ኀበ ሰብአ ተሰሎንቄ 2 2 - ሐዲስ ኪዳን በልሳነ ግእዝ

ምዕራፍ 2 በእንተ ሐሳዌ መሲሕ

¹ ንነግረክሙ አኀዊነ በእንተ ምጽአተ እግዚእነ ኢየሱስ ክርስቶስ።

² ወአንትሙሂ ውስተ ማኅበሩ ዑቁ ኢያደንግፁክሙ ፍጡነ ወኢትትሀወኩ እምአእምሮ ኢበመንፈስ ወኢበነገር ወኢበመጽሐፍ ከመ ዘእምኀቤነ ለእመ ትመጽእ ዕለተ እግዚእነ።

³ አልቦ ዘያስሕተክሙ ወኢበምንትኒ እስመ ኢትመጽእ ይእቲ ዕለት ለእመ ኢቀደመ መጺአ ዘየሀውክ ወይትከሠት ብእሴ ዐመፃ ወልደ ሕርትምና።

⁴ ዐላዊ ወሐሳዊ ዘያዐቢ ርእሶ ወይብል ለኵሉ አነ ውእቱ እግዚአብሔር አምላክ ወይነብር በቤተ እግዚአብሔር ወይሬሲ ርእሶ ከመ እግዚአብሔር።

⁵ ኢትዜከሩኑ ከመ አመ ሀሎኩ ኀቤክሙ አቅደምኩ ወነገርኩክሙ ዘንተ።

⁶ ወይእዜኒ ተአምሩ ዘይከልኦ አስተርእዮ እስከ ይበጽሕ ዕድሜሁ።

⁷ እስመ እከየ ምክረ ኀጢአት ወድአ ይትገበር በላዕሌሁ ወዳእሙ ይእዜሰ እኁዝ እስከ ይትኀደግ እማእከል።

⁸ ወይእተ አሚረ ይትከሠት ወልደ ዐመፃ ኃጥእ ዘሀለዎ ያጥፍኦ መንፈሱ ለእግዚእነ ኢየሱስ ክርስቶስ ወይስዕሮ በአስተርእዮተ ምጽአቱ።

⁹ ወምጽአቱሰ ለዝንቱ በኀይለ ሰይጣን በኵሉ ኀይል ወትእምርት ወመንክር ዘሐሰት።

¹⁰ ወበኵሉ አስሕቶ ዘኀጢአት ለሕርቱማን እስመ ኢተወክፉ ፍቅረ ቃለ ጽድቅ በዘየሐይዉ።

¹¹ ወበእንተዝ ይፌኑ ሎሙ እግዚአብሔር ኀይለ መስሕተ ከመ ይእመኑ በሐሰት።

¹² ከመ ይትኰነኑ ኵሎሙ እለ ኢየአምኑ በጽድቅ ወየኀብሩ በዐመፃ።

ዘከመ ይደሉ አእኵቶተ እግዚአብሔር

¹³ ወንሕነሰ አኀዊነ ርቱዕ ናእኵቶ ለእግዚአብሔር ዘልፈ በእንቲኣክሙ እለ አፍቀረክሙ እግዚአብሔር እስመ ኀረየክሙ ወተሣሀለክሙ እግዚአብሔር ርእሰ ሕይወት በተቀድሶ መንፈስ ወበሃይማኖተ ጽድቅ።

¹⁴ ዘበእንቲኣሁ ጸውዐክሙ በትምህርተ ወንጌል ከመ ትሕየዉ በስብሐቲሁ ለእግዚእነ ኢየሱስ ክርስቶስ።

¹⁵ ወይእዜኒ አኀዊነ ቁሙ ወዕቀቡ ትእዛዘ ዘመሀሩክሙ ወሠርዑክሙ ዘበቃልነ ወዘበመጽሐፍነ።

¹⁶ ወውእቱ እግዚእነ ኢየሱስ ክርስቶስ ወእግዚአብሔር አቡነ ዘአፍቀረነ ወወሀበነ ፍሥሓ ዘለዓለም ወተስፋ ሠናየ።

¹⁷ ጸጋሁ ውእቱ ያስተፍሥሕክሙ ልበክሙ ወያጽንዕክሙ በኵሉ ምግባር ወበኵሉ ቃል ሠናይ።