JUDAS 1 - Laibaibal Thiang (BSI)

¹ Judas Jesuh Krih ah ṭemmi-sal le Jeim unau pa nih, Pa Pathian nih a thianter i a kawhmi hna le, Jesuh Krih kilvenmi hna sinah:

² Zângfahnâk le daihnâk le, dawtnâk nan cungah karhter in um ko seh.

³ Dawtmi hna, kan co ṭimi khamhnâk kong nan sinah biatak tein ṭial ka timh nain mithiang hna sinah pêkchanh cangmi, hi zumhnâk kong hi felfai tein nan kilven khawhnâk lai, thazâng pêknâk biatu nan sinah ṭial a herh deuh tiah ka ruah.

⁴ Zeitintiah mizei maw a thliin an lut, cu hna cu Pathian-zeiaharellomi an si, Pathian zângfahnâk hi hornâk caah an hman i kan ngeih chun, Bawipa Pathian le kan Bawipa Jesuh Krih zong an hlawt, cubantuk mi hna cu hlan lio pi khan thiamlo co ding ah ruah ciami an si.

⁵ Hihi nan hngalh ciami a si nain hngalhter ṭhân kan duh hna. Ezip ram in Bawipa nih Ami le kha a khamhhna i cuhnu ah zumlotu kha a hloh dih hna, timi bia hi.

⁶ Cun vanmi hna, vanmi an sinâk duh loin an umnâk a kaltâkmi hna cu zungzal ṭêmnâk i ṭêm buin biaceihnâk ni lianngan i biaceih awkah muihnâk tangah chiah an si.

⁷ Sodom le Gomora le kiangkap khua hna zong thleidang loin fih a nungmi hornâk ah an i pe, a hleituk in an hor i zungzal meipi i hremnâk a tuar hngami umtuning zohchunh awkah chiah an si.

⁸ Cubantukin hi mi hna zong nih an mangah an thisa an thurter, nawlngeitu hna an hlawt i hmaizah awktlâk an thangchiat hna.

⁹ A cungnung bik vancungmi Michael hmanh nih, Moses ruak kong i khuachia he bia an i al ah khan, thangchiat lei in sual a puh ngam lo, “Bawipa nih in sî seh,” tiah a ti.

¹⁰ Cu hna nih an hngalh lomi kha an thangchiat hna, kokek hngalhnâk an ngeihmi cu, samram a hrutmi hna hngalhnâk nâkin a cungnung hlei lo, hi thil hna ah hin anmah le anmah an i hrawk tawn.

¹¹ Zeitluk ngaihchia dah an si! Kain lam kha an zulh i hlawh hmu dingah Balaam lamah hakkau ngai in an tli i Kora ralthawhnâk bangin an lo tlau dih te lai.

¹² Cuhna cu nan dawtnâk rawl thurhnawmtertu an si, ṭihnâk zeihmanh ngei loin, mah zawn lawng ruahnâk lungput he nan sinah an i tel tawn. Ruah ti a phor lomi khuadawm, thli nih a chawih lengmangmi bantuk an si, favâng thingkung theipar ngei lo, voihnih a thih hnu i a hram in bonghmi bantuk an si,

¹³ rili tilet, mah mualphonâk langhter i a phuan a chuah lenmi bantuk an si, a zuangmi Arfi a nak tak takmi zungzal muihnâk chiahpiakmi bantuk an si.

¹⁴ Cubangin Enok Adam in pasarihnâk nih khan, cubantuk mi hna sinah a rak chimchung cang,

¹⁵ “Zohhmanh u, mi vialte cungah biaceih ding le, Pathian bia a zum duh lomi vialte nih, Pathian ṭihzahnâk um loin an tuahmi thil vialte le Pathian-zeiaharellomi hna nih Amah ralchanh in bia an chimmi vialte cung i biaceih ding le thiamlo coter dingin Bawipa cu a mithiang thong hra he an ra lai.”

¹⁶ Himi hna hi phunzai a hmangmi, mi sawitu an si i anmah duhnâk nih a hruaimi hna an si, an nâl ngai i an hlawknâk ding zoh in mi an tlawnhtlamh tawn hna.

¹⁷ Asinain dawtmi hna, nannih nih kan Bawipa Jesuh Krih lamkaltu hna nih bia an chimchung mi hna kha philh hlah u:

¹⁸ cân hmadungah nisawh tu hna an um te lai, Pathian-zeirellonâk he anmah duhning lawngin khua a sami an si lai, tiah an chim chung cangmi kha philh hlah u.

¹⁹ Hi hna hi pumsa mi, Thlarau ngei lo, ṭhennâk chuahtertu an si.

²⁰ Asinain dawtmi hna, nannih cu Thiang Thlarau ah thlacam ulaw, nan zumhnâk a thiang bikmi cungah nanmah te fek tein dir ko u.

²¹ Pathian dawtnâk ah i kilveng ulaw, zungzal nunnâk tiangin kan Bawipa Jesuh Krih velngeihnâk kha zoh u.

²² Cheukhat cungah zângfahnâk ngei ulaw, ralring tein ruahthiamnâk ngei u;

²³ cheukhat `ihbu in khamhhna ulaw, mei chungin chuah hna u, taksa nih a thûrtermi thilthuam tiang khan hua u.

²⁴ Cubangin nan tlûk nâkhnga lo an kilveng khotu le a sunparnâk hmai ah lawmhnâk taktak he thûrhnawm lo in an chia khotu,

²⁵ Amah lawng a fimmi kan Khamhtu Pathian sinah, sunparnâk le biaceihnâk, Uknâk le ṭhawnnâk hna cu Atu le zungzal tiangin um ko seh. Amen.