ኀበ ሰብአ ኤፌሶን 6 - ሐዲስ ኪዳን በልሳነ ግእዝ

ምዕራፍ 6 በእንተ ውሉድ ወአበው

¹ ውሉድኒ ተአዘዙ ለአዝማዲክሙ በእግዚእነ እስመ ጽድቅ ውእቱ ዝንቱ።

² ወቀዳሚ ትእዛዝ በውስተ ሥርዐት አክብር አባከ ወእመከ።

³ ከመ ሠናየ ይኩንከ ወይኑኅ መዋዕሊከ በዲበ ምድር።

⁴ አበውኒ ኢታስተቍጥዑ ወሉደክሙ አላ ሕፅኑ ወገሥጹ በትምህርተ እግዚአብሔር።

በእንተ ነባሪ ወአጋእዝት

⁵ ነባሪኒ ተአዘዙ ለአጋእዝቲክሙ እለ ይኴንኑክሙ በሥጋክሙ በፍርሀት ወበረዓድ ወበልብ ስፉሕ ከመ ዘለክርቶስ።

⁶ ወአኮ ከመ ዘያደሉ ለዐይነ ሰብእ አላ ከመ አግብርተ ክርስቶስ እለ ይገብሩ ፈቃዶ ለእግዚአብሔር።

⁷ ወበኵሉ ነፍስክሙ ተቀነዩ ሎሙ በአፍቅሮ ከመ ዘለእግዚአብሔር ወአኮ ከመ ዘለሰብእ።

⁸ እንዘ ተአምሩ ከመ ኵሉ ዘገብረ ሠናየ ይትዐሰይ በኀበ እግዚአብሔር እመኒ ነባሪ ወእመኒ አግዓዚ።

⁹ ወአጋእዝትኒ ዕሩየ ግበሩ ሎሙ እንዘ ታቈርሩ መዓተክሙ ወተኀድጉ ሎሙ አበሳሆሙ ተአምሩ ከመ ብክሙ እግዚእ በሰማያት ዘኢያደሉ ለገጽ።

ፍጽምት ገድል ወሃይማኖት

¹⁰ እንከሰ ጽንዑ በእግዚአብሔር ወበጽንዐ ኀይሉ።

¹¹ ወልበሱ ወልታ እግዚአብሔር በዘትክሉ ተቃውሞቶ ለመናግንተ ሰይጣን።

¹² እስመ ቀትልክሙ ኢኮነ ምስለ ዘሥጋ ወደም ዘእንበለ ምስለ መኳንንተ ጽልመት ወአጋንንት እኩያን እለ መትሕተ ሰማይ።

¹³ ወበእንተዝ ንሥኡ ወልታ እግዚአብሔር ከመ ትክሀሉ ተቃውሞታ ለዕለት እኪት ወኩኑ ድልዋነ በኵሉ ከመ ትጽንዑ።

¹⁴ ቁሙ እንከ ቀኒተክሙ ሐቌክሙ በጽድቅ ወልበሱ ልብሰ ሐጺን ዘጽድቅ።

¹⁵ ተሥኢነክሙ ኀይለ ወንጌል ዘበሰላም።

¹⁶ ወምስለዝ ኵሉ ንሥኡ ንዋየ ሐቅል ዘሃይማኖት በዘትክሉ አጥፍኦተ ኵሉ አሕጻሁ ለእኩይ ርሱን።

¹⁷ ወንሥኡ ጌራ መድኀኒት ላዕለ ርእስክሙ ወሰይፈ ዘመንፈስ ቅዱስ ንሥኡ በእደዊክሙ ዘውእቱ ቃለ እግዚአብሔር።

¹⁸ በኵሉ ጸሎት ወስእለት እንዘ ትጼልዩ በኵሉ ጊዜ በመንፈስ ትግሁ ወተፀመዱ ለጸሎት ኵሎ ጊዜ በእንተ ኵሎሙ ቅዱሳን።

¹⁹ ወበእንቲኣየ ከመ የሀበኒ ቃለ ወይክሥት አፉየ ከመ እንግር ገሃደ ሕርመተ ትምህርት።

²⁰ ዘበእንቲኣሁ እተነብል ሙቁሕየ ከመ እንግር ገሃደ በእንቲኣሁ በከመ ይደሉ እንግር።

²¹ ወዘትፈቅዱሰ ታእምሩ አንትሙሂ ዜናየ ዘከመ እገብር ኵሎ ያጤይቀክሙ ጢኪቆስ እኁነ ዘናፈቅር ላእከ እግዚአብሔር ምእመን።

²² ዘፈኖኩ ኀቤክሙ በእንተዝ ከመ ታእምሩ ዜናየ ወይትፈሣሕክሙ ልብክሙ።

²³ ሰላም ለአኀዊነ ወተፋቅሮ ምስለ ሃይማኖት እምኀበ እግዚአብሔር አቡነ ወእግዚእነ ኢየሱስ ክርስቶስ ።

²⁴ ወጸጋሁ ምስለ ኵሎሙ እለ ያፈቅርዎ ለእግዚእነ ኢየሱስ ክርስቶስ በኢጥፍአት አሜን። ተፈጸመት መልእክት ኀበ ሰብአ ኤፌሶን ወተጽሕፈት በሮሜ ወተፈነወት በእደ ጢኪቆስ። ወስብሐት ለእግዚአብሔር አሜን።