ኀበ ቲቶ 1 - ሐዲስ ኪዳን በልሳነ ግእዝ

ምዕራፍ 1

¹ እምጳውሎስ ገብሩ ለእግዚአብሔር ወሐዋርያሁ ለኢየሱስ ክርስቶስ በሃይማኖቶሙ ለኅሩያኒሁ ለእግዚአብሔር ወአእምሮ ጽድቅ ዘበጽድቁ ለእግዚአብሔር።

² ወበተስፋ ሕይወት ዘለዓለም ዘአሰፈወ እግዚአብሔር ዘኢይሔሱ እምፍጥረተ ዓለም።

³ ወአርአየ ቃሎ በዕድሜሁ በስብከተ ዚኣነ ኪያሁ ወተአመነኒ ሊተ ላዕሌሁ በትእዛዘ እግዚአብሔር መድኀኒነ።

⁴ ለቲቶ ወልድየ ዘአፈቅር በተፋቅሮ ወበሃይማኖት ሰላም ለከ ጸጋ ወሣህል እምኀበ እግዚአብሔር አቡነ ወእግዚእነ ኢየሱስ ክርስቶስ መድኀኒነ።

በእንተ ሢመተ ክህነት

⁵ እስመ እንበይነ ዝንቱ ኀደጉከ ውስተ ቀርጤስ ከመ ታስተራትዕ ዘተርፈ ወትሢም ቀሲሳነ ለለ አህጉር በከመ አዘዝኩከ።

⁶ ብእሴ ዘአሐተ ብእሲተ አውሰበ ኅሩየ ዘኢየሐምይዎ በእኩይ ዘቦ ውሉድ መሃይምናን ዘኢያስተዋድይዎሙ በምርዓት እለ ኢኮኑ ዝሉፋነ እለ ይትኤዘዙ።

⁷ ወርቱዕ ይሠየም ጳጳሰ ዘአልቦ ሐሜት ዘኢያደሉ ከመ መጋቤ እግዚአብሔር ዘኢኮነ መዓትመ ዘልቡብ ዘኢያበዝኅ ሰትየ ወይን ወኢያፈጥን እዴሁ ለዘቢጥ ዘኢደፋሪ ወኢዝኁር ወዘኢያፈቅር ንዋየ ከንቶ።

⁸ መፍቀሬ ነግድ፥ ዘሠናይ ምግባሩ ዘአንጽሐ ርእሶ ጻድቅ ወኄር ወየዋህ ወመስተዓግሥ ዘያነሐሲ ዘምሁር ቃለ ሃይማኖት።

⁹ ዘይክል ገሥጾ በትምህርተ ሕይወት ወይዛለፎሙ ለእለ ይትዋሥኡ።

¹⁰ እስመ ብዙኃን እለ ኢይትኤዘዙ ወነገሮሙኒ ከንቱ ወያስሕትዎሙ ለጽሉላነ ልብ።

¹¹ ወፈድፋደሰ ለእለ እምአይሁድ እለ ርቱዕ ይፍፅምዎሙ አፉሆሙ እስመ እሉ ይገፈትዑ አብያተ ኵሉ ወይሜህሩ በዘኢይደሉ በዘይረብሖሙ ኀሣር።

¹² ወናሁ ይቤ አሐዱ እምኔሆሙ ነቢዮሙ በእንቲኣሆሙ እስመ ሰብአ ቀርጤስ መደልዋን ሐሳውያን ዘልፈ አራዊት እኩያን ከርሠ መካን ወዝንቱ ስምዕ እሙን ላዕሌሆሙ።

¹³ ወበእንተ ዝንቱ ተዛለፎሙ ምቱረ ከመ ይጠይቁ በሃይማኖት።

¹⁴ ወኢያምጽኡ መሐደምተ ወሥርዐተ ሰብእ ዘይመይጣ ለጽድቅ።

¹⁵ እስመ ኵሉ ዘኮነ ንጹሕ ለንጹሓን ወለርኩሳንሰ እለ ኢየአምኑ አልቦሙ ንጹሕ ምንትኒ።

¹⁶ እስመ ርኩስ ኅሊናሆሙ ወበልቦሙ የአምኑ ከመ ዘየአምርዎ ለእግዚአብሔር ወይክሕድዎ በምግባሮሙ ርኩሳን እሙንቱ ወከሓድያን ወምኑናን በውስተ ኵሉ ምግባረ ሠናይ።