ኀበ ጢሞቴዎስ 1 1 - ሐዲስ ኪዳን በልሳነ ግእዝ

ምዕራፍ 1

¹ እምጳውሎስ ሐዋርያሁ ለእግዚእነ ኢየሱስ ክርስቶስ በትእዛዘ እግዚአብሔር መድኀኒነ ወኢየሱስ ክርስቶስ ተስፋነ።

² ለጢሞቴዎስ ወልድየ ዘአፈቅር በሃይማኖት ሰላም ለከ ወሣህል ወጸጋሁ ለእግዚአብሔር አቡነ ወእግዚእነ ኢየሱስ ክርስቶስ።

³ እስመ አስተብቋዕኩከ ትንበር ኤፌሶን አመ አሐውር መቄዶንያ ከመ ትገሥጾሙ ከመ ኢያምጽኡ ካልአ ትምህርተ።

⁴ ወኢያምጽኡ መኀድምተ ወዛውዐ ነገር ዘይፈጥሩ በዘያስሕቱ ወያመጽኡ ተኀሥሦ ወየኀድጉ ሕገ እግዚአብሔር ዘበሃይማኖት።

⁵ ወማኅለቅቱሰ ለትእዛዝ ተፋቅሮ በንጹሕ ልብ ወበሠናይ ግዕዝ ወሃይማኖት ዘአልቦ ኑፋቄ።

⁶ እስመ ቦ እለ አውከኩ ወገብኡ ውስተ ነገረ ከንቱ።

⁷ ወእንዘ ይፈቅዱ መምህራነ ይኩኑ ኢየአምሩ ዘለሊሆሙ ይነብቡ።

በእንተ ሕግ

⁸ ነአምር ከመ ሠናይ ውእቱ ኦሪት ለዘይገብሮ በሕጉ።

⁹ ወነአምር ዘኒ ከመ አኮ ለጻድቃን ዘይሠራዕ ሕግ ዘእንበለ ለኃጥኣን ወለጽልሕዋን ወለዝሉፋን ወለውፁኣን እምጽድቅ ወለርኩሳነ ልብ ወቀተልተ አበዊሆሙ ወእሞሙ ወቀተልተ አዝማዲሆሙ ወቀተልተ ነፍስ።

¹⁰ ዘማውያን ወእለ የሐውሩ ኀበ ብእሲተ ብእሲ ሰረቅተ ሰብእ ሐሳውያን ወእለ ይምሕሉ በሐሰት።

¹¹ ወቦ ባዕድኒ ዓዲ በዘይትቃወምዋ ለትምህርተ ሕይወት ዘወንጌለ ስብሐቲሁ ለብፁዕ እግዚአብሔር ዘአነ ተአመንኩ ቦቱ።

አኰቴት በእንተ ጽዋዔሁ

¹² አአኵቶ ለዘተአመነኒ ወአጽንዐኒ በክርስቶስ ኢየሱስ እግዚእነ እስመ ምእመነ ረሰየኒ ለመልእክቱ።

¹³ እንዘ ቀዲሙ ፀራፊ አነ ወሰዳዲ ወጸኣሊ ወባሕቱ ተሣሀለኒ እስመ በኢያእምሮ ገበርኩ በኢአሚን።

¹⁴ ወፈድፈደ ጸጋሁ ለእግዚአብሔር በላዕሌየ ወሃይማኖቱ ወፍቅሩ ለኢየሱስ ክርስቶስ እግዚእነ።

¹⁵ እሙን ነገሩ ወርቱዕ ይትወከፍዎ በኵሉ እስመ ኢየሱስ ክርስቶስ መጽአ ውስተ ዓለም ከመ ያድኅኖሙ ለኃጥኣን ዘአነ ቀዳሚሆሙ።

¹⁶ ወባሕቱ ተሣሀለኒ ከመ ያርኢ ተአምራቲሁ በላዕሌየ ኢየሱስ ክርስቶስ በብዝኀ ትዕግሥቱ ወእኩኖሙ አርኣያ ለእለ የአምኑ ቦቱ ለሕይወት ዘለዓለም።

¹⁷ ንጉሥ ዘለዓለም ዘኢይመውት ወኢያስተርኢ አምላክ ባሕቲቱ ዘሎቱ ክብር ወስብሐት ለዓለመ ዓለም አሜን።

¹⁸ ዘንተ ትእዛዘ አማሕፀንኩከ ኦ ወልድየ ጢሞቴዎስ በከመ ተነብዮ ዘላዕሌከ ከመ ትጽናዕ በኵሉ ገድል ሠናይ።

¹⁹ እንዘ ብከ ሃይማኖት ወሠናይ ግዕዝ እስመ ሀለዉ እለ አውከኩ እምሃይማኖት ወተሰብሩሂ።

²⁰ እለ ሄሜኔዎስ ወእለ እስክንድሮስ እለ መጠውክዎሙ ለሰይጣን ይትኰነኑ ኢይልመዱ ፀሪፈ።