ወንጌል ዘሉቃስ 1 - ሐዲስ ኪዳን በልሳነ ግእዝ

ምዕራፍ 1

¹ እስመ ብዙኃን እለ አኀዙ ይንግሩ ወይምሀሩ በእንተ ግብር ዘአምኑ በላዕሌነ።

² በከመ መሀሩነ እለ ቀደሙነ ርእዮቶ ወተልእክዎ ለቃሉ።

³ ወረትዐኒ ሊተኒ እትልዎ እምጥንቱ ወጥዩቀ ኵሎ በበመትልው እጽሐፍ ለከ ኦ አዚዝ ታኦፊላ።

⁴ ከመ ታእምር ጥዩቀ ጽድቀ ኀይለ ነገር ትምህርተ ዘተመሀርከ።

በእንተ ዘካርያስ ወኤልሳቤጥ

⁵ ወኮነ በመዋዕለ ሄሮድስ ንጉሠ ይሁዳ ሀሎ አሐዱ ካህን ዘስሙ ዘካርያስ በመዋዕለ አብያ ወብእሲቱኒ እምአዋልደ አሮን ወስማ ኤልሳቤጥ።

⁶ ወክልኤሆሙ ጻድቃን እሙንቱ በቅድመ እግዚአብሔር ወየሐውሩ በኵሉ ትእዛዙ ወሕጉ ለእግዚአብሔር ዘእንበለ ነውር ወንጹሓን እሙንቱ።

⁷ ወአልቦሙ ውሉድ እስመ መካን ይእቲ ኤልሳቤጥ ወክልኤሆሙ ልሂቃን እሙንቱ ወኀለፈ መዋዕሊሆሙ።

⁸ ወእምዝ አመ ይገብር ግብረ ክህነት በእብሬቱ ቅድመ እግዚአብሔር።

⁹ በከመ ይገብሩ ካህናት በጽሐ ጊዜ የዐጥን ወቦአ ቤተ መቅደሱ ለእግዚአብሔር።

¹⁰ ወኵሎሙ ሕዝብ ሀለዉ በምልኦሙ ይጼልዩ በአፍኣ በጊዜ ሰዓተ ዕጣን።

¹¹ ወአስተርአዮ መልአከ እግዚአብሔር ቀዊሞ መንገለ የማነ ምሥዋዕ ዘዕጣን።

¹² ወሶበ ርእዮ ደንገፀ ዘካርያስ ወፍርሀት ወረዓድ ወረደ ላዕሌሁ።

¹³ ወይቤሎ መልአክ ኢትፍራህ ዘካርያስ እስመ ናሁ ተሰምዐ ጸሎትከ ቅድመ እግዚአብሔር ወብእሲትከኒ ኤልሳቤጥ ትወልድ ለከ ወልደ ወትሰምዮ ስሞ ዮሐንስ።

¹⁴ ወይከውነከ ትፍሥሕተ ወሐሤተ ወብዙኃን ይትፌሥሑ በልደቱ።

¹⁵ እስመ ዐቢየ ይከውን ውእቱ በቅድመ እግዚአብሔር ወኢይሰቲ ወይነ ወሜሰ ወይመልዕ ላዕሌሁ መንፈስ ቅዱስ እምከርሠ እሙ።

¹⁶ ወለብዙኃን እምደቂቀ እስራኤል ይመይጦሙ ኀበ እግዚአብሔር አምላኮሙ።

¹⁷ ወውእቱ የሐውር ቅድሜሁ በመንፈስ ቅዱስ ወበኀይለ ኤልያስ ከመ ይሚጥ ልበ አበው ኀበ ውሉድ ወኅሊና ከሓድያን ኀበ አእምሮ ጻድቃን ከመ ይሥራዕ ሕገ ወሕዝበ ዘድልው ለእግዚአብሔር።

¹⁸ ወይቤሎ ዘካርያስ ለመልአከ እግዚአብሔር በምንት አአምር ከመ ይከውን ዝንቱ ናሁ አነሂ ልሂቅ ወለብእሲትየኒ ኀለፈ መዋዕሊሃ።

¹⁹ ወተሰጥዎ መልአክ ወይቤሎ አነ ውእቱ ገብርኤል ዘእቀውም ቅድመ እግዚአብሔር ዘተፈኖኩ ኀቤከ እንግርከ ወእዜኑከ ዘንተ።

²⁰ ወናሁ ትከውን በሃመ ወትስእን ነቢበ እስከ አመ ይከውን ዝንቱ እስመ ኢአመንከኒ ነገርየ ዘይከውን ወይትፌጸም በዕድሜሁ።

²¹ ወሀለዉ ሕዝብ ይጼልዩ ወይጸንሕዎ ለዘካርያስ ወአንከርዎ እስመ ጐንደየ ውስተ ቤተ መቅደስ።

²² ወወፂኦ ኀቤሆሙ አፍኣ ስእነ ተናግሮቶሙ ወአእመሩ ከመ ቦ ዘአስተርአዮ በቤተ መቅደስ ወነበረ ከማሁ እንዘ በሃም ውእቱ ወይኤምሮሙ በእዴሁ።

²³ ወእምዝ ፈጺሞ መዋዕለ እብሬቱ አተወ ቤቶ።

²⁴ ወእምድኅረ ክልኤ መዋዕል ፀንሰት ኤልሳቤጥ ብእሲቱ ወከበተት ርእሳ ኀምስተ አውራኀ እንዘ ትብል።

²⁵ ከመዝኑ ረሰየኒ ሊተ እግዚአብሔር አመ ሐውጾ ሐወጸኒ በዝንቱ መዋዕል ያእትት ዝንጓጔየ እምሰብእ።

ዘከመ አብሠራ ገብርኤል ለማርያም ድንግል

²⁶ ወበሳድስ ወርኅ ተፈነወ ገብርኤል መልአክ እምኀበ እግዚአብሔር ኀበ አሐቲ ሀገር ዘገሊላ እንተ ስማ ናዝሬት።

²⁷ ኀበ ድንግል እንተ ተፍኅረት ለብእሲ ዘስሙ ዮሴፍ ዘእምቤተ ዳዊት ወስማ ለይእቲ ድንግል ማርያም።

²⁸ ወቦአ መልአክ ኀቤሃ ወይቤላ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ ወቡርክት አንቲ እምአንስት።

²⁹ ወርእያ ደንገፀት እምቃሉ ወኀለየት ወትቤ እፎኑ እንጋ ዘከመዝ አምኃ ይትአምኁ።

³⁰ ወይቤላ መልአክ ኢትፍርሂ ማርያም እስመ ረከብኪ ሞገሰ በኀበ እግዚአብሔር።

³¹ ወናሁ ትፀንሲ ወትወልዲ ወልደ ወትሰምዪዮ ስሞ ኢየሱስ ።

³² ውእቱ ዐቢይ ወይሰመይ ወልደ እግዚአብሔር ልዑል ወይሁቦ እግዚአብሔር አምላክ መንበረ ዳዊት አቡሁ።

³³ ወይነግሥ ለቤተ ያዕቆብ ለዓለም ወአልቦ ማኅለቅት ለመንግሥቱ።

³⁴ ወትቤሎ ማርያም ለመልአክ እፎኑ ይከውነኒ ዝንቱ እንዘ ኢየአምር ብእሴ።

³⁵ ወአውሥአ መልአክ ወይቤላ መንፈሰ እግዚአብሔር ቅዱስ ይመጽእ ላዕሌኪ ወኀይለ ልዑል ይጼልለኪ ወዘኒ ይትወለድ እምኔኪ ቅዱስ ውእቱ ወይሰመይ ወልደ እግዚአብሔር ልዑል።

³⁶ ወናሁ ኤልሳቤጥኒ እንተ እምአዝማድኪ ይእቲኒ ፀንሰት ወረከበት ወልደ በልህቃቲሃ ወበርስኣቲሃ ወናሁ ሳድስ ዝንቱ ወርኅ ለእንተ ይብልዋ መካን።

³⁷ እስመ አልቦ ነገር ዘይሰአኖ ለእግዚአብሔር።

³⁸ ወትቤሎ ማርያም ለመልአክ ነየ አመተ እግዚአብሔር ይኩነኒ በከመ ትቤለኒ ወእምዝ ሖረ ወኀለፈ እምኀቤሃ መልአክ።

በእንተ ሑረታ ለማርያም ኀበ ኤልሳቤጥ

³⁹ ወተንሥአት ማርያም ፍጡነ በውእቱ መዋዕል ወሖረት ደወለ ዓይነ ከርም ወበጽሐት ሀገረ ዳዊት ዘይሁዳ።

⁴⁰ ወቦአት ቤተ ዘካርያስ ወአምኀታ ለኤልሳቤጥ።

⁴¹ ወሶበ ሰምዐት ኤልሳቤጥ ቃላ ለማርያም እንዘ ትትአምኃ አንፈርዐጸ ዕጓል በውስተ ከርሣ ወመልአ መንፈስ ቅዱስ ላዕለ ኤልሳቤጥ።

⁴² ወከልሐት በዐቢይ ቃል ወትቤ ቡርክት አንቲ እምአንስት ወቡሩክ ፍሬ ከርሥኪ።

⁴³ ወምንትኑ አነ ከመ ትምጽኢ ኀቤየ እሙ ለእግዚእየ።

⁴⁴ እስመ ናሁ ሶበ ሰማዕኩ ቃለኪ እንዘ ትትአምኅኒ አንፈርዐጸ ዕጓል በውስተ ከርሥየ በፍሥሓ ወበሐሤት።

⁴⁵ ወብፅዕት አንቲ እንተ ተአምኒ ከመ ይከውን ቃል ዘነገሩኪ እምኀበ እግዚአብሔር።

⁴⁶ ወትቤ ማርያም ታዐብዮ ነፍስየ ለእግዚአብሔር።

⁴⁷ ወትትሐሠይ መንፈስየ በአምላኪየ ወመድኀኒየ።

⁴⁸ እስመ ርእየ ሕማማ ለአመቱ ናሁ እምይእዜሰ ያስተበፅዑኒ ኵሉ ትውልድ።

⁴⁹ እስመ ገብረ ሊተ ኀይለ ዐቢያተ ወቅዱስ ስሙ።

⁵⁰ ወሣህሉኒ ለትውልደ ትውልድ ለእለ ይፈርህዎ።

⁵¹ ወገብረ ኀይለ በመዝራዕቱ ወዘረዎሙ ለእለ ያዐብዩ ኅሊና ልቦሙ።

⁵² ወነሠቶሙ ለኀያላን እመናብርቲሆሙ አዕበዮሙ ለትሑታን።

⁵³ ወአጽገቦሙ እምበረከቱ ለርኁባን ወፈነዎሙ ዕራቆሙ ለብዑላን።

⁵⁴ ወተወክፎ ለእስራኤል ቍልዔሁ ወተዘከረ ሣህሎ።

⁵⁵ ዘይቤሎሙ ለአበዊነ ለአብርሃም ወለዘርዑ እስከ ለዓለም።

⁵⁶ ወነበረት ማርያም ኀቤሃ መጠነ ሠለስቱ አውራኅ ወእምድኅሬሁ አተወት ቤታ።

በእንተ ልደተ ዮሐንስ መጥምቅ

⁵⁷ ወበጽሐ ወርኃ ለኤልሳቤጥ ከመ ትለድ ወወለደት ወልደ።

⁵⁸ ወሶበ ሰምዑ አዝማዲሃ ወአግዋሪሃ ከመ አዕበየ እግዚአብሔር ሣህሎ ላዕሌሃ ተፈሥሑ ላቲ።

⁵⁹ ወእምዝ አመ ሰሙን ዕለት መጽኡ ከመ ይግዝርዎ ለሕፃን ወሰመይዎ በስመ አቡሁ ዘካርያስ።

⁶⁰ ወአውሥአት እሙ ወትቤ አልቦ አላ ዮሐንስ ይሰመይ።

⁶¹ ወይቤልዋ አልቦ እምአዝማድኪ ዘከማሁ ስሙ።

⁶² ወቀጸብዎ ለአቡሁ ወይቤልዎ መነ ትፈቅድ ይስምይዎ።

⁶³ ወሰአለ ለውሀ ወጸሐፈ እንዘ ይብል ዮሐንስ ይሰመይ ስሙ ወአንከሩ ኵሎሙ።

⁶⁴ ወተከሥተ አፉሁ ሶቤሃ ወልሳኑ ነበበ ወባረኮ ለእግዚአብሔር።

⁶⁵ ወኮነ ፍርሀት ላዕለ ኵሉ ሰብእ ዘውእቱ ብሔር ወላዕለ ኵሉ ደወለ ይሁዳ ወተናገርዎ ለዝንቱ ነገር በኵሉ ብሔረ ይሁዳ።

⁶⁶ ወዐቀብዎ በልቦሙ ኵሎሙ እለ ሰምዕዎ ወይቤሉ ምንትኑ እንጋ ውእቱ ዝንቱ ሕፃን እስመ እደ እግዚአብሔር ላዕሌሁ።

⁶⁷ ወመልአ መንፈስ ቅዱስ ላዕለ ዘካርያስ አቡሁ ወተነበየ ወይቤ።

⁶⁸ ይትባረክ እግዚአብሔር አምላከ እስራኤል ዘተሣሀለነ ወገብረ መድኀኒተ ለሕዝበ ዚኣሁ።

⁶⁹ አንሥአ ለነ ቀርነ መድኀኒትነ እምቤተ ዳዊት ገብሩ።

⁷⁰ በከመ ነበበ በአፈ ነቢያቲሁ ቅዱሳን እለ እምዓለም።

⁷¹ ከመ ያድኅነነ እምእደ ፀርነ ወእምእዴሆሙ ለኵሎሙ እለ ይጸልኡነ።

⁷² ከመ ይግበር ሣህሎ ምስለ አበዊነ ወከመ ይዘከር ኪዳኖ ቅዱሰ።

⁷³ መሐላሁ ዘመሐለ ለአብርሃም አቡነ።

⁷⁴ ከመ የሀበነ በዘኢንፈርህ እምእደ ፀርነ።

⁷⁵ ያድኅነነ ናምልኮ በጽድቅ ወበርትዕ በቅድሜሁ ወበኵሉ መዋዕሊነ።

⁷⁶ ወአንተኒ ሕፃን ነቢየ ልዑል ትሰመይ እስመ ተሐውር ቅድመ እግዚአብሔር ከመ ትጺሕ ፍኖቶ።

⁷⁷ ከመ ተሀቦሙ ለአሕዛብ ያእምሩ መድኀኒቶሙ በዘይትኀደግ ሎሙ ኀጢአቶሙ።

⁷⁸ በሣህሉ ወበምሕረቱ ለአምላክነ ለዘሐወጸነ እምአርያም ወሠረቀ ከመ ያርእዮሙ ብርሃኖ።

⁷⁹ ለእለ ይነብሩ ውስተ ጽልመት ወጽላሎተ ሞት ከመ ያርትዕ እገሪነ ውስተ ፍኖተ ሰላም።

⁸⁰ ወልህቀ ሕፃን ወጸንዐ በመንፈስ ቅዱስ ወነበረ ሐቅለ እስከ አመ ያገይሥዎ ኀበ እስራኤል።