Luke 1 - Haida Matthew Luke John and Acts 1891-99

Chapter 1.

¹ TLIKU gin itil shu edan tl kwon kālung-ai isdagudung-gun alth-ū,

² Kwunstie sta ga keng-gang-an isgien, Shanung-itlagadas kil un ga liplētgāgan ishin, itil ga shudaian ging-an.

³ Kwunstie sta gin wautliwon tliku edang-an un yenki di ūnshidulgun alth, duman dung un kālung-ai da di ishin gudung-gun, Theophilus lādsilthīs;

⁴ Gin dung tl slikotadaian yenki edan un dung ūnshidai una.

⁵ Herod Judæa tligai un king-gāgan nūt, nung liplētga Zacharias hin kyā ijan, waigien Abijah gia haadgai alth il lthong-gwil-gang-an; waigien Aaron gūjang-alung swon il īnāgan Elizabeth hin il kyāgan.

⁶ Waigien il stung-won Shanung-itlagadas hang-gu lā-āwon, waigien Shalana gia king-go-gung-ai wautliwon isgien, tliku gin il et-hul-gang-an ishin ging-an tlishgūda ādan il etgiū-gang-an.

⁷ Waigien gum il git-kai-ung-āwon, Elizabeth kekulaian altha, waigien il stung-won kē-ēlthāwon.

⁸ Waigien Shanung-itlagadas hang-gu tliku la tl et halan ging-an nung liplētgas gia lthong-gwilie il isdagundān.

⁹ Tliku ga liplētgasgai edang-an ging-an, Shalana gia temple-gai ai il kudsas gien, shkwūnūlou il ōgulthdie lāgan.

¹⁰ Waigien shkwūnūlou tl ōgulthdaiandlu, tl shkūlas wantliwon kyāgūst singlthgang gushu-gang-an.

¹¹ Waigien Shalana gia angel-gai swon shkwūnūlou altar-gai sōolgūst giāns īl kang-an.

¹² Waigien Zacharias gudung-ai lthkwīdaian tlistleuon la il kang-andlu-a, waigien il lthwaugalan.

¹³ Waigien nung angel-gas hin il shudaian, Zacharias gum lth lthwaugang: singlthgang dung gushus Shanung-itlagadas guduns altha, waigien dung jā Elizabeth nung īlthing-a dung odō sta kai-ishang, waigien John hin la dung kyādā-ashang.

¹⁴ Waigien dung gudung-ai las gien, tlika dung gwūlā-ashang; waigien tl kwon la tl kais alth gudung-ai lā-ashang.

¹⁵ Shalana hang-gu il eu-on-ses altha, wai-gien wine isgien gin dutga ishin gum il nīlthang-ashang; waigien ou-ung dulthi sta-hun anung Hants Las alth il stāūgā-ashang.

¹⁶ Waigien Israel gitalung kwon Shalana Shanung-itlagadas gwī ung-a il tla-stīlthishang.

¹⁷ Waigien Elijah gudung-ai isgien, dugwīgai alth ishin, la kōnast il kā-ashang, tl aungalung gudung-ai gitalung gwī il tla-stilths gien, ga geujiasgai ga lasgai kutung-gai ai ishin il al-istalai una; tl haada Shalana un agung elthgīdas il tla-elthgīgai una, hin la il shudaian.

¹⁸ Gushinu adshi un di ūnshidulth-tljū-ashang? di kē-ēlths gien, di jā ishin kē-ēlths altha, waigien hin Zacharias nung angel-gas shudaian.

¹⁹ Waigien nung angel-gas hin hanglthang il shudaian, Gabriel ltha-ū ijung, Shanung-itlagadas hang-gu nung giāans-a; waigien dung ā lth gushue un isgien, a gia-lthang lā is ishin dung ga lth shudie un di tl kilijun.

²⁰ Waigien, gwokeng, dung kilgūūdsāashang, waigien kilthgulie odō dung eshgāashang, ga shantlanai gut a gin is wai ging-an etgai keu-a, time-gai elthgīsdlu tliku lth shūs ging-an etses gum dung yet-dang-gun altha, hin la il shudaian.

²¹ Waigien tl haadas Zacharias keu edan, waigien temple-gai ā il gū-hunsgadan un tl kuldung-āgan.

²² Waigien tlistleuon il katla-waugandlu, tla ā gushue odō il eshgaian; waigien templegai ā gin unkuldung-a il kang-an un tl ūnshidan; waigien tla hung-ā stlang il akaiādaian, waigien hawun il kil-gāwon.

²³ Waigien waudlā, thistleuon sing gūt il lthong-gwilang-kashagan tlan ēlandlu, giang nai ā il kaidan.

²⁴ Waigien ashgai shantlanai dlā, il jā Elizabeth dulthgiēlan; waigien kōng kē-tlēlth gūt ung il salgādaian,

²⁵ Hin Shalana di isdagun, ga shantlanai ai di il keng-gundlu, tl haada shu di ēdans il gū-īlthdie una, waigien hin il shouon.

²⁶ Waigien kōng kē-tlū-unalandlu, Gabriel nung angel-ga Shanung-itlagadas sta Galilee ilna-gai swon Nazareth hin kyas gu katlagan,

²⁷ Nung dliang nung īlthing-a Joseph hin kias, David gia haadgai swon ijan, īnang-kasas un il katlagan; waigien nung dlians Mary hin kiāgan.

²⁸ Waigien la kwulth il kudsaian gien, Dung ā lth kil-lāgung, yenki dung tl tloulthligulths, Shalana dung alth ijung, hin il shouon.

²⁹ Waigien tliku il shouon alth Mary gudung ai lthkwīd-euon-an gien, tliku adshi gushue etgai odō il kwūlthalan.

³⁰ Waigien nung angel-gas hin il shudaian, Gum lth lthwaugang, Mary; Shanuug-itlaga-das dung alth gudung-ai las altha.

³¹ Waigien, gwokeng, dung dulthgiēlth-shang, waigien nung īlthing-a dung kai-ishang, waigien JESUS hin la dung kyādāashang.

³² Il euon-shang, waigien sha agwī Nung is Git hin il kyā-ashang; waigien Shalana Shanung-itlagadas David il aung gia aulthgahung-we la ga isdāashang;

³³ Waigien Jacob gia haadgai un il itla-gada-swonung-ashang; waigien lagia kingdomgai gum tlan elth-swonung-ung-ashang, hin nung angel-gas Mary shudaian.

³⁴ Gushinu adshi etishang, gum lth lāīnans altha? waigien hin Mary nung angel-gas shudaian.

³⁵ Waigien nung angel-gas hin hanglthang il shudaian, Nung Hants Las dung ing-gu isishang, waigien sha āgwī Nung is gia dugwi-gai dung ā lthkāūjēlthashang; althji alth ū nung dung kai-ises nung las isgien, Shanung-itlagadas Git ishin, hin kyāashang.

³⁶ Waigien, gwokeng, dung tou-i Elizabeth ishin kē-ēlths gien dulthgiēlgung; waigien kekula hin nung kyāgun da kōng kē-tlū-unulgung.

³⁷ Kil wautliwon Shanung-itlagadas sta isis gum dugwīa ādan isang-ases altha, hin nung angel-gas il shudaian.

³⁸ Shalana gītsada di ijung; tliku dung shus ging-an lth akwon di un edi, waigien hin Mary shouon. Waigien nung angel-gas la sta kaidan.

³⁹ Waigien ashgai shantlanai gut Mary giāagan gien, tliga gu tldou kwons ā ung il gūdūlthāgang-an, Judah tligai gu lana ijan ā-a;

⁴⁰ Waigien Zacharias kwulth il kudsaian gien, Elizabeth ā il kil-lāgan.

⁴¹ Waigien tlistleuon Elizabeth Mary la ā kil-las gudang-andlu, il dul ā nung īḵutsūs yildang-an; waigien Elizabeth Hants Las alth stahgan;

⁴² Waigien kwunan il kilthgūlaian, Tl jaadas shu dung las gien, nung dung kaiases ishin lāgung.

⁴³ Waigien gushintlou giagun Shalana-gai ou di keng-atlang?

⁴⁴ Gwokeng, tlistleuon di ā dung kil-las lth gudung-gundlu, nung īḵutsūs gudung-ai lā alth di dul ā yildung-gun.

⁴⁵ Waigien nung yetdagun ū lāgung; Shalana sta gin tl shudaian wai ging-an etses altha, waigien hin Elizabeth Mary shudaian.

⁴⁶ Waigien Mary hin shouon, Di althandai Shalana ā kil-lāgung,

⁴⁷ Waigien Shanung-itlagadas Nung alth di koguns alth di gudung-ai tlika-gūlāgun.

⁴⁸ Il gitsada jadas het gudung-ai ets il kang-an altha; adshi sta gūdista kang-gai wautliwon, nung las, hin di kyādāashang.

⁴⁹ Nung Dugwīa-euons di unyāgudungēlthdagun altha, waigien il kyē ū lāgung.

⁵⁰ Waigien gūdista kang-gai kwon shū sta la ga ga lthwaugasgai kalthshint il gudung-gung.

⁵¹ Hyang alth dugwīa tla il kendaian; ga gudung-ai sha etsgai hawun gin odō kwulthilgundān il hagujang-an.

⁵² Ga prince-gasgai aulthgahung-we sta hēt ga ung-a il isdaian, hēt ga ga gudung-ai etsgai ishin shī ga il isdaian.

⁵³ Ga k'wōtsgai gin lā alth il skisūdaian; waigien ga gin-lthing-asgai kēstlang-an il kilistīidan.

⁵⁴ Israel gitsadang da il tlaadan, Abraham un isgien, il gitalung un ishin.

⁵⁵ (Tliku itil aung-alung ga il shouon gingan) kung-gudung-ie ā ung-a il gūshgut-swonung-ai una, hin Mary shouon.

⁵⁶ Waigien Mary kōng kē-lthōnulth dlu la alth nāgan gien, gyang nai gwī silthgang il stēlan.

⁵⁷ Waigien Elizabeth kaigai dlu ga ēlan; waigien nung īlthing-a il kaian.

⁵⁸ Waigien la kwulthīt ga nāansgai isgien il tou-alung ishin Shalana la kalthshint gudung-euon-an ū gudang-an; waigien la alth tlika tl gwūlāgan.

⁵⁹ Waigien shin stanshang-āgandlu nung āḵutsūs circumcise-die un tl istlagan; waigien, Zacharias, hin la tl kyādang-kashagan, tliku il aung kyāgan ging-an-a.

⁶⁰ Gāanū; John hin tlou il kyāashang, wai-gien hin il ou hanglthang shouon.

⁶¹ Gum dung tou-i swon-hun hin kyā-ang-gung, waigien hin la tl shudaian.

⁶² Waigien il aung hung-ā stlang tl akaiadaian gien, tliku il kyāgai da il gudung-ai da la alth tl kiānang-an.

⁶³ Waigien gin kālung-ai gū da il kiānang-an gien, John, hinū il kyāng, hin il kālang-an. Waigien un tl kuldung-ā-ōdsou-on.

⁶⁴ Waigien hawīdan il helthi helthalan gien, il tong-il ishin ai otadan, waigien il gushouon gīen, Shanung-itlagadas ā il killāgan.

⁶⁵ Waigien tla kwulthīt ga nāang-an-gai wautliwon lthwaugalan; waigien Judæa tligai tldāwē kwons wautliwon ai tliku tl shouon wautliwon king-ā-kokūstlū-aian.

⁶⁶ Waigien ga gudang-an-gai wautliwon wau ā gūdanung-ēdan gien, Gushinu anung āḵutsūs ēdung-kasha-alth? hin tl shouon. Shalana stlai la alth ijan altha.

⁶⁷ Waigien il aung Zacharias Hants Las alth stahgan gien, gin unsta il shouon, waigien hin il shouon,

⁶⁸ Shalana Israel un nung Itlagadas ū lāgung; haadgai un ung-a il katlagan gien, tla il dahgan altha,

⁶⁹ Waigien David il gitsada gia nai ā kogan nushang-wē itil un il isdaian

⁷⁰ (Hetligai isīdan sta tliku prophet las helthi alth ung-a il shouou ging-an-a,)

⁷¹ Itil telg ga kensgai sta isgien, itil tloulthdā-ung-ie da ga gudunsgai wautliwon stlai sta ishin itil il kogundaian;

⁷² Itil aung-alung kalthshint il guduns gien, gin lā il shudaian ā ishin ung-a il gudanung-ai una;

⁷³ Abraham itil aung ā gushou tladsga alth gin il shudaian-a,

⁷⁴ Itil telg ga kensgai stlai sta itil kogunsdlu lthwauga ādan,

⁷⁵ Hēnung-a lā alth isgien, hēnung-a yā alth ishin, itil hēnung-askialthk la hang-gu la un talung lthong-gwilie un itil ga il isdie una.

⁷⁶ Nung āḵutsūs, waigien dā-ū sha āgwi Nung ets gia prophetgai hin kyā-ashang; Shalana gia keu-e elthgīdie un la konast dung kāases altha;

⁷⁷ Gyang haadgai il kogundāases isgien, tl dāung-as kalthshint ishin il gudung-ases un tla dung ūnshidulthdie una,

⁷⁸ Itil ītlagīda kung-gudung-as alth-ū, sha āgwī sta shantlan otulthgwai is itil un katlāashang,

⁷⁹ Alga ā isgien, kotal algagai ā ga tlodas ishin ā kokeshguts gien, keu dlaia ai itil al-istalai una, hin Zacharias shouon.

⁸⁰ Waigien nung āḵutsūs inastlaian gien, il gudung-ai tladsgēlan, waigien Israel haade la tl kendie keu, tligunltha il ijan.