መልእክተ ጴጥሮስ 2 1 - ሐዲስ ኪዳን በልሳነ ግእዝ

ምዕራፍ 1

¹ እምኀበ ስምዖን ኬፋ ገብሩ ወልኡኩ ለኢየሱስ ክርስቶስ ለእለ ነኀብር ክብረ በሃይማኖት እንተ ከፈለነ በጽድቁ ለአምላክነ ወፈራቂነ ኢየሱስ ክርስቶስ።

² ሞገስ ወሰላም ይብዛኅ ለክሙ በአእምሮቱ ለአምላክነ ወኢየሱስ ክርስቶስ እግዚእነ።

³ ዘበኀይለ መለኮቱ ወሀበ ለነ ኵሎ ምግባረ ዘይወስድ ኀበ ሕይወት ወጽድቅ ውእቱ ዘጸውዐነ ውስተ ስብሐቲሁ ወውስተ ሠናይቱ።

⁴ በዘቦቱ ነሐዩ ወነዐቢ ወንከብር በተስፋሁ እንተ ጸገወነ ከመ በእንተ ዝንቱ ትኩኑ ሱቱፋነ ለመለኮተ ዚኣሁ እንዘ ትጐይይዋ ለፍትወተ ሙስናሁ ለዝንቱ ዓለም።

⁵ ወአንትሙኒ በኵሉ ጕጕኣ ገቢረክሙ አትልውዋ ለሠናይት በሃይማኖትክሙ ወበሠናይት ለአእምሮ።

⁶ ወበአእምሮ ለኢዘምዎ ወበኢዘምዎ ለትዕግሥት ወበትዕግሥት ለአምልኮ።

⁷ ወበአምልኮ ለተኣኅዎ ወበተኣኅዎ ለተፋቅሮ።

⁸ ወዝንቱ ኵሉ እምከመ ሀለወ ኀቤክሙ ኢኮንክሙ ፅሩዓነ ወኢኮንክሙ እለ እንበለ ፍሬ አላ ያበጽሐክሙ ውስተ አእምሮቱ ለእግዚእነ ኢየሱስ ክርስቶስ።

⁹ ወዘሰ ኢሀሎ ውስተ ዝንቱ ምግባር ዕዉር ውእቱ ዘየሐውር በመርሰስ ወረስዐ አንጽሖ ርእሶ እምእለ በልያ በላዕሌሁ ኀጣውኢሁ።

¹⁰ ወይእዜኒ አኀዊነ ጐጕኡ ከመ በጽንዐ ምግባሪክሙ ጽንዕተ ትኩን ጽዋዔክሙ ወታወፍዩ ሐሳበ ሃይማኖትክሙ ወዘንተ እንዘ ትገብሩ ኢትስሐቱ።

¹¹ ወይትወሀበክሙ ርሒብ ፍኖት ዘይወስድ ውስተ ሕይወት ዘለዓለም ወመንግሥቱ ለመድኀኒነ ኢየሱስ ክርስቶስ።

በእንተ አዘክሮ ሞት

¹² ወበእንተዝ እጽሕቅ ለክሙ ዘልፈ ወአዜክረክሙ ዘንተ ትእዛዘ እንዘ ጽኑዓን አንትሙ በዘሀለወ ጽድቅ።

¹³ ወይመስለኒሰ ከመ ርቱዕ ሊተ አምጣነ ሀሎኩ በዝንቱ ሥጋየ አንቅህክሙ በዘክሮ።

¹⁴ እስመ አአምር ከመ ፍጥንት ይእቲ ስሳሌ ዚኣየ እምኔክሙ በከመ አይድዐኒ እግዚእየ ኢየሱስ ክርስቶስ።

¹⁵ ወዓዲ እጔጕእ ከመ ተሀሉ ኀቤክሙ ዛቲ ትእዛዝ ዘልፈ ወከመ ትዘከርዋ እምድኅረ ኅልፈትየ ወከማሁ ትግበሩ።

በእንተ ስምዕ አማናዊ

¹⁶ እስመ ኢኮነ መሐደምተ ጥበብ ዘተሎነ ወአመርናክሙ ቦቱ ኀይሎ ለእግዚእነ ኢየሱስ ክርስቶስ ወምጽአቶ ወሀልዎቶ አላ ለሊነ ርኢነ ዕበዮ።

¹⁷ ዘነሥአ እምኀበ እግዚአብሔር አብ ክብረ ወስብሐተ ወቃል ዘወረደ ላዕሌሁ ዘምሉእ ስብሐተ ወልዕልና ይቤ «ዝንቱ ውእቱ ወልድየ ዘአፈቅር ዘአነ ኀረይኩ።»

¹⁸ ዘንተ ቃለ ንሕነ ሰማዕናሁ ከመ እምሰማይ ወረደ ሎቱ እንዘ ሀሎነ ምስሌሁ በደብረ መቅደሱ።

¹⁹ ወብነ ዓዲ ዘእምዝኒ ይቀድም ቃለ ነቢያት ዘያዐውቅ ዘንተ ወእምከመ ጥቀ ታሤንዩ ገቢረ ወትኔጽርዎ ይከውን ለክሙ ከመ ማኅቶት እንተ ታበርህ ውስተ መካነ ጽልመት እስከ ታበርህ ለክሙ ዕለት ወይሠርቅ ለክሙ ቤዝ ውስተ ልብክሙ ዘያበርህ።

²⁰ ወዘንተ ባሕቱ ቅድሙ አእምሮ ከመ ኵሉ ተነብዮ ዘውስተ መጽሐፍ አልቦ ላዕሌሁ ፍካሬሁ።

²¹ ወኢይከውን ተነብዮ ግሙራ እምፈቃደ ሰብእ ወኢእምሥምረተ ዕጓለ እመ ሕያው አላ በመንፈስ ቅዱስ ነበቡ ቅዱሳን ሰብእ ተፈኒዎሙ እምኀበ እግዚአብሔር።