መልእክተ ዮሐንስ 3 1 - ሐዲስ ኪዳን በልሳነ ግእዝ

በእንተ ጋይዮስ

¹ እምነ ቀሲስ ለጋይዮስ ለእኁነ ዘአነ አፈቅሮ በጽድቅ።

² ኦ! እኁየ እስመ አነ በእንተ ኵሉ እጼሊ ለከ ከመ ትሠራሕ ፍኖትከ ወትሕዮ በዘይኤድማ ለነፍስከ።

³ ተፈሣሕኩ ጥቀ ሶበ መጽኡ አኀዊነ ወስምዐ ኮኑ ላዕለ ተፋቅሮትከ ከመ በጽድቅ ተሐውር።

⁴ እምዛቲ ትፍሥሕት እንተ ተዐቢ አልብየ ከመ እስማዕ እንዘ በጽድቅ የሐውሩ ደቂቅየ።

⁵ ኦ እኁየ እሙን ግብር ዘገበርከ ለአኀዊነ።

⁶ ወከመ ዝንቱ ግብር ለነኪራን እለ ይከውኑ ለከ ስምዐ ላዕለ ተፋቅሮትከ በቅድመ ቤተ ክርስቲያን ከመ ሠናየ ትገብር ወዘንተ ግብረ ሠናየ ፈኖከ ቅድሜከ ዘይደሉ ለእግዚአብሔር።

⁷ እስመ በእንተ ስሙ ወፅኡ ወአልቦ ዘነሥኡ እምነ አሕዛብ።

⁸ ወንሕነሰ አኀዊነ ይደልወነ ንትቀበሎሙ ለእለ ከመዝ ከመ ንኩን ሱታፎ ለጽድቅ።

⁹ ወጸሐፍኩ ዘንተ ለቤተ ክርስቲያን ወአቅደምኩ ወባሕቱ ዲዮጥራስስ ዘይፈቅድ ይኩን ሊቀ ላዕሌሆሙ ኢይሰጠወነ።

¹⁰ ወበእንተ ዝንቱ አመ መጻእኩ አነ አዜክር ሎሙ ምግባሮ ዘይገብር እስመ ኢየአክሎ ዘይነብብ ንባበ እኩየ ላዕሌነ እስከ ኢይትቄበሎሙ ለአኀዊነ ወለእለኒ ይፈቅዱ ተቀብሎቶሙ ይከልእ ወያወፅኦሙ ዓዲ እምቤተ ክርስቲያን።

¹¹ ኦ እኁየ ኢትኩን ከመ ገባሬ እኪት አላ ከመ ገባሬ ሠናይት እስመ ገባሬ ሠናይት እምእግዚአብሔር ውእቱ ወገባሬ እኪትሰ ኢይሬእዮ ለእግዚአብሔር።

¹² ወበእንተ ድሜጥሮስኒ ስምዐ ኮነ ኵሉ ወለሊሃኒ ጽድቅ ስምዐ ኮነት ሎቱ ወንሕነኒ ስምዐ ኮነ ሎቱ ወተአምሩ ከመ ርትዕት ይእቲ ስምዕነ።

¹³ ወብዙኅ ብየ ዘእጽሕፍ ለከ አላ ኢፈቀድኩ በማየ ሕመት ወበቀለም እጽሐፍ ለከ።

¹⁴ አላ እትአመን ባሕቱ ከመ ፍጡነ እሬእየከ ወእትናገረከ አፈ በአፍ።

¹⁵ ሰላም ለከ ወይኤምኁከ አኀዊነ ወአምኅ ቢጸነ በበ አስማቲሆሙ። መልአት መልእክተ ዮሐንስ ሣልሲት። ወስብሐት ለእግዚአብሔር፤ አሜን።