ወንጌል ዘማርቆስ 1 - ሐዲስ ኪዳን በልሳነ ግእዝ

ምዕራፍ 1 በእንተ ስብከተ ዮሐንስ

¹ ቀዳሚሁ ለወንጌለ እግዚእነ ኢየሱስ ክርስቶስ ወልደ እግዚአብሔር ሕያው።

² በከመ ጽሑፍ ውስተ መጻሕፍተ ነቢያት «ናሁ አነ እፌኑ መልአክየ ቅድመ ገጽከ ዘይጸይሕ ፍኖተከ።

³ ቃለ ዐዋዲ ዘይሰብክ በገዳም ወይብል ጺሑአ ፍኖተ እግዚአብሔር ወዐርዩ መጽያሕቶ።»

⁴ ወሀሎ ዮሐንስ ያጠምቅ በገዳም ወይሰብክ ጥምቀተ ለንስሓ ወለኅድገተ ኀጢአት

⁵ ወየሐውሩ ኀቤሁ ኵሉ ሰብአ ይሁዳ ወኢየሩሳሌም ወያጠምቆሙ ለኵሎሙ በፈለገ ዮርዳኖስ እንዘ ይትአመኑ ኀጢአቶሙ።

⁶ ወልብሱ ለዮሐንስ ፀጕረ ገመል ወቅናቱ ዘአዲም ውስተ ሐቌሁ ወሲሳዩ አንበጣ ወመዓረ ፀደና።

⁷ ወሰበከ ወይቤ ይመጽእ እምድኅሬየ ዘይጸንዕ እምኔየ ዘኢይደልወኒ እድንን ወእፍታሕ ቶታነ አሣእኒሁ እምእገሪሁ።

⁸ ወአንሰ አጠምቀክሙ በማይ ወውእቱሰ ያጠምቀክሙ በመንፈስ ቅዱስ።

በእንተ ጥምቀቱ ወተመክሮቱ ለእግዚእ ኢየሱስ

⁹ ወይእተ አሚረ መጽአ እግዚእ ኢየሱስ እምናዝሬት ዘገሊላ ወአጥመቆ ዮሐንስ በፈለገ ዮርዳኖስ።

¹⁰ ወወፂኦ እማይ ርእየ ተሰጥቀ ሰማይ ወወረደ መንፈስ ቅዱስ ከመ ርግብ ወነበረ ዲቤሁ።

¹¹ ወመጽአ ቃል እምሰማይ ዘይብል አንተ ውእቱ ወልድየ ዘአፈቅር ወኪያከ ሠመርኩ።

¹² ወአውፅኦ መንፈስ ሶቤሃ ገዳመ።

¹³ ወነበረ ሐቅለ አርብዓ መዓልተ ወአርብዓ ሌሊተ ወያሜክሮ ሰይጣን ወነበረ ምስለ አራዊት ወይትለአክዎ መላእክት።

ዘከመ ሰበከ እግዚእ ኢየሱስ ወኀረየ ሐዋርያተ

¹⁴ ወእምድኅረ አኀዝዎ ወሞቅሕዎ ለዮሐንስ መጽአ እግዚእ ኢየሱስ ገሊላ ወሰበከ ወንጌለ መንግሥተ እግዚአብሔር ።

¹⁵ ወይቤ በጽሐ ጊዜሁ ወቀርበት መንግሥተ ሰማያት ነስሑ ወእመኑ በወንጌል።

¹⁶ ወእንዘ የኀልፍ መንገለ ባሕረ ገሊላ ረከቦሙ ለስምዖን ወለእንድርያስ እኁሁ እንዘ ያሤግሩ ውስተ ባሕር እስመ መሠግራነ ዓሣ እሙንቱ።

¹⁷ ወይቤሎሙ እግዚእ ኢየሱስ ንዑ ትልዉኒ ወእሬስየክሙ መሠግራነ ሰብእ።

¹⁸ ወኀደጉ መሣግሪሆሙ ወተለውዎ ሶቤሃ።

¹⁹ ወኀሊፎ እምህየ ሕቀ ረከቦሙ ለያዕቆብ ወለዮሐንስ እኁሁ ደቂቀ ዘብዴዎስ ወለሊሁኒ ምስሌሆሙ ውስተ ሐመር እንዘ ያስተሣንዩ መሣግሪሆሙ።

²⁰ ወጸውዖሙ በጊዜሃ ወኀደጉ ዘብዴዎስሃ አባሆሙ ምስለ ዐሳቡ ውስተ ሐመር ወሖሩ ወተለውዎ።

²¹ ወሖሩ ቅፍርናሆም ወቦአ በሰንበት ምኵራበ ወአኀዘ ይምሀሮሙ።

²² ወአንከሩ ምህሮቶ እስመ ከመ መኰንን ይሜህሮሙ ወአኮ ከመ ጸሐፍቶሙ።

በእንተ ዘጋኔን

²³ ወሀሎ ብእሲ ዘጋኔን ውስተ ምኵራብ ወዐውየወ ወይቤ።

²⁴ ምንት ብየ ምስሌከ ኢየሱስ ናዝራዊ መጻእከኑ ታጥፍአነ አአምረከ ከመ አንተ ቅዱሱ ለእግዚአብሔር ።

²⁵ ወገሠጾ እግዚእ ኢየሱስ ወይቤሎ ተፈፀም ወፃእ እምኔሁ።

²⁶ ወአስተራገፆ ውእቱ ጋኔን እኩይ ወዐውየወ በዐቢይ ቃል ወወፅአ እምኔሁ።

²⁷ ወደንገፁ ኵሎሙ ወይቤሉ በበይናቲሆሙ ምንትኑ ዝንቱ ትምህርት ሐዲስ እስመ በትእዛዝ ይኤዝዞሙ ለአጋንንት ርኩሳን ወይትኤዘዙ ሎቱ።

²⁸ ወተሰምዐ ነገሩ ውስተ ኵሉ በሓውርተ ገሊላ።

በእንተ ሐማተ ጴጥሮስ

²⁹ ወወፂኦ እምኵራብ ቦአ ቤተ ስምዖን ወምስሌሁ እንድርያስ ወያዕቆብ ወዮሐንስ።

³⁰ ወሐማቱ ለስምዖን ትፈፅን ወነገርዎ በእንቲኣሃ።

³¹ ወቀርበ ኀቤሃ ወአኀዛ እዴሃ ወአንሥኣ ወኀደጋ ፈፀንታ ሶቤሃ ወተንሥአት ወተልእከቶሙ።

ዘከመ ፈወሰ ብዙኃነ ድዉያነ

³² ወመስዮ ጊዜ የዐርብ ፀሐይ አምጽኡ ኀቤሁ ኵሎ ድዉያነ ወእለሂ አጋንንት።

³³ ወተጋብኡ ኀቤሁ ኵሉ ሀገር ኀበ አንቀጽ።

³⁴ ወፈወሶሙ ለብዙኃን ድዉያን ወሕሙማን ወአውፅኦሙ ለብዙኃን አጋንንት ወኢያብሖሙ ይንብቡ እስመ የአምርዎ ከመ ውእቱ ክርስቶስ።

³⁵ ወበጽባሕ ተንሥአ ወአሌለየ ጥቀ ወወፂኦ ሖረ ሐቅለ ወጸለየ በህየ።

³⁶ ወዴገንዎ ስምዖን ወእለ ምስሌሁ።

³⁷ ወሶበ ረከብዎ ይቤልዎ እንጋ ኵሉ ሕዝብ የኀሥሡከ።

³⁸ ወይቤሎሙ ተንሥኡ ንሑር ካልኣተኒ አህጉረ ከመ በህየኒ እስብክ እስመ እንበይነ ዝንቱ ግብር መጻእኩ።

³⁹ ወሖረ ወሰበከ በምኵራባቲሆሙ በኵሉ ገሊላ ወያወፅእ አጋንንተ።

በእንተ ዘለምጽ

⁴⁰ ወመጽአ ኀቤሁ ዘለምጽ ወአስተብረከ ወአስተብቍዖ ወይቤሎ እግዚኦ እመሰ ፈቀድከ ትክል አንጽሖትየ።

⁴¹ ወምሕሮ እግዚእ ኢየሱስ ወሰፍሐ እዴሁ ወገሠሦ ወይቤሎ እፈቅድ ንጻሕ።

⁴² ወዘንተ ብሂሎ ሐይወ ለምጹ ሶቤሃ።

⁴³ ወገሠጾ ወፈነዎ፤

⁴⁴ ወይቤሎ ዑቅ ኢትንግር ወኢለመኑሂ ወሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ።

⁴⁵ ወወፂኦ አኀዘ ይስብክ ወይንግር ብዙኀ እስከ ያነክሩ ኵሉ ሀገር ወስእነ በዊአ ሀገር ክሡተ አላ አፍኣ ገዳመ ይነብር ወይመጽኡ ኀቤሁ እምኵለሄ።