Faarfannaa 1 - Hiikkaa Ammayyaa Haaraa Loqoda Dhiʼaa

Kitaaba Tokkoffaa Faarfannaa 1–41 Faarfannaa 1 Karaa Lamaan

¹ Namni gorsa hamootaatiin hin deddeebine, yookaan karaa cubbamootaa irra hin dhaabanne, yookaan barcuma qoostotaa irra hin teenye, eebbifamaa dha.

² Garuu inni seera Waaqayyootti gammada; seera isaas halkanii guyyaa irra deddeebiʼee itti yaada.

³ Inni akkuma muka qarqara bishaan yaaʼuu dhaabamee yeroo isaatti ija isaa kennu, kan baalli isaas hin coollagnee ti; wanni inni hojjetu hundinuus ni tolaaf.

⁴ Hamoonni garuu akkana miti; isaan akka habaqii qilleensi fudhatee balleessuu ti.

⁵ Kanaafuu hamoonni murtii dura, yookaan cubbamoonni waldaa qajeeltotaa keessa hin dhaabatan.

⁶ Waaqayyo karaa qajeeltotaa ni beekaatii; karaan hamootaa garuu gara badiitti geessa.