ኀበ ሰብአ ሮሜ 1 - ሐዲስ ኪዳን በልሳነ ግእዝ

ምዕራፍ 1 በእንተ ጽዋዔሁ ለጳውሎስ

¹ እምጳውሎስ ገብሩ ለእግዚእነ ኢየሱስ ክርስቶስ ወሐዋርያ ዘተጸውዐ ወተፈልጠ ለትምህርተ ወንጌለ እግዚአብሔር።

² ዘአቅደመ ነጊረ በአፈ ነቢያቲሁ ወመጻሕፍቲሁ ቅዱሳት።

³ በእንተ ወልዱ ዘተወልደ ወመጽአ እምዘርዐ ዳዊት በሥጋ ሰብእ።

⁴ ወአርአየ ከመ ወልደ እግዚአብሔር ውእቱ በኀይሉ ወበመንፈሱ ቅዱስ ከመ ተንሥአ እሙታን ኢየሱስ ክርስቶስ እግዚእነ።

⁵ ዘቦቱ ረከብነ ጸጋ ወተሠየምነ ሐዋርያተ ከመ ናስምዖሙ ለአሕዛብ ወይእመኑ በስሙ።

⁶ ከመ አንትሙኒ ይእዜ ኮንክሙ ጽዉዓነ በኢየሱስ ክርስቶስ።

በእንተ ጽዉዓን ወበእንተ ሃይማኖቶሙ

⁷ ለኵሎሙ እለ ሀለዉ ብሔረ ሮሜ ፍቁራኒሁ ለእግዚአብሔር ወኅሩያኒሁ ወቅዱሳኒሁ ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

⁸ አቀድም አእኵቶቶ ለእግዚአብሔር በኢየሱስ ክርስቶስ በእንተ ኵልክሙ እስመ ተሰምዐት ሃይማኖትክሙ ውስተ ኵሉ ዓለም።

⁹ ወእግዚአብሔር ሰማዕትየ ዘኪያሁ አመልክ በኵሉ መንፈስየ ወበትምህርተ ወልዱ ከመ እዜከረክሙ በጸሎትየ ዘልፈ።

¹⁰ ወእስእል ከመ ይሠርሐኒ እግዚአብሔር በፈቃዱ እምጻእ ኀቤክሙ።

¹¹ እስመ እፈቅድ እርአይክሙ ወከመ ትርከቡ ጸጋሁ ለመንፈስ ቅዱስ በእንተዝ ከመ ይትፈሣሕ ልብክሙ እስመ ኀበርክሙ አሚነ ምስሌየ።

በእንተ ጻሕቀ መምህራን ወዕሴቶሙ

¹² ወእፈቅድ ባሕቱ ታእምሩ አኀዊነ ከመ ዘልፈ እፈቅድ እምጻእ ኀቤክሙ ወይሰአነኒ እስከ ይእዜ።

¹³ ወለእመኒቦ ከመ እርከብ ዕሴትየ በላዕሌክሙ ከመ በላዕለ አሕዛብኒ።

¹⁴ ወበላዕለ አረሚኒ ወበላዕለ ሐቃልኒ ወለጠቢባንኒ ወለአብዳንኒ እስመ ይደልወኒ ለኵሉ ሰብእ እምሀር።

¹⁵ ወዓዲ ፈድፋደ እጽሕቅ ለክሙ ለእለ ብሔረ ሮሜ እምሀርክሙ።

¹⁶ እስመ ኢየኀፍር ምህሮ ወንጌሉ እስመ ኀይሉ ለእግዚአብሔር ውእቱ ዘያሐይዎሙ ለኵሎሙ እለ የአምኑ ቦቱ ለአይሁዳዊ ቀዳማዊ ወለአረማዊኒ ደኃራዊ።

¹⁷ ወቦቱ ያስተርኢ ጽድቀ እግዚአብሔር ወርትዑ እስመ ያጸድቆሙ ለእለ የአምኑ ቦቱ በአሚን እስመ ከማሁ ይብል መጽሐፍ «ጻድቅአ በአሚን የሐዩ።»

በእንተ መቅሠፍት ዘይመጽእ ላዕለ ኃጥኣን

¹⁸ ወይመጽእ መቅሠፍተ እግዚአብሔር እምሰማይ ላዕለ ኵሉ ሰብእ ኃጥእ ወዐማፂ እለ የአምርዋ ለጽድቅ ወይመይጥዋ በዓመፃሆሙ።

¹⁹ እስመ አእምሮ እግዚአብሔር ክሡት በኀቤሆሙ ወአርአየ እግዚአብሔር ላዕሌሆሙ።

²⁰ ወዘኢያስተርኢ እግዚአብሔር እምፍጥረተ ዓለም ይትዐወቅ በፍጥረቱ በኀልዮ ወበአእምሮ ወከመዝ ይትአመር ኀይሉ ወመለኮቱ ዘለዓለም ከመ ኢይርከቡ በዘይትዋሥኡ።

²¹ እስመ እንዘ የአምርዎ ለእግዚአብሔር አኮ ከመ እግዚአብሔር ዘአእኰትዎ ወሰብሕዎ ዘእንበለ ዘሐሰውዎ ወረኵሱ በኅሊናሆሙ ወተጸለለ ልቦሙ።

²² ወእንዘ ይፈቅዱ ይጥብቡ አብዱ።

²³ እስመ ወለጡ ስብሐቲሁ ለእግዚአብሔር ዘኢይመውት ወአምሳለ ርእየተ ሰብእ መዋቲ ረሰዩ ወከመ እንስሳ ወከመ አራዊት ወከመ አዕዋፍ።

²⁴ ወበእንተዝ አግብኦሙ ወኀደጎሙ ከመ ያርኵሱ ርእሶሙ ለሊሆሙ ወያኅሥሩ ነፍስቶሙ።

²⁵ እስመ ሐሰተ ረሰይዎ ለጽድቀ እግዚአብሔር ወአምለኩ ወተፀአፅኡ ተግባሮ ወኀደግዎ ለፈጣሬ ኵሉ ዘውእቱ አምላክ ቡሩክ ለዓለመ ዓለም አሜን።

²⁶ ወበእንተዝ ወሀቦሙ እግዚአብሔር መቅሠፍተ እኩየ ወአንስቲያሆሙኒ ኀደጋ ፍጥረቶን ወተመሰላ በዘኢኮነ ፍጥረቶን።

²⁷ ወከማሁ ዕደዊሆሙኒ ኀደጉ አንስቲያሆሙ ወነዱ በፍትወቶሙ ወገብኡ በበይናቲሆሙ ብእሲ ላዕለ ብእሲ ኀሣሮሙ ገብሩ ወባሕቱ ይረክቡ ፍዳሆሙ ወይገብእ ጌጋዮሙ ዲበ ርእሶሙ።

²⁸ ወበከመ ኢኀለይዎ ለእግዚአብሔር በልቦሙ ከማሁ እግዚአብሔርኒ ወሀቦሙ ልበ እበድ ከመ ይግበሩ ዘንተ ዘኢይደሉ።

²⁹ እንዘ እሙንቱ ጽጉባነ ኵሉ ዓመፃ ወእከይ ወጹግ ወትዕግልት ወጽጉባነ ቅንአት ሐማምያን ቀታልያን ጕሕላውያን መስተመይናን ዝኁራን እኩያነ ልማድ ወግዕዝ።

³⁰ ሐማይያን መስተሣልቃን መስተሐብባን ዕቡያን ዝሉፋን ዐላውያን ሐሳውያን ጸላእያነ እግዚእ ሥሑጻን።

³¹ አብዳን ወዝንጉዓን ወመስተኃሥሣን ለእከይ ወአልቦሙ ምሕረት።

³² እንዘ ለሊሆሙ የአምሩ ኵነኔሁ ለእግዚአብሔር ከመ ይደልዎ ሞት ለዘገብረ ዘንተ ከመዝ አኮ ባሕቲቶሙ ዘይገብርዎ ዓዲ ለባዕድኒ ይዌሕክዎ ያግብእዎ።