ራእዩ ለዮሐንስ 1 - ሐዲስ ኪዳን በልሳነ ግእዝ

ምዕራፍ 1 በእንተ ምጽአተ እግዚእ

¹ ራእዩ ለዮሐንስ ዘከመ ርእዮ ለኢየሱስ ክርስቶስ ዘወሀቦ እግዚአብሔር ከመ ያርእዮሙ ለአግብርቲሁ ዘሀለዎ ይኩን ፍጡነ ወዘይከውን እምድኅረዝ ወፈነወ ምስለ መልአኩ ኀበ ዮሐንስ ገብሩ።

² ዘኮነ ስምዐ በእንተ ቃለ እግዚአብሔር ወበእንተ ስምዑ ለኢየሱስ ክርስቶስ ወበእንተ ኵሉ ዘርእየ።

³ ወብፁዕ ውእቱ ዘያነብቦ ወዘይሰምዕ ቃለ ተነብዮቱ ለዝንቱ መጽሐፍ ወዘየዐቅብ ዘጽሑፍ ውስቴቱ እስመ ቅሩብ ዘመኑ።

⁴ ዘጸሐፈ ዮሐንስ ለሰብዑ አብያተ ክርስቲያናት እለ ውስተ እስያ ሞገሱ ለክሙ ወሰላሙ እምኀበ ዘሀሎ ወይሄሉ ዘመጽአ ወዘይመጽእ ወእምነ ሰብዐቱ መንፈስ ዘቅድመ መንበሩ ለኢየሱስ ክርስቶስ።

⁵ ዘውእቱ ስምዕ መሃይምን ወውእቱ ቀደመ በኵረ ከዊነ እምነ ምዉታን ዘተንሥአ ወውእቱ መኰንኖሙ ለነገሥተ ምድር ውእቱ ዘአፍቀረክሙ ወኀፀበክሙ እምኀጣውኢክሙ በደሙ።

⁶ ወረሰየክሙ ውስተ መንግሥተ ቅድሳተ አቡሁ እግዚአብሔር ዘሎቱ ስብሐት ወኀይል ለዓለመ ዓለም አሜን።

⁷ ናሁ ይመጽእ በደመና ሰማይ ወትሬእዮ ኵላ ዐይን ወእልክቱሂ እለ ወግእዎ ይኔጽርዎ ወይበክዩ በእንቲኣሁ ኵሎሙ አሕዛበ ምድር እወ ወአማን።

⁸ አነ ውእቱ አልፋ ወዖ ይቤ እግዚአብሔር ዘሀሎ ወይሄሉ ዘመጽአ ወዘይመጽእ ዘውእቱ ይመልክ ኵሎ።

በእንተ ሰብዑ መኃትው ወዘማእከሎሙ

⁹ ወአነ ዮሐንስ እኁክሙ ወሱታፌክሙ በሕማምክሙ ወበመንግሥትክሙ ወበትዕግሥትክሙ በእንተ ትዕግሥቱ ለኢየሱስ ክርስቶስ ወእንዘ ሀሎኩ ውስተ ደሴት እንተ ስማ ፍጥሞ በእንተ ቃለ እግዚአብሔር ወበእንተ ስምዑ ለኢየሱስ።

¹⁰ መጽአ ላዕሌየ መንፈስ በዕለተ እሑድ ወሰማዕኩ ቃለ ዐቢየ እምድኅሬየ ከመ ቃለ ቀርን።

¹¹ ወይቤለኒ ጸሐፍ እንከ ዘትሬኢ ወዘትሰምዕ ውስተ መጽሐፍ ወፈኑ ለአብያተ ክርስቲያናት ሰብዐቱ እለ ውስተ እስያ ዘኤፌሶን ወዘሴሜርኔስ ወዘጴርጋሞን ወዘትያጥሮን ወዘሰርዴስ ወዘፊልድልፍያ ወዘሎዶቅያ።

¹² ወተመየጥኩ እርአይ ዝኰ ቃለ ዘይትናገር ምስሌየ ወሶበ ተመየጥኩ ናሁ እሬኢ ሰብዑ መኃትወ ዘወርቅ።

¹³ ወማእከለ ሰብዑ መኃትው ይነብር ከመ ወልደ ዕጓለ እመሕያው ወይለብስ ልብሰ ጶዴር ወቅኑት ውስተ ሐቌሁ በቅናት ዘወርቅ።

¹⁴ ወጸዐዳ ርእሱ ወሥዕርቱ ከመ ፀምር ጸዐዳ ወከመ በረድ ወአዕይንቲሁ ከመ ነደ እሳት።

¹⁵ ወእገሪሁ ከመ ብርተ ሊባኖስ ዘአርሰንዎ በእሳት ወቃሉ ከመ ቃለ ማይ ብዙኅ።

¹⁶ ወውስተ እዴሁ ዘየማን ሰብዐቱ ኮከብ ወይወፅእ እምነ አፉሁ ሰይፍ በሊኅ ዘክልኤ አፉሁ ወገጹ ከመ ፀሓይ ብሩህ ዘያስተርኢ በኀይሉ።

¹⁷ ወሶበ ርኢክዎ ወደቁ ውስተ እገሪሁ ወኮንኩ ከመ በድን ወአኀዘኒ በየማኑ ወአንሥአኒ ወይቤለኒ ኢትፍራህ አነ ውእቱ ቀዳማዊ ወደኃራዊ ዘሕያው።

¹⁸ ወአንሰ ኮንኩ ከመ በድን ወይቤለኒ ናሁ ሕያው አነ ለዓለመ ዓለም ወኀቤየ ሀሎ መራኁተ ሞት ወሲኦል።

¹⁹ ጸሐፍ እንከ ዘትሬኢ ዘህልው ወዘሀለዎ ይኩን እምድኅረዝ።

²⁰ ወፍካሬሆሙሰ ለሰብዐቱ ከዋክብት እለ ርኢከ ውስተ የማኑ ወሰብዐቱ መኃትው እለ ወርቅ ዝንቱ ሰብዐቱ ከዋክብት መላእክት እሙንቱ እለ ሰብዐቱ አብያተ ክርስቲያናት ወእልክቱኒ ሰብዐቱ መኃትው ሰብዑ አብያተ ክርስቲያናት እማንቱ።