መልእክተ ዮሐንስ ሐዋርያ 1 1 - ሐዲስ ኪዳን በልሳነ ግእዝ

ምዕራፍ 1 በእንተ ነገረ ሕይወት

¹ ንዜንወክሙ በእንተ ውእቱ ዘሀሎ እምቅድም ውእቱ ዘሰማዕናሁ በእዘኒነ ወዘርኢናሁ በአዕይንቲነ ወዘጠየቅናሁ ወዘገሠሣሁ እደዊነ በእንተ ነገረ ሕይወት።

² እስመ ሕይወት ተዐውቀት ለነ ወርኢናሃ ወስምዐ ኮነ ወንዜንወክሙ ለክሙኒ ሕይወተ እንተ ለዓለም እንተ ሀለወት ኀበ አብ ወተዐውቀት ለነ።

³ ወርኢናሃ ወሰማዕናሃ ወንዜንወክሙ ለክሙኒ ከመ አንትሙኒ ትኩኑ ሱታፌ ምስሌነ ወሱታፌነሰ ምስለ አብ ወምስለ ወልዱ ኢየሱስ ክርስቶስ።

⁴ ወዘንተ ንጽሕፍ ለክሙ ከመ ትፍሥሕትክሙ ፍጽምተ ትኩን ብነ።

⁵ ወዛቲ ይእቲ ዜና እንተ ሰማዕናሃ ትካት እምኔሁ ወንዜንወክሙ ከመ እግዚአብሔር ብርሃን ውእቱ ወጽልመትሰ አልቦ ኀቤሁ ወኢአሐተኒ።

⁶ ወእመሰ ንቤለክሙ ብነ ሱታፌ ምስሌሁ ወውስተ ጽልመት ነሐውር ንሔሱ ወኢንገብራ ለጽድቅ ወለርትዕ።

⁷ ወእመሰ ውስተ ብርሃን ነሐውር በከመ ውእቱ ብርሃን ሱቱፋን ንሕነ በበይናቲነ ወደሙ ለኢየሱስ ክርስቶስ ያነጽሐነ እምኵሉ ኀጣውኢነ።

⁸ ወእመሰ ንብል አልብነ ኀጢአት ንጌጊ ለርእስነ ወአልቦ ርትዕ ኀቤነ።

⁹ ወእመሰ ነገርነ ወአመነ ኀጢአተነ ምእመን ውእቱ ወጻድቅ ከመ ይኅድግ ለነ ኀጣውኢነ ወያነጽሐነ እምኵሉ አበሳነ።

¹⁰ ወእመሰ ንቤ ኢአበስነ ሐሳዌ ንሬስዮ ሎቱ ወቃሉኒ ኢሀሎ ኀቤነ።