ኀበ ሰብአ ተሰሎንቄ 1 1 - ሐዲስ ኪዳን በልሳነ ግእዝ

ምዕራፍ 1

¹ እምጳውሎስ ወስልዋኖስ ወጢሞቴዎስ ለቤተ ክርስቲያን ዘተሰሎንቄ ምእመናን በእግዚአብሔር አቡነ ወእግዚእነ ኢየሱስ ክርስቶስ ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

² ነአኵቶ ለእግዚአብሔር ዘልፈ በእንቲአክሙ ወንዜከረክሙ ወትረ በጸሎትነ።

³ ወንዜከር በቅድመ እግዚአብሔር አቡነ ግብረ ሃይማኖትክሙ ወጽንዐ ፍቅርክሙ ወትዕግሥተ ተስፋክሙ በእግዚእነ ኢየሱስ ክርስቶስ።

⁴ ወነአምር አኀዊነ ፍቁራን ዘከመ ኀረየክሙ እግዚአብሔር።

⁵ እስመ ኢኮነ ትምህርትነ ኀቤክሙ በነገር ባሕቲቱ ዓዲ በኀይልኒ ወበመንፈስ ቅዱስ ወበስኢል ምእመን ወአንትሙሂ ተአምሩ ዘከመ ኮነ በኀቤክሙ በእንቲኣክሙ።

⁶ ወናሁ ኪያነ ተመሰልክሙ ወተወከፍክሙ ቃለ እግዚአብሔር በብዙኅ ሕማም ምስለ ፍሥሓ በመንፈስ ቅዱስ።

⁷ ወኮንክምዎሙ አርኣያ ለእለ አምኑ ኵሎሙ እለ በመቄዶንያ ወአካይያ።

⁸ እስመ እምኀቤክሙ ተምህሩ ቃለ እግዚእነ ወሰምዑ ወአኮ በመቄዶንያ ወአካይያ ባሕቲቱ ዓዲ በኵሉ በሐውርት ተሰምዐት ሃይማኖትክሙ በእግዚአብሔር ወኢንፈቅድ ንሕነ ምንተኒ ንንግር በእንቲኣክሙ።

⁹ ለሊሆሙ የአምሩ ዘከመ ቦእነ ኀቤክሙ ወዘከመ ተመየጥክሙ ኀበ እግዚአብሔር እምአምልኮ ጣዖት ከመ ትትቀነዩ ለአምላክ ሕያው ወጻድቅ።

¹⁰ እንዘ ትሴፈውዎ ለወልዱ እምሰማያት ዘተንሥአ እሙታን ኢየሱስ ክርስቶስ ወውእቱ ያድኅነነ እመንሱት ዘይመጽእ።