⁰ Vem le nuav kuv yuav tso suavtawg lug rua sau Thailab tej ntsaa loog, mas suavtawg yuav kub Thailab tej chaw ruaj khov.”

¹¹ Yawmsaub has le nuav tas, “Qhov kws cov Entoo ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab tau xuas rag xuas ntaaj lawv caum puab tug kwv, hab tso plhuav txujkev khuvleej pov tseg, puab txujkev chim muaj tsw tu le, hab puab npau tawg quas vog moog ib txhws.

¹² Vem le nuav kuv yuav tso suavtawg lug rua sau lub moos Themaa, hab suavtawg yuav kub lub moos Npauxa tej chaw ruaj khov.”

¹³ Yawmsaub has le nuav tas, “Qhov kws cov Aamoo ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab tau muab tej quaspuj kws suab mivnyuas tej plaab phua huv Kile‑a, sub puab txhad le nthuav puab lub tebchaws daav tuaj.

¹⁴ Vem le nuav kuv yuav zwg tawg rua lub moos Lanpa tej ntsaa loog, mas suavtawg yuav kub lub moos hov tej chaw ruaj khov, hab yuav muaj lub suab qw nrov rua nub kws ua rog, hab yuav muaj cua daaj cuab dub ntsawj rua nub kws muaj khaub zeeg cua.

¹⁵ Puab tug vaajntxwv hab nwg cov thawj yuav ua ke raug poob tebchaws.” Yawmsaub has le nuav ntaag.