ኀበ ሰብአ ቆሮንቶስ 2 1 - ሐዲስ ኪዳን በልሳነ ግእዝ

ምዕራፍ 1 ሰላም ወበረከት

¹ እምጳውሎስ ሐዋርያሁ ለኢየሱስ ክርስቶስ በፈቃደ እግዚአብሔር ወጢሞቴዎስ እኁነ ለቤተ ክርስቲያን ዘማኅበረ እግዚአብሔር ዘሀገረ ቆሮንቶስ ወለኵሎሙ ቅዱሳን እለ ሀገረ አካይያ።

² ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

³ ይትባረክ እግዚአብሔር አቡሁ ለእግዚእነ ኢየሱስ ክርስቶስ አቡሃ ለምሕረት ወአምላካ ለኵላ ትፍሥሕት።

ሕማም ወትዕግሥት

⁴ ዘአስተፍሥሐነ እምኵሉ ሕማምነ ከመ ንክሀል አስተፍሥሖቶሙ ለኵሎሙ ሕሙማን በውእቱ ፍሥሓነ ዘአስተፍሥሐነ እግዚአብሔር።

⁵ ወበከመ በዝኀ ሕማሙ ለክርስቶስ ላዕሌነ ከማሁ ይፈደፍድ ፍሥሓነ በክርስቶስ።

⁶ ወእመኒ ሐመምነ ከመ አንትሙ ትድኀኑ ወትትፈሥሑ ወእመኒ ተፈሣሕነ ንሕነ ከመ አንትሙ ትትፈሥሑ ወትጽንዑ በትዕግሥቱ ለውእቱ ሕማም ዘቦቱ ነሐምም ንሕነሂ።

⁷ ወትውክልትነሂ ጽኑዕ ዘበእንቲኣክሙ ወበከመ ዐረይክሙ ሕማመነ ከማሁ ተኀብሩ በፍሥሓነሂ።

⁸ ወእፈቅድ ታእምሩ አኀዊነ ዘከመ ሐመምነ በእስያ እስመ ፈድፋደ እምአምጣነ ኀይልነ አመንደቡነ እስከ ቀበጽናሃ ለሕይወትነ።

⁹ ወአጥባዕነ ለመዊት ከመ ኢንትአመን በርእስነ ዘእንበለ በእግዚአብሔር ዘያሐይዎሙ ለምዉታን።

¹⁰ ዘአድኀነነ እመጠነዝ ሞት ወዓዲ ኪያሁ ንትአመን ከመ ያድኅነነ።

¹¹ እንዘ ትረድኡነ አንትሙኒ በጸሎትክሙ ከመ ንርከብ ሞገሰ በጸሎተ ብዙኃን ወአንትሙሂ ትትአኰቱ በኀበ ኵሉ።

¹² እስመ ዛቲ ይእቲ ትምክሕትነ ወስምዐ ግዕዛንነ በምሕረቱ ወበተመይጦቱ ለእግዚአብሔር ወኢኮነ በጥበብ ዘሥጋ ዳእሙ በጸጋ እግዚአብሔር አንሶሰውነ ውስተ ዓለም ወኢኮነ በትምህርተ ሥጋ ወፈድፋድሰ በኀቤክሙ።

¹³ እስመ አልቦ ዘንጽሕፍ ኀቤክሙ ዘእንበለ ዘታነብቡ ወዘተአምሩ ወዘይትዐወቀክሙ ወእትአመን ከመ ለዝሉፉ ታእምርዎ ለዝንቱ።

¹⁴ በከመ አእመርክሙነ እምአሐዱ ገጽ ከመ ንሕነ ምክሕክሙ ወከማሁ አንትሙሂ ምክሕነ በዕለተ እግዚእነ ኢየሱስ ክርስቶስ።

¹⁵ ወበዝንቱ ፍሥሓ ተአሚንየ መከርኩ እምጻእ ኀቤክሙ በቀዳሚ ከመ ትርከቡ ጸጋ ምክዕቢተ።

¹⁶ ወእሑር መቄዶንያ ወእምህየ እሠወጥ ኀቤክሙ ወአንትሙ ትፈንዉኒ ለምድረ ይሁዳ።

¹⁷ ወዘንተ እንከ ዘመከርኩ ቦኑ እንጋ ከመ አብድ ዘገበርኩ ወቦኑ ዘእመክር ሕገ ሰብእ እመክር እስመ ይደሉ ይኩን ነገርክሙ እመኒ እወ እወ ወእመኒ አልቦ አልቦ።

¹⁸ ጻድቅ እግዚአብሔር ወኢኮነ ሐሰተ ቃልነ ዘኀቤክሙ ወኢተቶስሐ እወ ወአልቦ።

¹⁹ እስመ ወልደ እግዚአብሔር ኢየሱስ ክርስቶስ ዘንሕነ ሰበክነ ለክሙ አነ ጳውሎስ ወስልዋኖስ ወጢሞቴዎስ ኢኮነ እወ ወአልቦ ዳእሙ እወ ኮነ በእንቲኣሁ።

²⁰ እስመ ኵሉ ዘአሰፈወ እግዚአብሔር ኮነ እሙነ በክርስቶስ ወበእንተዝ ቦቱ ወበእንቲኣሁ አሚነ ስብሐት ለእግዚአብሔር ንሁብ።

²¹ ወእግዚአብሔር ውእቱ ዘያጸንዐነ ምስሌክሙ በአሚን በክርስቶስ ዘቦቱ ቀብዐነ ወዐተበነ።

²² ወወሀበነ ዐረቦነ መንፈስ ቅዱስ ውስተ ልብነ።

²³ ወአነ አሰምዖ ለእግዚአብሔር በእንተ ነፍስየ ከመ በምሒከ ዚኣክሙ ኢመጻእኩ ቆሮንቶስ።

²⁴ ወአኮሰ ዘናጌብረክሙ ትእመኑ ዳእሙ ንረድአክሙ ለገቢረ ፍሥሓክሙ እስመ በአሚን ቆምክሙ ወአጥባዕክሙ በሃይማኖት።