ኀበ ሰብአ ኤፌሶን 1 - ሐዲስ ኪዳን በልሳነ ግእዝ

ምዕራፍ 1 በእንተ ምእመናን ዘኤፌሶን

¹ እምጳውሎስ ሐዋርያሁ ለእግዚእነ ኢየሱስ ክርስቶስ በፈቃደ እግዚአብሔር ለቅዱሳን እለ በኤፌሶን ወምእመናን በኢየሱስ ክርስቶስ።

² ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

በእንተ ስብሐት ወበረከት

³ ይትባረክ እግዚአብሔር አቡሁ ለእግዚእነ ኢየሱስ ክርስቶስ ዘባረከነ በኵሉ በረከተ መንፈስ ቅዱስ ዘበሰማያት በክርስቶስ ኢየሱስ።

⁴ በከመ ኀረየነ ሎቱ እምቅድመ ይትፈጠር ዓለም ከመ ይረስየነ ቅዱሳነ ወንጹሓነ በቅድሜሁ ዘእንበለ ነውር በተፋቅሮ።

⁵ ወሠርዐነ ትርሲተ ወልዱ በእንተ ኢየሱስ ክርስቶስ በከመ ሥምረተ ፈቃዱ።

⁶ ለክብር ወለስብሐት በጸጋሁ ዘጸገወነ በወልዱ ፍቁሩ።

⁷ ዘበእንቲኣሁ ረከብነ መድኀኒተ ወተኀድገ ለነ ኀጢአትነ በደሙ በከመ ብዕለ ጸጋሁ።

⁸ ዘአፈድፈደ ላዕሌነ በኵሉ ጥበብ ወምክር።

⁹ ወአርአየነ ምክረ ፈቃዱ በከመ ሥምረቱ ወሠርዐነ በእንቲኣሁ።

¹⁰ ወዐቀመ በዘይበጽሕ ዕድሜሁ ከመ ይትሐደስ ኵሉ ዘበሰማይ ወዘበምድር።

¹¹ ወከፈለነ በዘሠርዐነ እግዚአብሔር ወረድአነ በከመ ምክረ ፈቃዱ።

¹² ከመ የሀበነ ምክረ ወስብሐተ ለእለ ተወከልነ በክርስቶስ ኢየሱስ።

¹³ ወአንትሙሂ ሰማዕክሙ ቃለ ጽድቅ ትምህርተ ሕይወትክሙ ወአመንክሙ ወዐተቡክሙ በመንፈስ ቅዱስ ዘአሰፈወ።

¹⁴ ዘውእቱ ዐረቦነ ርስትነ ወመድኀኒተ ሕይወትነ በክብረ ስብሐቲሁ።

በእንተ ተዘክሮተ ምእመናን

¹⁵ ወበእንተዝ አነሂ ሰሚዕየ ሃይማኖተክሙ በእግዚእነ ኢየሱስ ክርስቶስ ወዘከመ ታፈቅርዎሙ ለኵሎሙ ቅዱሳን።

¹⁶ ኢያንተጉ አእኵቶ በእንቲኣክሙ ወተዘክሮተክሙ በጸሎትየ።

¹⁷ ከመ እግዚአብሔር አምላኩ ለእግዚእነ ኢየሱስ ክርስቶስ አበ ስብሐት የሀብክሙ መንፈሰ ጥበብ ወይክሥት ለክሙ ታእምሩ።

¹⁸ ወያብርህ አዕይንተ አልባቢክሙ ወታእምሩ ምንት ውእቱ ተስፋሁ ለጽዋዔክሙ ወምንት ውእቱ ብዕለ ስብሐተ ርስቶሙ ለቅዱሳን።

¹⁹ ወምንት ውእቱ ፍድፋዴ ጽንዐ ኀይሉ ዘላዕሌነ ለእለ ነአምን በከመ ዕበየ ኀይሉ ዘገብረ በክርስቶስ።

²⁰ ዘአንሥኦ እሙታን ወአንበሮ በየማኑ ውስተ ሰማያት።

²¹ መልዕልተ ኵሉ መላእክት ወመኳንንት ወኀይላት ወአጋእዝት ወኵሉ ስም ዘይሰመይ ወአኮ በዝ ዓለም ባሕቲቱ አላ በዘይመጽእኒ ዓለም።

²² ወኵሎ አግረረ ሎቱ ታሕተ እገሪሁ ወኪያሁ ዘውእቱ መልዕልተ ኵሉ ረሰዮ ርእሰ ለቤተ ክርስቲያን

²³ እንተ ይእቲ ሥጋሁ ወውእቱ ፍጻሜሁ ለኵሉ ወይፌጽም ኵሎ በኵሉ።