ግብረ ሐዋርያት 1 - ሐዲስ ኪዳን በልሳነ ግእዝምዕራፍ 1 በእንተ አስተጋብኦ ዜና ሐዋርያት 1 ቀዳሚ ጸሐፍኩ ለከ መጽሐፈ ኦ! ታኦፊላ በኵሉ ግብር ዘአኀዘ እግዚእነ ኢየሱስ ክርስቶስ ይግበር ወይምሀር። 2 እስከ ዕለት እንተ ባቲ ዐርገ አዚዞ ለሐዋርያቲሁ ለእለ ኀረዮሙ በመንፈስ ቅዱስ። 3 እሉ እሙንቱ እለ አርአዮሙ ወከሠተ ሎሙ ርእሶ ሕያወ እምድኅረ ሞተ በተኣምር ብዙኅ በአርብዓ ዕለት እንዘ ያስተርእዮሙ ወይዜንዎሙ ወይነግሮሙ በእንተ መንግሥተ እግዚአብሔር። በእንተ ጥምቀት በመንፈስ ቅዱስ 4 ወእንዘ ይመስሕ ምስሌሆሙ አዘዞሙ ኢይፃኡ እምኢየሩሳሌም አላ ይጽንሑ ተስፋሁ ለአብ። 5 ወይቤሎሙ ዮሐንስ አጥመቀ በማይ አንትሙሰ ታጠምቁ በመንፈስ ቅዱስ እስከ መዋዕል ዘኢኮነ ርኁቀ። ተስእሎ በእንተ መንግሥተ እስራኤል 6 ወእንዘ ጉቡኣን እሙንቱ ተስእልዎ ወይቤልዎ እግዚኦ በዝኑ መዋዕል ታገብእ መንግሥተ ለደቂቀ እስራኤል። 7 ወአውሥኦሙ ወይቤሎሙ ኢኮነ ለክሙ ታእምሩ መዋዕለ ወአዝማነ ዘሠርዐ አብ በምኵናኑ ባሕቲቱ። 8 አላ ሶበ ይወርድ ላዕሌክሙ መንፈስ ቅዱስ ትነሥኡ ኀይለ ወትከውኑኒ ሰማዕትየ በኢየሩሳሌም ወበኵሉ ይሁዳ ወሰማርያ ወእስከ አጽናፈ ምድር። በእንተ ዕርገት 9 ወዘንተ እንዘ ይብሎሙ ተለዐለ ወነሥአቶ ደመና ወዐርገ ሰማየ እንዘ እሙንቱ ይኔጽሩ ኀቤሁ ወተሰወረ እምአዕይንቲሆሙ። 10 ወአስተርአይዎሙ ክልኤቱ ዕደው ወቆሙ ኀቤሆሙ ወይለብሱ ጸዐዳ። 11 ወይቤልዎሙ አንትሙ ሰብአ ገሊላ ምንትኑ ቆምክሙ ትርአዩ ሰማየ ዝ ውእቱ ኢየሱስ ዘዐርገ እምኀቤክሙ ውስተ ሰማይ ወከማሁ ካዕበ ይመጽእ በከመ ርኢክምዎ የዐርግ ሰማየ። 12 ወእምዝ ተሠውጡ ኢየሩሳሌም እምደብረ ዘይት ዘእቱት እምኢየሩሳሌም መጠነ ምርዋጸ ብእሲ እንተ ይእቲ መንገደ ቀዳም። በእንተ ጸሎተ ማኅበር 13 ወበጺሖሙ ማኅደሮሙ ኀበ ይነብሩ ጽርሐ ዐርጉ ጴጥሮስ ወዮሐንስ ወያዕቆብ ወእንድርያስ ወፊልጶስ ወቶማስ ወማቴዎስ ወበርተሎሜዎስ ወያዕቆብ ወልደ እልፍዮስ ወስምዖን ቀናኢ ወይሁዳ ወልደ ዮሴፍ። 14 እሉ ኵሎሙ ይፀመዱ ጸሎተ ኅቡረ ምስለ አንስት ወማርያም እሙ ለኢየሱስ ወአኀዊሁኒ። በእንተ ኅርየት ሐዋርያዊት 15 ወውእተ አሚረ ተንሥአ ጴጥሮስ ወቆመ ማእከለ አኀዊሁ ወይቤሎሙ እንዘ ሀለዉ ህየ ሰብእ ወየአክሉ ምእተ ወዕሥራ። 16 ስምዑ ኦ አኀዊነ አማን ሀለዎ ይብጻሕ ቃለ መጽሐፍ ዘይቤ መንፈስ ቅዱስ በአፈ ዳዊት በእንተ ይሁዳ ዘውእቱ ኮኖሙ መርሐ ለእለ አኀዝዎ ለእግዚእ ኢየሱስ። 17 እንዘ ኊሉቍ ውእቱ ምስሌነ ወከፈሎ ዘንተ መልእክተ። 18 ወእምዝ ተሣየጠ ዐጸደ በዐስበ ዐመፃሁ ወተነጽሐ ላዕለ ምድር በገጹ ወተሠጥቀ ገቦሁ ወተክዕወ ኵሉ አማዑቲሁ። 19 ወተሰምዐ ነገሩ በኀበ ኵሎሙ እለ ይነብሩ በኢየሩሳሌም ወተሰምየ ዐጸዱ ዘተሣየጠ በዐስቡ ሰመይዎ በነገሮሙ አኬልዳማ ገራህተ ደም ብሂል። 20 በከመ ይቤ መጽሐፈ መዝሙር «ለትኩን ሀገሩ በድወ ወአልቦ ዘይነብር ውስቴታ ወሢመቶሂ ይንሣእ ባዕድ።» 21 ወይደሉ ለአሐዱ እምእሉ ዕደው እለ ነበሩ ምስሌነ ዘንተ ኵሎ መዋዕለ በዘቦአ ወወፅአ በኀቤነ እግዚእነ ኢየሱስ ክርስቶስ። 22 እኂዞ እምጥምቀተ ዮሐንስ እስከ አመ ዐርገ እምኀቤነ ከመ ይኩን ውእቱ ምስሌነ ስምዐ ተንሥኦቱ። 23 ወአቀሙ ክልኤተ ዮሴፍሃ ዘተሰምየ በርናባስ ዘይብልዎ ኢዮስጦስ ወማትያስሃ። 24 ወጸለዩ ወይቤሉ አንተ እግዚኦ ማእምረ ኵሉ ልብ አርኢ አሐደ እምእሉ ክልኤቱ ዘኀረይከ። 25 ዘይነሥኣ ለመልእክተ ዛቲ ሢመተ ሐዋርያት ዘኀደጋ ይሁዳ ይሑር ብሔሮ። 26 ወአስተዓፀውዎሙ ወበጽሐ ዕፃ ዲበ ማትያስ ወተኈለቈ ምስለ ዐሠርቱ ወአሐዱ ሐዋርያት። |