መልእክተ ዮሐንስ 2 1 - ሐዲስ ኪዳን በልሳነ ግእዝ

በእንተ እግዝእት ወደቂቃ

¹ እምነ ቀሲስ ለኅሪት ወለእግዝእት ወለደቂቃ ለእንተ አነ አፈቅራ በጽድቅ ወበእንተ ዛቲ ጽድቅ አኮ አነ ባሕቲትየ ዘአፈቅራ አላ እለኒ የአምርዋ ለጽድቅ ኵሎሙ።

² ወበእንተ ዛቲ ጽድቅ እንተ ትነብር ኀቤነ ወትሄሉ ምስሌነ ወምስሌነ ይእቲ ለዓለም።

³ ሞገስ ወምሕረት ወሰላም እምኀበ እግዚአብሔር አብ ወእምኀበ ኢየሱስ ክርስቶስ ወልዱ ለአብ እግዚአብሔር ምስለ ጽድቅ ወተፋቅሮ።

⁴ ተፈሣሕኩ ጥቀ እስመ ረከብኩ እምደቂቅኪ እለ የሐውሩ በጽድቅ በከመ ነሣእነ ትእዛዞ እምኀበ አብ።

⁵ ወይእዜኒ እስእለኪ ኦ እግዝእት ወአኮ ትእዛዘ ሐዲሰ ዘእጽሕፍ ለኪ አላ ትእዛዘ ብሊተ እንተ ብነ ትካት ከመ ንትፋቀር በበይናቲነ።

⁶ ወዛቲ ይእቲ ተፋቅሮትነ ከመ ንሑር በትእዛዙ ለእግዚአብሔር ወዛቲ ይእቲ ትእዛዝ ከመ ንሑር ባቲ እንተ ሰማዕክሙ ትካት።

⁷ እስመ ብዙኃን መስሕታን እለ መጽኡ ውስተ ዓለም እለ ኢየአምኑ በኢየሱስ ክርስቶስ ከመ መጽአ በሥጋ ወዝ ውእቱ መስሐቲ ሐሳዌ መሲሕ።

⁸ ዑቁ ርእሰክሙ ኢትኀጐሉ ዘገበርክሙ አላ ከመ ዐስበ ፍጹመ ትንሥኡ።

⁹ ኵሉ ዘይናፍቅ ወኢይነብር በትምህርቱ ለክርስቶስ ኢሀሎ እግዚአብሔር ምስሌሁ ወዘሰ ይነብር በትምህርቱ ለክርስቶስ በአብ ወበወልድ ሀሎ።

¹⁰ ወዘኒ ይመጽእ ኀቤክሙ ወዘንተ ትምህርተ ኢያመጽእ ኢታብእዎ ቤተክሙ ወበሓሂ ጥቀ ኢትበልዎ።

¹¹ እስመ ዘይቤሎ በሓ ይሳተፎ በምግባሩ እኩይ።

¹² ወብዙኅ ብየ ዘእጽሕፍ ለክሙ ወኢፈቀድኩ በክርታስ ወበማየ ሕመት እጽሐፍ ለክሙ እስመ እትአመን ከመ እመጽእ ኀቤክሙ ወአፈ በአፍ እትናገረክሙ ከመ ፍጹመ ይኩን ፍሥሓክሙ።

¹³ ይኤምኁኪ ደቂቀ እኅትኪ ኅሪት ሞገስ ወተፋቅሮ ምስሌክሙ አሜን። መልአት መልእክተ ዮሐንስ ዳግሚት። ወስብሐት ለእግዚአብሔር፤ አሜን።