ኀበ ሰብአ ቈላስይስ 1 - ሐዲስ ኪዳን በልሳነ ግእዝ

ምዕራፍ 1 ዘከመ ይደሉ ጸልዮ በእንተ ቢጽ

¹ እምጳውሎስ ሐዋርያሁ ለኢየሱስ ክርስቶስ በፈቃደ እግዚአብሔር ወጢሞቴዎስ እኁነ ለቅዱሳን እለ ውስተ ቈላስይስ ወምእመናን አኀዊነ በኢየሱስ ክርስቶስ።

² ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

³ ነአኵቶ ለእግዚአብሔር አቡሁ ለእግዚእነ ኢየሱስ ክርስቶስ ዘልፈ በእንቲኣክሙ።

⁴ ወንጼሊ እምአመ ሰማዕነ ሃይማኖተክሙ በኢየሱስ ክርስቶስ ወዘከመ ታፈቅርዎሙ ለኵሎሙ ቅዱሳን።

⁵ በእንተ ተስፋክሙ ዘሥዩም ለክሙ በሰማያት ዘአቅደምክሙ ሰሚዐ በቃለ ጽድቅ ትምህርተ ወንጌል።

⁶ ዘበጽሐ ኀቤክሙ ከመ በኵሉ ዓለም ይፍረይ ወይሥመር በላዕሌክሙ እምአመ ሰማዕክሙ ወርኢክሙ ጸጋ እግዚአብሔር በጽድቅ።

⁷ ዘተመሀርክሙ በኀበ ኤጳፍራስ እኁነ ላእከ ዚኣነ ምእመን በክርስቶስ ዘይትለአክ በእንቲኣክሙ።

⁸ ወውእቱ ነገረነ ተፋቅሮተክሙ በመንፈስ።

በእንተ ስኢለ መምህራን ለአርዳእ

⁹ ወበእንተዝ ንሕነሂ እምአመ ሰማዕነ ዜናክሙ ኢኀደግነ ጸልዮ በእንቲኣክሙ ወስኢለ ከመ ትፈጽሙ አእምሮ ፈቃዱ ለእግዚአብሔር በኵሉ ጥበብ ወበኵሉ ምክረ መንፈስ።

¹⁰ ከመ ትሑሩ በዘይደልወክሙ ለኀበ እግዚአብሔር ወበኵሉ ታድልዉ ሎቱ በኵሉ ምግባረ ሠናይ እንዘ ትፈርዩ ወትሠምሩ በጥበበ አእምሮ እግዚአብሔር።

¹¹ ወእንዘ ትጸንዑ በኵሉ ኀይል ወበጽንዐ ስብሐቲሁ በኵሉ ትዕግሥት ወበተስፋ ወበፍሥሓ።

¹² አእኵትዎ ለእግዚአብሔር አብ ዘረሰየነ ድልዋነ ለመክፈልተ ርስቶሙ ለቅዱሳን በብርሃን።

¹³ ወአድኀነነ እምኵነኔ ጽልመት ወአግብአነ ውስተ መንግሥተ ወልዱ ፍቁሩ።

¹⁴ ዘቦቱ ረከብነ መድኀኒተ ወተኀድገ ለነ ኀጢአትነ።

¹⁵ ዘውእቱ አምሳሊሁ ለእግዚአብሔር ዘኢያስተርኢ በኵሩ ዘላዕለ ኵሉ ተግባሩ።

¹⁶ እስመ ቦቱ ኵሎ ፈጠረ ዘበሰማይኒ ወዘበምድርኒ ዘያስተርኢ ወዘኢያስተርኢ እመኒ መናብርት ወእመኒ አጋእዝት ወእመኒ መኳንንት ወእመኒ ቀደምት ኵሉ ዘኮነ በእዴሁ ወኵሉ ቦቱ ተፈጥረ።

¹⁷ ወውእቱ ህልው እምቅድመ ኵሉ ወኵሉ ቦቱ ቆመ።

¹⁸ ወውእቱ ርእሳ ለቤተ ክርስቲያን እስመ ውእቱ በኵር ቀደመ እምኵሎሙ ምዉታን ተንሥኦ ከመ ይኩን ውእቱ ርእሰ ለኵሉ።

¹⁹ እስመ ሠምረ ቦቱ ፍጹመ ኵሉ ይኅድር ላዕሌሁ።

²⁰ ወቦቱ ይሣሀሎ ለኵሉ ወገብረ ሰላመ በደመ መስቀሉ ለዘበሰማይ ወለዘበምድር።

²¹ ወአንትሙሂ ትካት ፀሩ ወነኪሩ በልብክሙ ወበእከየ ምግባሪክሙ።

²² ወይእዜሰ ተሣሀለክሙ በነፍስተ ሥጋሁ ወበሞቱ ከመ ይረሲክሙ ቅዱሳነ ወንጹሓነ ወኅሩያነ ለቅድሜሁ።

በእንተ መልእክት ሐዋርያዊት

²³ ወለእመ ጸናዕክሙ እንከ በሃይማኖት እንዘ ታጠብዑ ወኢያንቀለቅል ድደ መሠረትክሙ እምተስፋ ትምህርተ ወንጌል ዘሰማዕክሙ ከመ ተሰብከ በኵሉ ዓለም ዘመትሐተ ሰማይ ዘሎቱ ተሠየምኩ አነ ጳውሎስ ዐዋዴ ወላእከሂ።

²⁴ ወይእዜኒ እትፌሣሕ በሕማምየ ወእፌጽም ታሕጻጸ ሕማሙ ለክርስቶስ በሥጋየ በእንተ ሥጋሁ እንተ ይእቲ ቤተ ክርስቲያኑ።

²⁵ እንተ ላቲ ተሠየምኩ አነ ላእከ በሥርዐተ እግዚአብሔር ዘወሀበኒ በእንቲኣክሙ።

²⁶ ከመ እፈጽም ቃለ እግዚአብሔር ወምክሮ ዘኅቡእ እምቅድመ ዓለም ወዘእንበለ ይትፈጠር ሰብእ።

²⁷ ወይእዜሰ አስተርአዮሙ ለቅዱሳኒሁ ለእለ ፈቀደ እግዚአብሔር ይክሥት ሎሙ ብዕለ ስብሐቲሁ ለዝንቱ ምክሩ በላዕለ አሕዛብ እስመ ውእቱ ክርስቶስ ዘየኀድር ላዕሌክሙ ተስፋ ስብሐቲነ።

²⁸ ዘንሜህር ንሕነ ወንጼውዕ ኀቤሁ ወንጌሥጽ ኵሎ ሰብአ ወንነግር ግብሮ በኵሉ ጥበብ ከመ ይቁም ኵሉ ሰብእ ፍጹመ በሃይማኖተ ኢየሱስ ክርስቶስ።

²⁹ ዘበእንቲኣሁ እሰርሕ ወእትጋደል በከመ ረድኤቱ ዘይረድአኒ በኀይሉ።